分享我幫襯「承福殯儀」(Glory Funeral) 嘅慘痛經歷。暫知「恩福殯儀」，「香港葬儀社」，「永善殯儀」，「信愛基督教殯儀策劃團隊」，甚至「銀幸」都係佢哋嘅分身，由同一班底同一老細，何太（又稱曹小姐，真名曹X懷）... 搵咗佢哋處理家人身後事，極後悔！做殯儀儀式做到先人都俾佢哋咒埋，黑心至極！
希望我哋嘅經歷可以警醒大家，千祈唔好成為下一個受害者。以下係呢間黑店嘅幾大罪狀：
一、花牌出錯不下十次
首先，處理先人花牌本應係基本嘢，佢哋前後都起碼錯咗十次(無誇大，係真係有十次），人名錯，稱呼錯，預個客自己proofread，改嚟改去都錯，佢哋職員承認係完全冇做過任何檢查同核對！收錢辦事，但連最基本嘅責任心都冇。
二、2.5個鐘儀式縮水到50分鐘
最離譜係，佢哋係所有儀式進行前已chur客人俾全數款項（據了解，其他殯儀公司係第一日儀式完成後或兩日儀式完成後收全數）而事前當然係無講呢啲payment terms…點解咁chur? 因為一收晒錢之後就是是旦旦，亂做嘢！
本身佢哋職員話出殯係預2.5個鐘儀式，最後唔知佢哋慳成本故意做少咗儀式定點，50分鐘已經做完所有嘢，整整少咗70%時間，搞到我哋上午8點幾已完成儀式，9點鐘已搭佢哋安排嘅旅遊車到酒樓…上車當下我自己都因為情緒好差，喊到收唔到聲，根本都無留意時間…..點知去到酒樓，人地酒樓連廚房都未返工，本身預訂咗成圍纓紅宴都因為時間大失預算而食唔到，認真大吉利是
附上返當日對話…我8:55已問緊佢哋點解會咁..初時我都忍住道火，但佢哋當然唔覆….所以之後過一日我就直接打電話俾佢哋，但佢哋態度當然係表示唔會負任何責任
佢哋老細同資深員工係電話就死都唔認安排有問題，個客服同事仲係whatsapp官腔回覆我話纓紅宴宜早不宜遲，所以預鬆啲，你話係咪搞笑？早到8點幾9點食，真係聞所未聞
三、恐嚇詛咒家屬同先人
由於呢間嘢太衰格，淨係想搵快錢，搞到我哋成家人連賓客連最基本纓紅宴都食唔到，一啲良心都無，我哋要求佢哋以先人名義捐款俾大型嘅慈善機構作「賠償」，佢哋老細何太態度極惡劣，話儀式早完成即係順利，係「好事」，我哋唔應該投訴…講多兩講，仲當場恐嚇我哋話我哋追究落去只會「搞到先人」，咁都講得出，真係唔知佢背後做咩..細思極恐…
另一日，佢哋仲叫一個資深員工何小姐打嚟，話佢哋公司無錯，有錯都係個別員工嘅錯，佢哋行個人問責制，所以如果我哋堅持要佢哋捐款，即係要迫嗰個員工捐錢，咁樣會令我哋一家及先人作「業」….要受返因果…為求甩身連詛咒都做埋…
四、員工扮家屬留假好評
我哋將經歷放上網後，發現佢哋嘅Google Review本身只得一粒星，全部都係劣評。點知我哋一出聲，佢哋就即刻搵自己員工瘋狂洗版，用假好評將評分由1星洗到上4.2星，完全係欺騙公眾！
本身有個叫pauline yeung嘅人係google留好評話自己老公過身，都係靠承福辦後事，而呢個pauline yeung正正係替我哋做花牌做到錯晒嘅員工，被踢爆後就即刻delete咗comment..身有屎
佢可能唔知我知道佢叫pauline yeung, 但其實群組入面一早已介紹佢叫做pauline，而加上我亦曾經同呢個pauline通過多次電話，電話入面佢向我介紹自己姓楊…所以我肯定佢就係呢個pauline yeung
五、將先人骨灰放迷你倉
亦有網友爆料...，話呢間公司為咗慳錢，將客戶嘅先人骨灰存放喺迷你倉或者寫字樓！
我上網search佢老細個名「曹X懷」見到佢有登過報紙叫人認領返啲骨灰…，應該係佢曾經俾食環捉到，所以唔可以繼續存放骨灰.. 食環公報嘅地址(九龍紅磡馬頭圍道 21 號義達工業大廈 C 座 4 字樓 31 室)，的確係一間叫「租倉易」嘅迷你倉
係佢哋眼中嘅骨灰就係一件雜物咁….根本佢哋對行業，對先人都係零尊重…為錢不擇手段....完全冇任何尊重同道德可言！
六、黑店分身式經營手法
我肯定「承福殯儀」同埋「恩福殯儀」係佢哋嘅！兩間都係同一個老細，都係何太（真名曹X懷），同埋佢哋承福員工whatsapp個名會加埋恩福（paradise ltd)係個whatsapp名稱度，一定係姊妹公司
亦有網友發現「香港葬儀社」，「永善殯儀」，「信愛基督教殯儀策劃團隊」，甚至「銀幸」都極可能係佢哋嘅分身... 因為網頁設計好相似同地址都幾乎一樣，佢哋就係諗住做臭一個名，就換過另一個名繼續呃人...
暫知黑店主分身：
- 承福殯儀
- 恩福殯儀
- 香港葬儀社
- 永善殯儀
- 信愛基督教殯儀策劃團隊
- 銀幸
由於黑店過往都成日改名所以貼埋佢哋某啲鋪頭地址係下面：
- 承福總鋪： 紅磡寶其利街寶利大樓地下8號鋪 (牌照號 2412800056a)
- 恩福總鋪： 紅磡必嘉街18號嘉麗閣地下3號舖 (牌照號 2412800065)
- 其他辦公室 (承福)： 灣仔道125號國泰88商場3樓T19號鋪（註：此為承福係食環署嘅牌照註冊地址）
- 其他辦公室 (恩福)： 灣仔道125號國泰88商場3樓T06號鋪（註：此為恩福係食環署嘅牌照註冊地址）
- 共享工作間： 灣仔告士打道60號中國華融大廈9樓913室
- 其他地址： 九龍紅磡寶其利街寶利大樓地舖、九龍紅磡蕪湖街70-74號 潤達商業大廈 1樓
總結
一句講晒，呢間嘢錢就識收（簡單道教儀式埋單5-6萬 （骨灰盅$9800，刻字另加$400））嘢就亂做…價錢絕對唔係平，佢哋眼中只有錢，為咗賺錢可以不擇手段，講大話、恐嚇、詛咒、造假、犯法，完全冇底線。市面有更多更多正常有心做嘅agent,呢間嘢只為搵錢，一啲良心都無！絕對唔建議搵佢哋！
佢哋標榜自己係「社企」，根本就係掛羊頭賣狗肉嘅偽君子！希望我哋一家嘅慘痛經歷可以警醒大家，處理先人身後事，一定要小心選擇，唔好再有下一個家庭好似我哋咁受呢啲黑店嘅氣同侮辱！
