有毒蘋果

2020年9月10日

今日拘捕咗15人，懷疑有組織控制壹傳媒嘅股價，但係最搞笑嘅係由調查嘅係毒品調查科，一聽落去，仲以為蘋果係販毒㖭。認真睇清楚之後，原來係由毒品調查科財富調查組負責。咁即係點呢，即係懷疑有人洗黑錢囉。而家啲人食腦都食得幾快，集體炒起隻仙股，然之後派貨，從中賺取暴利。呢次佢哋就食到正條水，不過可惜，對象係政府點名打壓嘅機構，四方八面都俾人䀹到實，冇錯財富係需要險中求，不過有啲錢你真係搵唔到㗎。

好啦警方今日高調拘捕15人，但同日亦有賊人，上午十點幾就高調咁去打劫新蒲崗金行。咁係咪啱啱遇見剛剛呢？除咗今日，琴日都有一單打劫金行，而前幾日，更有一單開槍打傷人嘅尋仇案件。呢個九月真係多嚴重罪案，又話國安法會保護香港嘅，點解會有咁多嚴重罪案嘅？

記得已前，我哋尊敬嘅警隊，久不久就跳出黎話瓦解犯罪集團，防止罪案發生。但而家個警隊，將資源投放去打擊反對正苦聲音，更有傳警隊報考人數急跌。警隊維護社會治安係天經地義，但係個社會亂成咁係邊班人一手做成。對打家劫舍嘅罪犯重手出擊，無人會責怪你，但係對待平民百性都咁重手，難怪你哋畀人憎。你哋懷疑我哋全部都係暴徒，我哋都懷疑你哋全部都係黑警。

今日傍晚七點幾開始，有人去咗荔枝角收押所出面，聲援被羈押嘅快必譚得志。咁當然梗有人去維持秩序，截查可疑人物，並叫啲市民盡快離開現場。咁唔畀面留底嘅咪599G囉！呢條條例已經濫用到一個點，比已前嘅反蒙面犯有過之而無不及。反蒙面法賜左畀班狗一個粗暴對付你，扯你個口罩落嚟嘅權力。不過同時間正苦又要你戴口罩出街，咁即係帶定唔帶呢？戴住口罩對住班狗就話你唔尊重佢哋，票控你幪面；好啦，尊重佢哋唔戴口罩，又票控你唔戴口罩；好我又帶咗口罩，見佢哋叫我除口罩，我就除口罩畀足面佢哋，又票控599G。咁即係話畀你知你出得街就預咗畀人收告票。

我覺得其實返份工嗰班狗，都會幾鍾意做呢類型嘅案，全程嘅資料手集，都係莫過於數吓佢嗌咗幾多句不同嘅口號，睇下網上登出過嘅嘢，悶就係悶啲，不過唔想搵條命去搏。難道而家會去搵命搏，四圍打聽幾時有人打劫金行咩！點知佢哋有冇槍㗎？不如等佢哋出貨嗰陣時先去拉人啦。