《Su-Tó-Ji̍t-Sin》 tē 17-ji̍t ê cha-tó

Choân-lêng ê siōng-tè, lí sî-siông tī góa sin-thé í-gōa ê sè-kài, iā sî-siông tī góa sim-lêng ê lāi-bīn, lí-sī bô-só͘-put-chāi ê siōng-tè, kiû-lí hō͘-góa tī kin-á-ji̍t ê siⁿ-oa̍h tiong koh-khah chin-si̍t kám-kak tio̍h lí-ê êng-iāu kah choân-lêng.

Chú-a! tng góa siàu-liām lí chhòng-chō ê úi-tāi, góa m̄-káⁿ bōe kì-tî, lí-sī chhòng-chō ê tōa-chú-chài, chia--ê thiⁿ kóng-khí lí-ê êng-kng, chia--ê soaⁿ soan-iông lí-ê ui-giâm. góa-ê ba̍k-chiu khòaⁿ--kìⁿ ú-tiū chhiong-móa bí-lē ê kéng-tì, tùi góa kóng-khí siōng-tè chiū-sī chin--siān--bí ê goân-thâu.

tòa-tī góa sim-lêng lāi-bīn ê chú! kiû-lí kin-á-ji̍t sù-loh un-tián, hō͘-góa bêng-pe̍k lí tī góa sim-lêng ê kám-tōng, iā hō͘-góa tì-ì thiaⁿ-lí tùi-góa só͘ kóng ê it-chhè ê ōe, bō-tī hō͘-góa siū sè-kài ê kiáu-lā lâi bê-sit, tì-sú góa thiaⁿ bōe-tio̍h lí-ê siaⁿ. kiû-lí bô èng-ún góa khi-phiàn ka-kī, á-sī ûi-pōe lí-ê bēng-lēng, koh hō͘-góa tit-tio̍h ia-so͘ ê un-tián, tī tak-hāng sū sūn-thàn lí-ê chí-ì.

thiⁿ-tōe ê chú, kiû-lí hō͘-góa chai, lí-ê úi-tāi iâⁿ-kòe it-chhè, ká-sû lí tòa-tī góa sim-lāi, lí iā pí góa-ê sim khah-tōa. hō͘ góa-ê sim-lêng ēng lí-ê úi-tāi chò hoaⁿ-hí. chai lí-sī chhiau-kòe góa─chhiau-kòe góa-ê sióng-siōng, chhiau-kòe góa-ê lí-kái, lí-ê phòaⁿ-toàn bô-thang chhek-to̍k, lí-ê chûn-chāi, kiám iông-ī thang chai, góa-beh in-ūi án-ni lâi tit-tio̍h an-hioh.

Chú-a! goān lí-ê miâ sèng. a-mén!

Su-Tó-Ji̍t-Sin

tē 17-ji̍t ê cha-tó