「Apsara 肥肥， oh oh oh Apsara 肥肥，

Apsara 肥一肥，oh oh oh Apsara 真係好肥。」

隔了幾星期，美顏肥肥再來搵Apsara，

美顏肥肥：「好掛著你，最近我在學校當義工，不能經常來探你 !」

Apsara：「喵 !」

美顏肥肥：「我見上次個頑皮學生，傷了手返學，我問佢發生什麼事，佢又唔肯講，所以我決定同學校反應要成立一隊家長義工隊專門去照顧頑皮學生，而我便自動被選為家長義工隊隊長。」

Apsara：「喵 ! 喵 !」為美顏肥肥打氣。

美顏肥肥：「上次個頑皮學生叫小安，有警察來過學校搵佢問話，因為有同學家長報警，話佢偷竊，小安媽媽就擔心到病左。」

Apsara：「喵 ……」什麼都知的Apsara都很有禮貌回應美顏肥肥。

美顏肥肥：「有什麼方法使頑童變乖？」

Apsara：「喵 ……喵 ……喵 ……」

美顏肥肥：「你都話難？係囉……學校著重谷成績，家長亦只配合學校一起谷成績，其實小朋友願意學習的話，何需要去谷成績呢？連返學都使學生有壓力……唯有我去比多啲關心給小安……」

Apsara：「喵 ……」

美顏肥肥：「小安又唔喜歡和同齡同學相處，和我囝囝傾唔埋……，我老公又話我多管閒事，但如果我唔理小安，佢會唔會變虐貓狂……佢上次追打你，好兇狠的樣子，我諗起都擔心，唔可以唔理佢……」

Apsara很同意：「喵 ……鳴」

Apsara讓美顏肥肥盡情傾訴心事，因為她在家很寂寞，囝囝是學霸，每天忙著溫習，而老公熱愛打機，放工回家只打機不說話，如果老公出聲都是厭棄這樣厭棄那樣，所以美顏肥肥在家之時都感到很悶，但某年某天，Apsara在她眼前出現，她好似見到好朋友一樣，開始喜歡去完街市的時光，因為可以和Apsara傾計，Apsara療癒了她的心。

德哥經過，一直在細心聽著Apsara 和美顏肥肥的對話，不禁心裡想，原來貓叫不單只是：「喵」單聲，而是有很多種類形……

德哥好奇問美顏肥肥：「你好，我係貓義工，請問你係米識同動物溝通？」

美顏肥肥認真回答：「當然啦！我識了Apsara十幾年啦！Best friend！ 」

德哥：「吓……Apsara係老貓嗎？」

美顏肥肥認真回答：「我生完囝便來這裡買餸，囝都10歲了，當時Apsara已經不是baby 貓，已經同現在一樣，所以Apsara大概超過12歲了！ 」

德哥：「吓……Apsara肥左十幾年？」

Apsara喵：「肥你個頭 !」

德哥：「對不起」心想又聽到「肥你個頭 !」莫非一直都是肥師奶的聲音……

美顏肥肥：「什麼對不起？Apsara肥左十幾年有什麼問題？咁可愛……」

德哥繼續問：「即係你和貓溝通了十幾年？」

美顏肥肥：「主要和Apsara溝通，佢係與眾不同的貓，其他貓無佢份氣質……唔講了，要回家煮飯，請問貓義工你貴姓？」

「叫我德，你呢？」德哥都希望日後跟肥師奶學習與貓溝通。

「我姓顏，人地見我肥肥地，便叫我顏肥肥，有些人話我靚靚地，所以加「美」字在前面，便叫我美顏肥肥，哈哈」一邊講一邊笑得好開心。

德哥覺得肥師奶好有趣，會長編大論來自我介紹。