風颱進前

新聞這兩工仔一直咧報導，台灣東爿海面有一粒風颱欲向台灣吹過來。

逐家一方面咧煩惱，驚風颱來會造成真濟災害，而且原本就真懸的菜價，因為風颱的關係又擱欲起懸矣。

另外一个方面，就是國慶連假欲到矣，逐家心內擱想欲有風颱假通放，按呢就會使連續放五至六工的假。

今仔日風颱已經越來越倚，真緊就欲對台東彼爿入來台灣矣。看到天色越來越暗，風越吹越透，坐惦辦公室內底，心內那來那操煩，驚越晚風雨越大，駛車會危險；嘛會煩惱囡仔佇安親班，看無老爸老母來𤆬，會驚會哭欲揣媽媽。

五點才會使下班，毋過我的心已經飛去到囡仔彼爿，想𪜶有乖乖寫工課無？有聽阿母的話莫黑白走無？

政府拄才已經宣布明仔載南部放風颱假矣，希望這一擺風颱，逐家攏會使平安，莫有人員財物的損失。