06.2024| 好想發現有種好奇藏骨子裡未散

丹尼

2024/06/17閱讀時間約 6 分鐘

執筆之時，已在英國生活了兩個月，漸漸適應了這裏的生活節奏。無論是日常生活上的瑣碎事，還是工作等，都上了軌道。這篇文章將會由衣食住行等四方面講下呢段時間嘅生活。

1.衣

首先，就由買衫買鞋講起，嚟到英國之後，印象中都係買過兩至三次嘅衫或者鞋，因為我在香港帶了需要穿的衫同埋鞋到英國，例如波鞋、皮鞋、牛仔褲等，所以來到英國後都甚少買任何衫褲鞋襪。

直至我開始返工，要穿黑褲及黑鞋，所以就在連鎖的fast Fashion時裝舖和運動舖購物。

英國的物價並不便宜，我覺得還比香港昂貴。例如一條香港UNIQLO賣港幣$300的牛仔褲，英國的UNIQLO賣到接近50磅，價錢有點驚人。所以我之前買褲子，都係去歐洲出名平的連鎖時裝舖Primark。

Primark啲衫褲真的很平，平得有點誇張，一條Chino的西褲都係賣約10磅，對比其他都係主打fast Fashion的連鎖店，例如H&M，trimax等，Primark係價錢上真係冇得輸。

當然一分錢一分貨，衫褲的質素一定不太好，我買了兩條西褲，洗咗數次後就起毛粒，不過唔緊要啦，你買得呢啲比較平嘅衫褲，你都係預着着半年就唔要。

2.食

然後就講吓食個方面，出發去工作假期之前，都聽過好多人講喺英國係美食沙漠，隨便入一間餐廳，至少應要10至20鎊。唔似香港咁，即使堂食都有平靚正的美食。故此在出發前都有心理準備，多數都會喺屋企自己煮飯食。

嚟到倫敦之後，超級市場簡直是我接近每日都會去的地方，我諗我喺香港生活嗰陣一星期都未必去到一次超級市場，當時無論係日用品或者食物都係由屋企人購買。

我諗呢一個都係我嚟咗工作假期嘅最大轉變，每星期或者每日都要為後幾日嘅生活好好打算，例如喺超級市場會諗想煮啲咩，或者有時唔想煮就諗買咩嘢食好。

簡單同大家講吓平時我鍾意煮啲咩或者食啲咩。嚟到呢度之後，當然食多咗西方的食物。例如自己會煮卡邦尼意粉，喺呢度超市你會見到唔同種類嘅意粉，呢啲意粉你見到個英文都唔會識讀嘅，然後買雞蛋，煙肉，芝士等煮埋一齊。另外呢度嘅肉類都係好平嘅，一塊牛扒都係大約四磅，所以有時候會喺屋企煎牛扒再配上薯蓉等。

而有時候唔想開爐煮飯，就會喺超級市場買一些預製好的食物。例如千層麵，意大利飯，炸魚，薄餅甚至原隻醃好的燒雞（這隻6鎊的燒雞非常美味）。以上的食物都是直接放在焗爐就可以，非常之方便，啱晒有時放工後疲累到不想煮飯的我。

最後，當然要講吓我另一個至愛，我諗都算是英國的國民食物Meal deal。Meal deal係一個主食，小食以及飲品的套餐。而主食通常都是三文治或者卷餅，我最喜歡Sainsbury’s 的Southern chicken wrap。而小食就可以揀薯片，生果或者雞蛋。飲品方面就有汽水或者果汁等。我通常做完健身，想食啲輕盈的食物，就會食wrap，雞蛋同飲枝果汁。

3.住

講完衣同食之後就同大家講吓我而家住嘅地方啦。倫敦主要分成東南西北四個居住地區，東部同南部的治安相對西部及北部冇咁好。蒐集資料後，我就屬意先在西倫敦居住，雖然租金比其他地區昂貴，但考慮到第一次在外地居住，自然想住在一些治安較好的地方。

出發前睇過網上的資料及YouTube上的介紹後，就決定住在Ealing區。首先，Ealing位於最近落成的Elizabeth line，出入倫敦的市中心只需要20分鐘。而且Ealing的安全指數比較高及這區有大量的日本人居住，對於我這個人生路不熟的人來說，這些原因都會令我安心起來。

我先在Airbnb租住了房間半個月，以便我可在這半個月間四出睇樓。我想睇過親身睇過長租的單位才決定居住。由於我由細到大都與家人居住同一個單位，未試過住宿舍或者分租嘅房間，在入住之前，我都擔心如何跟別人相處，但入住後這些擔憂都一掃而空，因為都冇想像中的困難。雖然有時候都需要等候使用廚房或廁所但在我居住Airbnb的時候，所有事情都尚算順利，而入住的單位也十分舒適，使我慢慢適應自己居住嘅生活，為我長住在英國也打了一支強心針

到埗後，我就在英國的租樓網站尋找租盤，由於我住在Airbnb的時候，發現居住的這一區也不錯，既有大型超級市場，又鄰近地鐵站及健身室，生活所需要的設施都應有盡有，所以就希望搵返附近的租盤。

我搵到適合嘅租盤後，就聯絡了經紀相約睇樓。在睇樓之前，我都有點緊張，因為當時係第一次需要用英文同陌生人傾偈，而且睇樓可能有好多用語我都不懂用英語表達。不過，經紀是一個外向的人，在睇樓的時候，他十分熱情地介紹單位，而我看到真實單位的時候，比我想像中更加滿意，單位比圖片更加大，比我原先住在Airbnb的單位更寬敞，而且單位有兩個洗手間及一個更加寬闊的廚房，睇完之後，我已經想租住這個單位。

當然，再決定之前也想睇多一兩個單位再比較吓，但係再租樓網站搵極都搵唔到再合適嘅單位，所以最後就拍板租住這個單位，而價錢方面雖然比預算多了一些，但是租約暫時簽了半年，半年後再睇吓有冇更便宜的選擇，或許再探索其他城市。

在這個單位不經不覺已居住了一個半月，漸漸已認識了整間房子的人，住客來自五湖四海，有的來自非洲，印度以及一些來自英格蘭不同地區的人。他們整潔衛生，並沒有做一些影響其他人的行為，以及見到面都會打招呼，所以我對他們的印象也不錯。

4.行

最後，就同大家講吓出行方面。旅行方面主要就分成英國的本地旅行以及出國旅行。如果有留意我之前的網誌的朋友就知道我喺這兩個月的時間去過本地的牛津，白禮頓，另外也出國去過德國三天遊。

本地旅遊主要都是乘搭火車穿梭到其他城市，而我就買了鐵路優惠卡，這張鐵路優惠卡是給30歲或以下的人使用的，當在非繁忙時間乘搭地鐵或火車的時候，就可享用三份一的折扣，這些折扣驅使了我本地遊的意欲。而我也想睇吓倫敦以外的城市和小鎮的生活，有時候我會覺得倫敦的生活與香港有點相似，但我相信英國不同城市也有他們的特色和魅力，只要花一至兩小時的時間乘坐火車，就可以抵達一個文化不同的城市，使我萬分期待。