當首爾仍是叫漢城的那些年（玖）

由高陽市出漢城對我而言，係一段漫長嘅地鐵旅程。由馬頭到市中心最大嘅三個轉車站 — 鐘路3街、乙支路3街同忠武路，最少都有十七個站嘅車程；要轉車再另計。咁長嘅路程如果唔睇書唔睇女唔瞌眼瞓，最好做啲乜？就係研究站名。漢城每個車站嘅韓文背後，都有中文嘅意思。當你明白中韓兩文背後嘅關係，但又未學識韓文，估站名就係最好殺時間嘅遊戲。

三松究竟係咪有三棵松樹？紙杻喺咪即係紙製嘅枷鎖（紙嘅杻械嘛）？舊把撥附近有冇新把撥？延新內又即係點？碌磻同碌柒有冇關係？如是者邊搭邊估，直到你見到景福宮或者安國，就知道要準備就快落車。

今時今日就話首爾地鐵站中英韓對照，唔太文盲的話都會知自己喺邊。漢城嘅年代，車站係冇中文㗎！當年我要查返晒上述車站嘅中文名，都花咗一番功夫。

星期五，中午十二點，又係落堂嘅時間。同班小魔怪講拜拜係要花多少少時間嘅，個個走埋嚟又攬又抱抱又 hi five，搞晒所有手續執埋教材所有嘢，都成五分鐘。撇除我仍然好怕細路呢一點，呢班小魔怪其實都有可愛嘅一面嘅。

今日有少少趕時間，所以連平時落堂後同 Kirsty 煲返支煙（佢係個大煙鏟，一日一定唔止一包，幸好學校同家長都唔在意）嘅例行工事都冇做就要趕住走。

因為我今日要搞工作簽證。

等咗成三個星期先搞係有原因嘅，因為呢類簽證應該係喺原居地搞，但好明顯我冇。要打茅波就自然要靠關係，講緊嘅係我老細 Esther 同移民局嘅「關係」。我唔係好清楚我老細做咗啲乜，但係聽 Sophie 講佢打咗好多個電話，確保今日我要見嘅人「知道應該點做」。

我有一種徘徊喺犯罪邊緣嘅感覺。佢會唔會叫我將啲錢夾喺申請表裡面，然後落去停車場某部車嘅左後輪碌鈴入面攞簽證？定係叫我將錢放喺垃圾桶，然後就會有人拎包嘢俾我，簽證就喺裡面？

妄想咗一輪終於到站轉車；我今次嘅目的地係：鐘閣（幾撚驚喺地鐵站趷個頭出嚟發現係中國唔係鐘閣呀）。

移民局就喺地鐵站附近，我跟住指示去到詢問處，個女職員知道我想搵邊個之後就俾咗個房號碼我，示意我上樓上嘅 office 搵佢。

上到去發現佢唔喺度，於是我坐喺門口等；點知一等就半個鐘，到我差唔多想走人嗰陣佢終於施施然蒲頭。仆你個街吖！

當我想跟佢入房傾嗰陣，佢竟然仲好意思叫我等多陣。係咪全世界嘅政府請公務員嗰陣都用同一個標準，唔仆街唔請嘅呢？我開始為我自己嘅未來而擔憂；我返咗美國之後會唔會都係一隻咁仆街嘅公墓猿？

又過多咗十分鐘，個撚樣移燈換櫈洗手食煙樘櫃桶乜撚都做齊之後，終於捨得叫我入去。

我入去後道明來意，然後將手頭上嘅文件交俾佢。佢睇咗幾頁之後，用好重韓國口音嘅爛英文同我講：「你個 case 我知道，但政策係咁，我幫你唔到喎！」然後就打發我走。

我屌！你究竟識唔識做貪官㗎？乜唔係受咗賄就要行方便嘅咩？作為一個貪官，你做乜鬼學人講清官嘅對白唧？定係我有啲咩誤解？唔通我嘅韓國歷險之旅就咁要結束？我唔做黑工㗎！俾人拉咗點算？做黑工我第日點寫落 resume？

我穩住自己嘅情緒，離開移民局，喺門口打電話俾 Esther。佢聽完之後講咗幾句韓文，好明顯係鬧人但未到爆粗嘅程度。然後佢同我講：「唔使擔心，我下星期陪你一齊嚟搞，冇問題嘅。」既然你咁講，我又信你一次。

由於預咗搞簽證會麻煩（不幸言中），我已經搵定 Ricky 幫忙代課，所以我唔需要趕返高陽。於是我沿住鐘路 4、5、6 街咁行落去，行行吓發覺點解呢度咁熟口熟面嘅？

原來不知不覺間，我行咗去東大門，上次撞到希臘鼻嗰商場附近。

一諗起希臘鼻，我竟然有種面紅心跳嘅感覺；唔知會唔會又撞到佢呢？

（待續）