質量差，有貓膩，走心了！——沉浮佇咱日常ê外來用語，到底是按怎？（台文版）

作者：王浚耀、郭柏賢
本篇使用教育部台羅以及推薦用字書寫。

自細漢開始，咱真濟人攏bat看過各種卡通。毋知佇恁ê記憶內底，上有印象ê是tó一齣呢？敢有想過，遐ê卡通除了hōo咱笑聲kah回憶以外，mā有可能tsah來koh較深入ê影響？

舊 (2021) 年七月，一寡美國ê家長開始反映，世界有名ê卡通《粉紅豬小妹》(Peppa Pig) hōo in ê囡仔講話開始有英國腔口kah用詞。譬如講，這寡有看過《粉紅豬小妹》ê美國囡仔，會開始用英國腔口ê「mummy」來代替原本美國腔口ê「mommy」發音；in會開始使用「petrol station」等等這寡khah英式英文ê詞。甚至tī twitter頂懸mā出現「#PeppaEffect（佩佩豬效應）」ê hashtag，可見，這ê現象tī歐美世界引起了真大ê討論。[1]

若án-ne，應該按怎解說tsit款ê "Peppa Effect" khah好？

頭先，美國兒童tsit種tī語言使用當中，koh透濫母語以外ê其他語言變體ê狀況，tī語言學內底hőng叫做語碼混用 (code mixing)。上簡單ê例會使用台灣人時常tī生活當中使用ê「晶晶體」來說明，tī華語內底透濫tio̍h英語ê情況就是一種語碼混用。譬論講美國兒童因為影音媒體ê影響，tī美式英語內底濫tio̍h英式英語，mā是語碼混用ê實例。

Koh，翻頭轉來看台灣，lán生活tī多語言ê環境，加上媒體資訊傳播ê原因，lán koh khah容易發生華語、本土語言，甚至是捌國語言、北京標準普通話[2] ê語碼混用。若án-ne tī-leh現此時網路快速傳播ê情境內，lán是m̄是mā有屬於lán ê "Peppa Effect"？

對岸中國ê媒體平台興盛，親像「微博」、「抖音」、「小紅書」等等，tī台灣ê使用者攏有一定程度ê數量，kā真濟中國華語用語tshuā入來台灣。tī lán ê日常生活當中，加減攏會tī語句中講過抑是聽過譬如「走心」、「牛逼」等等ê「支語」，kā台灣華語kap中國華語ê詞語碼混用，甚至直接造成語言ê轉移。

恁可能會感覺好奇，是按怎咱以早所看ê遐濟歐美動畫，攏無造成啥物用語上ê轉移，khah就美國ê囡仔會受著英國影響呢？其實，正是因為語言相互接近，才koh較容易透入去雙方ê日常話語內底。中國佇過去幾十年內，定leh執行強力ê普通話政策，但是福建、廣東tsia--ê佇沿海地區ê電視台，猶原保留較完整ê閩南語、粵語節目，當中攏有顯示出針對台灣、香港這類目標地區，利用語言成做軟性工具、實現感情連結甚至文化統戰、政治宣傳ê種種目的。[3] 總括來看，台灣kah中國ê華語、香港kah廣東ê粵語高度相通，台語主流腔口kah廈門話、[4] 台灣客語四縣腔kah梅縣話[5] 基本上mā會使互相理解。現此時咱所看著ê是中文、華語內容有tsah來較濟影響，毋過就算未來咱行向本土語文蓬勃發展ê時代，外來ê威脅mā bē輕易消失——對岸kan-na需要共in現有ê「方言節目」資源加放較濟，kâng款會使造成真大ê影響力。想像一下，十年後ê台灣，敢會出現較濟倚福建氣口ê「台語」？Mā是有可能ê代誌。所以，這項議題頂面ê重點，在來無應該是khǹg佇語言選擇爾爾，內容本身mā需要加kā注意。

按以上所講，台灣所面對ê潛在危機並毋是透過替換語言就會使解決遐爾簡單。到尾，咱mā轉來看問題ê源頭——當初咱是按怎會hōo彼款ê內容吸引？外來ê物件敢一定較bái？其實，照語言學層面來看，語言接觸本身是誠正常、無特別負面抑是正面ê現象。看著新ê物件，咱往往是根據伊ê品質、實際幫贊ê情形來決定敢beh接收，顛倒毋是因為tó一種語言。中國ê網路生態圈內底mā有親像「知乎」這類有足濟優質智識ê所在，無必要因為國家界線，就隨完全否定一切。所以，咱更加需要思考ê部份，是如何提升、增加在地ê內容呈現，才通佇市場頂面成做有力ê競爭者。Tsit-má tuè著本土語言文化復興ê潮流，有愈來愈濟新奇兼趣味ê在地母語創作（音樂、戲劇、VTuber等等），攏值得逐家kā支持，hōo in沓沓仔發展好勢。無定著佇未來，咱就會看著台灣ê文化開始穩定向外輸出，為全世界ê文化交流增添koh較豐沛ê色水。