風劫－第四葩
閱讀時間約 15 分鐘
彼暝是遐爾快樂，啉酒啉甲毋知啥物是艱苦，若像人在天堂，無煩也無惱，不過這種逍遙樂暢的記持，對這馬的康四海來講，是加添心內的驚惶，「敢講真誠是彼暝，我無細膩講出來……」
康四海一直咧想，「毋著啊，我無彼號印象，唉，彼暗太醉矣，我醒來的時，已經倒佇阮兜的紅眠床頂懸，早就袂記得講過啥物，唉……」
光頭仔聽著有人佇後壁唉唉叫，越頭過來，就罵。
「你是咧唉啥潲，閣唉就共你喙紩起來！」
康四海聽一下，毋敢閣唉，頭犁犁綴咧行。
一陣人閣行欲一時辰，總算來到康四海講的樹林仔，殺手煞擋恬，無繼續行。
「你講伊就佇這片林仔內？」
「無錯。」康四海的眼神非常堅定，「伊當時叫我買的就是你這馬所看著的樹林仔。」
「啥貨！」光頭仔兩蕊目睭共樹林仔掃過一遍，「這片林仔遐爾闊，是叫阮海底摸針諾！」
殺手彼雙冷若冰的目睭掠著康四海金金看，看甲康四海心內起畏寒。
「無法度，我焦知影伊買佇遮，其他我正經攏毋知……」康四海講話的聲音有淡薄仔無奈，「就算提刀押佇我的頭，我嘛是毋知……」
「莫緊張……」殺手微笑，「我想你無遐好膽。」
「大的，這馬是欲嘛創？」光頭仔行到殺手身邊，「這林仔闊莽莽，歹揣。」
「若是伊無講白賊，林仔較闊，嘛揣會著。」
光頭仔看對康四海遐去，眼中透射出的光，袂輸咧講：「上好是你無講白賊，若無就愛死，恁厝內的人嘛攏總愛死。」
看著充滿殺意的眼神，原本心頭定著的康四海，開始驚惶起來，想講伊共風自我本底就無熟，時間閣過遐久，無得確人早就無佇遮，嘛有可能已經死去，就算伊無白賊，殺手也有可能無揣著人，若是按呢，就真誠衰甲予椅仔挾著，害伊規家口灶去蘇州賣鴨卵。
殺手動身，所有的人綴伊入林仔內，行無偌遠，伊目尾瞭著一个所在，彼是一條小路，倚近去看，路頂閣有禽獸的跤迹，伊全無躊躇就欲對小路行去，光頭仔緊伊一步閘佇伊頭前。
「大的，我先來探路草，較好。」
得著殺手允准，光頭仔就沿這條小路一直行，行欲半里路，有一个聲音漸漸傳過來，詳細聽清聲音對佗來，伊就按呢對遐勻勻仔行去，聲音那來那清楚，這時伊看著一間塗鑿厝，也聽清楚這个聲是誦經聲，而且是一个查埔聲，想就無想就翻頭去引殺手來遮。
無偌久，一陣十个人來到塗鑿厝頭前，康四海一下聽著誦經聲，就講：「無錯，就是伊。」
殺手的手一下擛落，光頭仔就隨去頭前喝聲。
「風自我，你免閣覕矣，緊共我死出來！」
誦經聲猶原無停，內底也無應聲。
「姦！」光頭仔看無人插伊，火咧欲著起來，「你上好共我出來，若無恁爸就無客氣矣！」
結果嘛焦聽著誦經聲，以及風聲。
光頭仔感受著殺手冰冷的眼神，心內對風自我產生真大的怨恨，自伊踏入江湖以來，從來毋捌受過這款的侮辱。
「姦恁娘咧，這馬是按怎，硬死毋出來就著呢，定佇遐誦經，是咧誦啥潲啦，看恁爸共你的喙割落來，姦！」
光頭仔氣一下就欲傱入去塗鑿厝，這時，誦經聲突然煞止，對內底射出一个物仔，速度緊甲袂赴看，彼个物仔就揬入去光頭仔的額頭，閣對伊的後頭殼鑽出來，速度攏無變慢，直向殺手去。
殺手畢竟功夫袂䆀，頭身對邊仔小徙一下就閃過，只是可憐徛佇伊後壁的拍手，遭受著共光頭仔仝款的死劫。
𥍉目之間，就死兩个拍手，康四海心臟噗噗叫，猶袂赴回神，就聽著一个跤步聲對厝內出來，越頭去看，一个人徛佇遐，彼个面容，十年無看，猶原是記持中的彼个人──風自我。
殺手看著風自我的穿插，忍袂牢笑出來，笑聲中透有深深的輕視。
「天攏變遐久矣，閣穿舊衫……」殺手輕輕哼一聲，「無照天理穿衫，是會出代誌的。」
「哈哈哈……」
「這敢好笑？」
「舊衫穿咧爽快，哪都需要換？」風自我微笑，「這馬的我，不過是一个蹛佇深山林內的庄跤人，天遐爾懸遐爾遠，管袂著我穿啥。」
「庄跤人？像你這款的庄跤人，就算軁地三尺，天嘛照常管甲到。」
「就因為我穿舊衫？」
「你想咧？」
看著風自我那搖頭那笑，康四海毋知怎樣，偷偷覕佇拍手的後壁。
「連我這種已經無插紅塵世事的人都欲管，毋知……」風自我輕輕哼一聲，「猶閣佇紅塵中浮浮沉沉的人，日子是欲按怎過？」
「廢話免講遐濟！」殺手抽劍，「兩條路予你揀，綴阮轉唐山論罪，抑是死！」
「論罪？」
「哼，十年前，共朝廷派來鎮守台灣府的丁三將軍一家刣甲光光光，這件代誌你莫佯生。」
康四海一下聽，心肝頭搐一下，心內想講，殺手來揣風自我，真正是伊所想的按呢，這時伊發覺著有一雙目睭掠伊金金看，彼个眼神，就是對風自我遐來的，伊想欲辯解，煞嘛無法度，若毋是伊，殺手欲怎會來，想想一下，也是恬恬看情勢的變化。
風自我聽著殺手講的代誌，目睭徙對康四海遐去，看伊一面著生驚，家己心內咧講：「看伊按呢，若毋是受迫，是無可能背骨，眼前這个人看起來無好剃頭，康四海的骨頭欲偌硬，應該嘛是有限。」
「你無講話，是承認矣！」殺手哼一聲，「既然承認，就緊做決定！」
「你嘛咧笑詼矣。」風自我冷冷笑一聲，「我無講話，就講我認罪，這種嘐潲話孤你講的出喙。」
「你！」殺手原本冷甲像霜仔的眼神，雄雄火著，「看來你欲揣死！」
「這嘛愛看你有這種本事無！」
殺手抽劍，喝聲：「排陣！」
其他六个拍手隨攑刀共風自我圍起來。
「哼！這是你自揣的，莫怪我無情……」殺手笑甲非常囂俳，「動手！」
殺手一下喝聲，六个拍手隨攑刀刣對風自我遐去。
風自我笑笑，無任何的驚惶，一跤踏向前，身軀雄雄倚近拍手，隨伸倒手去點拍手的手腕，迫使拍手放刀，然後，閣伸正手去搶，刀一下提著，風自我馬上橫刀，旋身轉踅若像捲螺仔風，速度緊甲袂赴看，等到會用得看清彼陣，風自我猶原徛佇遐，但是，伊的周圍已經倒落六个無命的拍手，怹的頷頸攏有一逝深紅的血痕。
看著帶來的拍手攏夆解決，殺手並無一點仔心疼，人在江湖，生死本底就無看佇眼內，來到台灣進前早有覺悟，果然，風自我無予伊失望，伊心內對目前處境，無任何的驚惶，甚至對風自我閣有淡薄仔欽佩：「伊的功夫確實親像傳說中仝款，一刀畫落，血無落地，人倒了後，血水漸出，死的人會使講無啥艱苦著，算起來嘛是好死，風自我的武功有影厲害。」
「真可惜，實在真可惜。」殺手講話的口氣中帶著幾分的遺憾。
「可惜？」風自我共刀擲佇塗跤，「可惜啥物？」
「憑你的功夫，一定有法度佇中原拍出一片天。」
「所以咧？」
「你無應該屈守佇這塊小小的所在。」
風自我共雙手背咧後壁，喙角微微仔翹起來。
「只要你綴我上京城領罪，真心懺悔你所做的一切，咒誓從今以後為天朝效力，我想，毋但你袂受罪，閣會當享受榮華富貴。」
「喔？」風自我看向康四海，「你𤆬怹來，就是為著享受榮華富貴？」
「毋是！」康四海一下聽著風自我按呢講，馬上喝出聲，「毋是按呢，我是為著……」
「保命？」風自我輕輕哼一聲，「你應該知影反背我，有啥結果。」
康四海頕頭，用真堅定的眼神，看風自我。
「我是毋知你共伊有啥約束，任何人拄著這款的代誌，啥物山盟海誓，攏嘛是變做一聲歹勢。」殺手行對康四海遐去，用手搭佇伊的肩胛頭，「若毋是拄著你，伊今嘛免驚甲咇咇掣，會當過著自由自在四界討分的生活。」
「你哪會知？」康四海聽著殺手講出四界去討分的話，心內雖然有驚著，其實嘛無真意外，「敢講你是聽馬大昌講的？」
殺手笑笑，頭頕落。
「若毋是伊一下聽著有做官的機會，就共你對伊講的話攏讀出來，我欲怎會去揣你。」
「做官？」
「朝廷派的人，而且閣是武將，好歹嘛掛將軍名，來台灣無偌久，規家都予人滅掉，這層代誌實在太見笑，天朝的面子盡掃落地。」殺手閣講落，「京城的大人一直愛台灣知府緊共兇手揣出來，但是幾若年啥潲嘛無，所以知府換閣再換，最後宣布只要會當提供兇手消息，毋管啥人攏會使去唐山做官，彼時馬大昌一下聽著就來矣。」
「就算伊去講，伊嘛無可能知影我講的是啥人啊？」
「哈哈哈……」殺手笑甲喙仔裂獅獅，「你確實無共伊講是啥人，毋過朝廷嘛毋憨仔，鼻屎大的台灣島，揣有幾个會當滅掉規个將軍府？」
殺手攑劍，劍尖對著風自我，講：「上重要的，佇將軍府予你刣死的人，怹的頷頸攏有一逝血痕，就共這馬倒咧塗跤的屍體仝款，中原的武林一下知影，眼界闊的人連想都無想，就隨懷疑是你，只是可惜朝廷一向無重視武林講的話。」哼一聲，「無你早就愛死。」
「這……」康四海眉頭愈結愈深，「憑一逝血痕就有法度確定？」
「如果是一兩个人攏是這種死法，確實真歹講，問題是一大堆人攏是按呢，就真值得懷疑。」殺手笑，兩蕊目睭無離開風自我，「而且京城的人愈來愈無耐性，連提供線索都通做官，更加免講採用武林的看法，兩條線鬥做伙，煞真正會當掠著風自我，這實在傷好運矣。」
「哼，對唐山人來講，兇手是啥……」風自我笑一聲，「敢有重要？」
康四海看著殺手的面容，已經得著答案。
「這兩條線索看起來雖然可靠，照這去揣人是無毋著，也毋過嘛無得確會使掠著真正的兇手，甚至人有影毋是你刣……」殺手停一下，閣講：「但是，對京城遐的大人來講，這款見笑代拖欲十年，實在真毋通，所以一下聽著有好的線索，就隨派人來，毋管有掠著真正的兇手，抑是無，只要有一个結果就好。」
聽著遮的話，康四海雄雄跤軟，跋倒佇塗跤，攑頭去看殺手，問：「如果我堅持講毋知咧？」
殺手烏仁徙來目尾，喙角翹甲若勾仔，回答：「我都共恁規家刣死囉，然後講這消息是假的。」
康四海笑，笑甲真無奈。
「好矣，廢話講到遮就好。」殺手看著風自我，身軀發出陣陣殺氣，「我予你真濟時間矣，生，抑死！」
風自我的態度，輕鬆自在，笑笑仔講出一句話：「有才調做你來！」
殺手一下聽完彼句話，面攏捋起來，眼透兇光，跤步向前踏出，一劍直直向風自我黜去，來到風自我面前半尺遠，雄雄變招，踅轉手腕仔，橫劍斬去，速度若像爍爁，但是這招毋是真正殺招，當劍對倒爿掃去正爿，只有掃著空氣，殺手早就料想到，所以馬上閣踅劍，對下面削起來，然後，連绁十劍斜斬出去，無成功，閣變招，那斬那黜，劍劍雄緊，劍劍奪取心喉，不時也有掌拳來助，會使講一心欲刣死風自我。
不過，無論殺手的劍招按怎雄，佇風自我的眼內若像輕雲薄霧，對付起來，涼勢仔涼勢，伊的身形袂輸是鬼影，對手的劍明明都已經揬著伊，一下看清楚，才發覺伊又閣閃去邊仔，一連三十招過去，一支頭毛嘛無夆摸著，奇怪的是伊閃過了後，有真濟時間會使反過來出招，佇彼時殺手根本無通閃，憑伊刣人的本事，一招落去，萬事完結，毋過，伊無按呢做，顛倒像等待殺手的劍。
劍來，閃過，等待，風自我的手自來都背佇腰後，跤步靈活，身影如風，面頂的笑容這時陣看起來，予康四海感覺淡薄仔殘忍，心內想：「殺手閣較厲害，嘛無法度磕著風自我，風自我親像咧看戲，看殺手有啥齣頭通展，閣親像貓仔咧戲弄鳥鼠……」
康四海的心嘛開始沉重起來，想著殺手若倒落，閣來換輪著家己。
一劍閣一劍，揬著空氣的劍，殺手的心愈來愈急，出的招嘛愈來愈雄，毋過結果無差偌濟，攏是一陣空虛收尾，聽著風自我輕視的哼聲，更加予伊心狂火著，伊彼雙冷若冰的目睭，變做兩粒火球，這時，伊停招落來，徛佇離風自我七尺遠的所在，雄雄運氣，真氣佇體內急轉，規身發出迫人的氣壓，衫褲尾攏咧擛一下擛一下。
風自我看著這種情景，收起笑容，眼神也變較嚴肅，雄雄，身軀向前一下敧，衝對殺手去。
殺手對風自我的改變，無任何驚惶，馬上弄劍，憑運起的真氣，對風自我削出幾若道劍氣。
劍氣來了誠雄，風自我笑一聲，跳去空中，向前拋一个輾斗，正跤伸直踢去。
殺手退一步，等風自我跤落地，隨共劍黜去。
這劍會使講予風自我料甲準準，伊的正跤一下踏著塗跤，就隨看著白爍爍的劍光來到面前，更加使人心驚的，是劍鋒藏劍風，劍未到，風先到，伊的胸前予劍風淡薄仔衝著，衫小可仔破去，感覺略略仔疼，不過，因為早都知影會有這招，已經有所防備，當伊影著劍光的時，身軀對倒爿閃去，同時伸出倒手，等劍一下來到眼前，倒手也點著殺手提劍的手。
殺手一心欲拍倒風自我，想講伊對空中落來必定袂赴閃，而且這劍充滿飽滇的真氣，就算劍無揬著，真氣化成劍風嘛會造成真大的傷害，到時連大羅金仙也無法度救風自我。
可惜殺手想了傷過理想，風自我的本事超過殺手所想的按呢，劍風確實衝著風自我，風自我煞無著重傷，顛倒出手來搶殺手的劍，等到殺手發覺這點，已經傷慢。
風自我一下搶著劍，完全無予殺手歇喘的機會，一逝白光若像爍爁閃過。
「啊……！」殺手大叫一聲。
康四海一下聽著殺手的叫聲，就隨看著空中濺出一逝紅血，一支正手落佇塗跤。
「死、活？」風自我共劍囥佇殺手的頷頸。
疼甲跪咧塗跤的殺手用真大的氣力擠出聲音：「活……」
「從今以後，無風自我這个人矣。」
「我知，猶毋過……」殺手揤著斷手的空喙，忍著重疼，攑頭看風自我，「證據……」
風自我笑一下，目睭對四周瞭一下了後，行對一个屍體遐去，提劍共彼个屍體的面容畫甲花花花，完全看袂清真正的面容是啥，最後共屍體的頭剁起來，踢予殺手，對伊講：「提咧好走，莫閣相揣。」
殺手原本是欲借這改機會，來拍好共朝廷的關係，甚至若是真正會當搪著風自我，就順绁提高家己武林中的地位，結果，差一屑仔就共命賠落去，這馬有通提一粒死人頭轉去交差，雖然心內感覺見笑，詳細共想，其實有通喘氣，閣會使得著朝廷的賞賜，總嘛比死好幾若倍，所以，伊隨共死人頭提咧，慢慢欲行離開這个所在。
康四海看殺手慢慢仔行過，雄雄聽著風自我叫伊陪殺手落山，一下聽，想講家己聽毋著，兩蕊目睭掠風自我金金看。
「猶閣有這支劍，順绁提轉去。」話講煞，風自我共劍射出，劍斜斜插佇康四海頭前的塗跤，但是康四海一直愣咧遐，「猶毋緊走，愛我倩八人大轎來接恁落山？」
這話一下聽煞，康四海無閣躊躇，劍拔咧就走，心肝頭一粒大石就按呢囥落來，雖罔毋知風自我為啥物放伊走，想著會當活著離開，規个人攏清爽起來，暢甲想欲唱山歌，心內想講早知影就緊咧講出來，嘛免驚甲泄尿。
康四海想講已經對虎嘴來脫身，內心暢甲若猴咧跳舞，啥知當伊才拄走十尺遠爾爾，後壁煞傳來：「等一下！」
康四海一下聽，身軀袂輸堅凍，心臟噗噗叫，慢慢仔共頭越過來。
「敢閤有啥物代誌？」康四海笑甲真勉強，心內求上蒼：「拜託拜託，我是為著保全家的命才背骨，毋是刁工欲反背，請保庇我度過這改的劫數，我一定加捐幾支龍柱予水仙公。」
「你的查某囝偌大漢矣？」
聽著風自我按呢問，康四海感覺奇怪，也感覺驚惶，想無為啥欲問伊的查某囝偌大漢，同時也才知影風自我這十年來攏有來怹兜巡巡看看，一下想著按呢，心內就沉重。
「六個月大爾爾。」雖然毋知風自我為何欲問這，康四海毋敢白賊，驚講毋著，顛倒惹禍上身。
風自我應一聲了後，笑一下，隨行入厝內。
康四海看著風自我入去，心中猶是充滿著疑問，毋過風自我無欲計較伊無守信用的代誌，心情也是真輕鬆，綴殺手離開關仔嶺。
這時，風自我嘛落山矣。
為什麼會看到廣告
3會員
34Content count
留言0
查看全部
你可能也想看
重點摘要：
1.9 月降息 2 碼、進一步暗示年內還有 50 bp 降息
2.SEP 上修失業率預期，但快速的降息速率將有助失業率觸頂
3.未來幾個月經濟數據將繼續轉弱，經濟復甦的時點或是 1Q25 季底附近
近期的「貼文發佈流程 & 版型大更新」功能大家使用了嗎？
新版式整體視覺上「更加凸顯圖片」，為了搭配這次的更新，我們推出首次貼文策展 ❤️
使用貼文功能並完成這次的指定任務，還有機會獲得富士即可拍，讓你的美好回憶都可以用即可拍珍藏！
在這個充滿喜悅的季節，讓我們一起迎接全新的一年！
在這裡，你將會發現一系列精選的泰國春節賀詞，
不僅充滿了異國情調，更加上了一把台味，保證讓你的新年祝福既獨特又地道！
私密乾癢臭是因這菌！SGS證實：豐傑私密清潔24小時有感
隨著夏天的來臨，女性出現私密搔癢、異味等問題更加頻繁。《豐傑生醫》保養品研發師指出，「加德納菌」是引起細菌性陰道感染的主因之一，當感染發作時，除了散發異味外，也會有發癢的症狀。因此，豐傑生醫領先業界，研發出可抑制「加德納菌高達99.9%」，
在台北 寸土寸金
尤其在內湖知名的科技商圈 要買棟房子
房子寸土寸金 房子的空間收納 顯得變得很重要!
一組好的拉門
需要留意的 不僅僅只是拉門的比例與線條造價
與拉門接觸 會觸碰的地方
都需要清楚 明瞭 知道這些媒介 是如何製作
所有接
上個月在異地認識了F、建立了連結，也勾動出我內在的創傷。那晚，我跟F告別，我一個人在自己的空間裡崩潰，從身體裡吐出了好多創痛，從不配得感、不敢發聲、性創傷、父親創傷，再到前世今生。
那天成為薩滿的過程，我更好地去接住自己的動物性，我讓自己的性慾有處安放，在每一次的爬行裡，我更接近並且榮耀了這
鍾離回想起來，這似乎是他第一次用普通人的身分漫步在蒙德城裡。
和徐的微風和天氣，點綴滿城的鮮花，隨風飄揚的蒲公英，自由過頭的開朗城民，更重要的是，身邊有個蹦蹦跳跳的旅行者。
「哼哼哼～～」
旅行者快樂的哼著歌，鍾離望著他，露出寵溺的微笑。
「很開心的樣子啊。」
「當
最近買了一本二手書，是彰化縣政府的美術出版品，內容收錄了國小到高中學生的繪畫作品，由於是露天二手書店買來，一本20元也不貴，但這卻是很難得的參考資料，別說得獎作品，就連一般家長的臉書PO文，也很少見孩子們的美術創作吧??也許，大人都覺得小孩只是亂畫?
買這本書多少是我拿來給小孩參考用，與其拿那
中共二十大黨代表大會，例行會進行三件事，總書記的成績報告，中紀委報告還有就是黨章修正案。
所以二十大前最新一期出版的《中国纪检监察杂志》刊发了《反腐败是最彻底的自我革命》一文。就是過去十年反腐的工作成績單。文章內公布中共自習近平十八大上台以來至2022年四月底，總共立案調查438.8萬件，470.9
「擊劍部有什麼問題不能加入嗎？」由希看著已經呆若木雞的喬成學姐道。
園內·太高興·很歡樂·懷疑是不是夢·喬成捏了捏自己的臉頰——畢竟擊劍部可是怎麼也招不到人，這下好了，三隻小白兔自己上門來，也不愁招人和廢社的問題了。
太好了，喬成心想。不過此時在大家眼中，他已經不開口呆站了很久了！
兩天前——
重點摘要：
1.9 月降息 2 碼、進一步暗示年內還有 50 bp 降息
2.SEP 上修失業率預期，但快速的降息速率將有助失業率觸頂
3.未來幾個月經濟數據將繼續轉弱，經濟復甦的時點或是 1Q25 季底附近
近期的「貼文發佈流程 & 版型大更新」功能大家使用了嗎？
新版式整體視覺上「更加凸顯圖片」，為了搭配這次的更新，我們推出首次貼文策展 ❤️
使用貼文功能並完成這次的指定任務，還有機會獲得富士即可拍，讓你的美好回憶都可以用即可拍珍藏！
在這個充滿喜悅的季節，讓我們一起迎接全新的一年！
在這裡，你將會發現一系列精選的泰國春節賀詞，
不僅充滿了異國情調，更加上了一把台味，保證讓你的新年祝福既獨特又地道！
私密乾癢臭是因這菌！SGS證實：豐傑私密清潔24小時有感
隨著夏天的來臨，女性出現私密搔癢、異味等問題更加頻繁。《豐傑生醫》保養品研發師指出，「加德納菌」是引起細菌性陰道感染的主因之一，當感染發作時，除了散發異味外，也會有發癢的症狀。因此，豐傑生醫領先業界，研發出可抑制「加德納菌高達99.9%」，
在台北 寸土寸金
尤其在內湖知名的科技商圈 要買棟房子
房子寸土寸金 房子的空間收納 顯得變得很重要!
一組好的拉門
需要留意的 不僅僅只是拉門的比例與線條造價
與拉門接觸 會觸碰的地方
都需要清楚 明瞭 知道這些媒介 是如何製作
所有接
上個月在異地認識了F、建立了連結，也勾動出我內在的創傷。那晚，我跟F告別，我一個人在自己的空間裡崩潰，從身體裡吐出了好多創痛，從不配得感、不敢發聲、性創傷、父親創傷，再到前世今生。
那天成為薩滿的過程，我更好地去接住自己的動物性，我讓自己的性慾有處安放，在每一次的爬行裡，我更接近並且榮耀了這
鍾離回想起來，這似乎是他第一次用普通人的身分漫步在蒙德城裡。
和徐的微風和天氣，點綴滿城的鮮花，隨風飄揚的蒲公英，自由過頭的開朗城民，更重要的是，身邊有個蹦蹦跳跳的旅行者。
「哼哼哼～～」
旅行者快樂的哼著歌，鍾離望著他，露出寵溺的微笑。
「很開心的樣子啊。」
「當
最近買了一本二手書，是彰化縣政府的美術出版品，內容收錄了國小到高中學生的繪畫作品，由於是露天二手書店買來，一本20元也不貴，但這卻是很難得的參考資料，別說得獎作品，就連一般家長的臉書PO文，也很少見孩子們的美術創作吧??也許，大人都覺得小孩只是亂畫?
買這本書多少是我拿來給小孩參考用，與其拿那
中共二十大黨代表大會，例行會進行三件事，總書記的成績報告，中紀委報告還有就是黨章修正案。
所以二十大前最新一期出版的《中国纪检监察杂志》刊发了《反腐败是最彻底的自我革命》一文。就是過去十年反腐的工作成績單。文章內公布中共自習近平十八大上台以來至2022年四月底，總共立案調查438.8萬件，470.9
「擊劍部有什麼問題不能加入嗎？」由希看著已經呆若木雞的喬成學姐道。
園內·太高興·很歡樂·懷疑是不是夢·喬成捏了捏自己的臉頰——畢竟擊劍部可是怎麼也招不到人，這下好了，三隻小白兔自己上門來，也不愁招人和廢社的問題了。
太好了，喬成心想。不過此時在大家眼中，他已經不開口呆站了很久了！
兩天前——