2024.05.05 Westpol - Die Luxus-Schleuser 報導猴穿衫做走水 ê 新聞 hōo 我想著公司提出 Die Blaue Karte EU hōo 伊，伊目頭結一下攏無隨殘殘拒絕 ê S，𫝛時想著解釋 buē 離 ê 德國交台灣相𫝛是認人無認地，所致我 buē 因為翁婿是德國人就有德國護照 ê 𤺪。
S 是我無興等待猶 teh 區別 BRD & DDR ê 男朋友，一个人拆票去有東方 Florenz 美稱 ê Dresden 行跤花 uī-tio̍h 儉歇暝錢上網揣膨椅趨湧熟似 ê 印度朋友。
S 是德國公司請來補德國人較頇顢 ê 事工，本底無興參加膨椅趨湧 ê 伊，因為一日貼貼講無幾句話就 kā 德國獨身公寓一客廳一睏房一食飯廳 ê 客廳徙出來做膨椅趨湧，我交伊連絡 ê 時陣，伊斟酌寫工課時間交我需要睏客廳敢有法度接受，遮爾仔詳細 ê 紹介 hōo 我雄雄 buē 慣勢，起因我是無料借人兜歇暝紲 hōo 願意寄我無料停睏 ê 人 uī 我設想遐爾仔斟酌，實在誠感心 mā 決心 kā 本底 bueh 送 hōo 合該然 ē hōo 德國朋友客客氣氣收落來，斡頭隨擲糞埽桶 ê 俊美王梨酥。按我蹛 ê 城市盤坐 RE 換 ICE 到 Dresden 至少十點鐘，這是無算德鐵 DB kā 雙生仔 D 藏起來 ê 時間，所致當我按蹛 ê 角勢骨友逐逐幫 kiōng-bueh 交我 Say Goodbye ê 車幫 hōo 伊有才調準時到 Dresden，德鐵猶原無 hōo 我失望，我足足晏 bueh 4 點鐘 tsiah 到 Dresden hōo 我歹勢甲敲通電話 kā S 講我到 ê 時間傷晏，我第二眠 tsiah 去 kā 齪嘈，伊文文仔笑講無要緊，伊 tuì DB ê DELAY 已經慣勢甲無要意。
我笑應一句我 mā 慣勢 DB is Deutsche Delay Bahn, referred to as D.B.。
四常早睏 ê S uī-tio̍h 等東南西北齊𫝛方位揣路雞 ê 我，S 等到險 bueh 翻點 tsiah 去歇睏，隔轉工留一張紙條「若是無棄嫌，下昏飯我請你食咖哩，我家己煮 ê 咖哩。」我那食 S 攢 ê 德國早起頓那回訊息 hōo 伊講按算轉來 ê 時間，只要 U-Bahn 無閣坐 m̄ 著方向。
S 交我齊是外國人，gún-ê 德語齊按生活環境來，唯一無相仝是 S 有去上德語課，我 ê 德語是 uī-tio̍h 揣路雞時通唬德國人 uī 我停跤引𤆬我行出條條大道根本無通羅馬 ê雺煙散霧。
順手頭 ê 導覽冊沓沓仔探訪這个 tī 二戰交柏林相𫝛，炸彈食甲凡勢地球已經消失，埋 tī 地球腹肚內 ê 未爆彈凡勢猶無清甲清氣啖啖 ê 古都，我擘腹家己確定再三 ê 羅經又閣看 m̄ 著就骨力請教仝款等車 ê 生份人，這方向敢是按這个地址去？
得來不易 ê 自由凡勢 hōo 人 buē 慣勢，大多數 ê 人連應聲攏無隨交我保持距離，有應聲 ê 人一直講 die Straßenbahn hōo 德語 tsiah 彼幾句 ê 我霧嘎嘎，不而過猶是順利準時轉去 S 兜交伊做陣食頓誠久無食 ê 印度料理。
「我本底無按算接受你 ê 申請，因為我準備離開德國」那食飯那聽 S 分張踮德國工課 ê 鋩鋩角角，我雄雄想著歐盟火車頭 ê 德國自二戰結束到今，伊 ê 移工從來 m̄ 捌減少，不而過伊 ê 移工敢若有分區。Tī 美國我見著無仝口音 ê 人 tī 餐廳 tī 速食店 tī 報紙攤食頭路，德國敢若無--neh，德國 ê 大眾商業 hōo 我感覺蓋成南非種族隔離政策，德國人一區，亞洲人一區，土耳其人一區。所致一个人出門我絕對 buē 去烘焙店 bué 比超市較有味素 ê 麭，顛倒去土耳其烘肉店 bué 窮真食 buē 敆喙 ê Kebab，起因德語無兩句，我猶是有才調自在寬寬仔點菜，免驚惶家己 ê 笨桶 ē 引起工作人員 ê 反白睚兼鼻空衝核仔爆炸 ê 蘑菇煙。
兩人那食飯那分張無仝環境不而過若雙生仔 ê 生活經驗，S 講「這就是按算拒絕押尾願意接受你 ê 申請 ê 因端，起因我思念有人通開講 ê 日子。」
這段人生無到 0.1% ê 記持 tī 外國人 uī-tio̍h 走水相信有錢就有地提著德國藍卡 ê 故事 hōo 我想著，準做公司願意 uī 伊申請藍卡伊 mā 無願意繼續停跤踮德國 ê S，紲落來想著申請依親利用暗時去中興大學上在職德文課，德文老師分張 ê 故事。
老師 ê 美國同學畢業無轉去美國食頭路，踮德國作穡十外冬德語講甲若當地人，不而過社交生活交 S 無宛 2 體，交無朋友。一日交伊同事十外冬 ê 女同事 tī 茶水間熱情 tuì 伊講「咱會使得做陣做食中晝頓 ê 朋友」，老師 ê 朋友回應「我確實是欠朋友，不而過我無欠夥計」，彼日老師 ê 朋友 m̄ 捌孤鳥插茶水間、孤鳥插食堂，甚至下班有人招伊去 Biergarten，猶未徙岫進前，德國人 ê 非我族群交我無底代，準備徙岫聽老師分張這件代誌，我開始思考我個人確實有較孤僻一寡，總是我 mā 無孤僻甲 buaih 交人接接，人正經 kā 家甲做踮德國，搪著老師朋友 ê 狀況我敢有才調穩穩仔 kā 準過 buē 發水泱？
家甲正式做來德國，我總算理解 S ê 感受，準做我入人門，順人意講德語，德國人就是有才調 tuì 我講「Sprechen Sie Deutsche」你敢 ē 曉講德語？貧惰骨做甲𤺪矣，出門允頭路有 ê 人 uī-tio̍h 表示特殊，刁意故講家己 mā 講甲 buē 輾轉 ê 母語 hōo 我氣甲捷捷轉來哭呻，押尾隨在遮 ê 人，起因我講 ê 話寫 ê 字𪜶一句攏聽無 mā 讀無。 不而過這个現象 m̄ 是 kan-na 德國人，連歐洲其他地區 ê 移工 mā 有相𫝛 ê 症頭，德語講甲比我爛，英文閣無半句，捷 tuì 我講聽起來客氣 ê「Wie」（啥物）窮實是刁意故 ê 無客氣。
過去 ê 心不可得，現在 ê 心不可得，未來 ê 心不可得，bueh 讀出好 ê 代誌就是莫讀出歹 ê 代誌，我 kā 成做人莫名其妙 ê 優越感轉做時間 ê 成壞住空 tī 彼个當下解決，無紮任何情緒轉來，情緒若無才調敨就 kā 伊轉做文字寫踮部落格 hōo 部落格成做我 ê 弄舌盒仔像 Saving Samantha(2009)迵過文字 kā 清無掉 ê 情緒清掉，然後我發覺遮 ê 情緒寫久竟然會生菇 hōo 我𤺪 tàu-tàu，這實在是大水柴矣。
人生有 tsuē-tsuē 路標，正港 hōo 家己永遠 m̄ 知愛向佗一條路行，準做清楚知影按佗一个方向行，猶是 ē 搪著揣路雞 ê 雺霧散煙，按呢就面對伊，解決伊 hōo 伊成做𤺪 ê 柴火 hōo 家己行向閣較好 ê 家己。
像我 ê 弄舌盒仔真久無弄翁兜 ê 尻川後話，這就是進步，行向閣較好並自在 ê 家己。
