桌頂戰場

　　今仔欲來講个閣是行佇邊仔个題目——桌頂耍戲《逆統戰》，雖然我攏講電動，原文个「game」本來就是「board game」个彼字「game」，所以嘛毋是我烏白講。

　　一開始會注意著這个桌戲是因為圖：

　　做一个 óo-tha-khu 就是愛看尪仔圖！看著媠媠个尪仔就會想欲了解這个角色是啥人，然後看著遮人攏是代表予中國吞去个民族，這是一个做伙反抗中國个耍戲。我本成就誠愛這種共現實化做𨑨迌物仔个耍戲，而且是佮歷史佮政治有關係，攏是我有興趣个，隨決定一定愛來買，到底有好𨑨迌無，我就無咧注意。

　　二月份開始出貨，我是三月初收著，先佮厝內小弟試耍過了後，招著三个朋友做伙𨑨迌，第一擺做逐家个對手紅軍，第二擺選維哥力亞（Uyghuria）佮台灣、滿州做伙對抗紅軍。按呢兩擺耍落來，感覺物件雖然濟，耍法無蓋難，佮現實嘛誠成，愛先攢家己手頭个當用个資源，資源愈濟就會當買閣較濟資源，時機到才一睏頭來拍予紅軍袂赴應，若愈濟人同齊拍，就愈有機會，毋是輸人毋輸陣，是毋輸陣就袂輸人。

　　紅軍上重要就是維穩（？），莫予家己壁內予人佔去，時間到就贏矣，我第一擺拍贏台灣就是按呢，台灣雖然揣著東洋鬥相共，佔來紅軍壁內，伊一面佔，我一面拆，無朋友欲拍贏紅軍真正困難；第二擺阮朋友做紅軍，無咧拆家己壁內个反抗者，一心想欲統一台灣，煞顛倒拍輸。

　　這个耍戲內對抗紅軍个陣營就有八个，閣有五个紅軍壁內个反賊，這十三个陣營攏有幾若个無仝能力个本營會當揀，予這个耍戲有足濟可能性，干焦煩惱無朋友通𨑨迌。這耍戲閣顧著咱遮無朋友个邊仔人，閣有設計單人版，予你家己一个拍紅軍，我猶未試過，毋過聽講足難。

　　人少歹拍，有人講人濟會相等，毋過我感覺這是新人个問題，當仔開始耍个時，逐家對卡个功能攏無熟，愛想較久，嘛毋知影欲按怎合作，著捌人个時就感覺無聊。

　　若是看著我今仔寫个，對這个桌頂耍戲有興趣，聽講𪜶四月中閣欲開放予人買第一批賣賰个 300 套，會當家己去搶看覓。