守 tī 愛情青紅燈 ê 交通警察 免管來客年歲幾十冬

前幾日仔 goán sió-mōe, 雄雄 tī Messenger 傳訊息予--góa, kā góa 報告講，天海祐希 bat teh《マッサン》插花仔（Góa 本身 khah kah-ì 台灣 ê 華語劇名翻譯《阿政與愛莉》，予人感覺兩个男女主角 pêⁿ 重要），演一个替主角エリー（正名 Elizabeth）醫治看病 ê sian-siⁿ. 雖然講 góa khah-chá, m̄ bat 為 tio̍h 天海祐希 專工收看《政 kah É-lih》，m̄-koh bóe-á 聽 goán sió-mōe án-ne 講，hit 時 góa tō teh siōⁿ, 原來 góa chòe 一个天海祐希 ê 戲箱，chit lō 代誌已經四海通人知--lo ! wwwww

六月 ê 上尾一工拜六下晡，來到國家電影及視聽文化中心聽丁文棋先生擔任講座來賓。心內話講，前一站仔有收看《心所愛的歌》ê 朋友，可能感覺 chit 場根本 tō 現場版本 ê 節目！XD 因為主持安排 mn̄g chín chōe 節目頂頭 bat 講 kòe ê būn-tôe. Chhan-chhiōⁿ tng 聽眾面頭前、學 khah-chá ê 廣播節目讀批信；Sī án-nóa 有《愛情青紅灯》chit 个節目？Koh 來講 tio̍h《天天二四點》，che 名 sī án-nóa 來--ê ?

M̄-koh koh-khah 早前，有 tòe tio̍h 丁文棋先生聽伊 teh 主持廣播節目，a̍h-sī 講有 teh 收看「新天地民俗台」、《古早味ㄟ台灣歌》chia--ê 電視節目 ê 兄姊朋友，可能感覺總算有一工、會當親身聽丁董--ê 分享、伊 chòe chit 途 ê 一寡經驗，sī 真歡喜 ê 代誌。Che 感想實在 sī 有影，在人去變化。

Tàm Q&A ê 時陣，góa 本底 mā siōⁿ boeh 請教一个問題。Tō sī 講 góa 本身 teh 經營網路社群媒體，iá tī Sound On 發表 Podcast, che 無形中 gōa-chōe 人 teh 追蹤、gōa-chōe 人 teh 收看收聽，lóng 有後台照起工、隨時 kā goán 報告。Chún kóng chhiōⁿ khah 傳統 tām-po̍h-á ê 電視，mā koh ū 專門系統 teh 計算收視率。M̄-koh khah-chá 廣播電台 tng-teh 衝 ê 時陣，到底 in 愛用 sáⁿ-khoán ê 指標落去看待講，che 節目有衝 a̍h 無？Sī gōa-chōe 聽眾寄批予電台？a̍h-sī chhiōⁿ bóe-á 算有 gōa-chōe 人敲電話入來？因為 góa 對廣播 ê 經營史，有影真外行，毋才 siōⁿ boeh 了解 chit lō 代誌。

M̄-koh 一爿 sī góa khah 小面神，一爿 sī chiâⁿ chōe 人 boeh 提起 in ê 看法，所以 lo̍h-bóe-á góa lóng kā mn̄g ê 機會讓予 in. 其中，有一位有志，tú-hó sī「 台灣狂噪之聲——林勝韋音樂評論站台 」ê 作者，講 ka-kī tiāⁿ-tiāⁿ teh 收看《古早味ㄟ台灣歌》，góa tī 邊仔聽 tio̍h 隨 kā 拍噗仔 XD Bóe-á koh 一位現場觀眾，mn̄g 丁董--ê 講，哪會無 koh 予《愛情青紅灯》chòe--loeh ? M̄-koh 伊丁董--ê kā goán 逐家講伊 ê siōⁿ-hoat, 因為 chín in ê TA khah chōe 老大人，（哪有？！「台灣狂噪之聲」ê 作者分明 tō 有為 koh 有腹內才情 ê 少年兄 w）nā koh 講 khah 少年輩 ê 愛情、時行 ê 議題，對序大來講，ná-chhiōⁿ 無合，koh-khah án-nóa 講，照一般人 ê 看法，有歲 tō khah bōe 去 siōⁿ he 感情 ê 代誌……。

頂半年才 tú tī-leh Netflix iá-ū KKTV 頂頭，kā 天海祐希搬演 ê《緊急查問隊》（日語：緊急取調室）四季 lóng 看予 soah. 原底 góa siōⁿ-boeh 另工 chhōe 機會 chū-thâu chì-bóe kā 逐集 ê 看法寫予 chiâu. M̄-koh 拜六 tú-hó 聽 tio̍h 丁董--ê teh 講老歲仔人無感情需求 chit lō 代誌，予 góa siōⁿ 起《緊急查問隊》第二季頭一集 ê 劇情。

順 góa ê 印象翻頭 kā siōⁿ, 有一个專門 teh 替郵便局送貨物 ê 運將，tī-leh 日頭赤焱焱 ê 時陣，hŏng 發現被人毒死倒 tī-leh tho͘-lá-khuh 內，身軀頂 koh 莫名其妙 tī 好天 theⁿ 一枝雨傘。

Tī-leh 案發現場有一个「阿婆」kā 警方自首講人 sī 伊刣--ê. Chhím 調查 ê 時，hit 个「阿婆」bat kā 逐家拐講，伊 sī 為 boeh 替樓頂 ê 厝邊 am-khàm 罪行。因為樓頂 ê 太太 kah hit 个有某囝 ê 運將，偷偷仔私通往來，由愛生怨恨，毋才 kā 運將刣予死。

毋過 chit 个「阿婆」講，伊本身 kah hit 位婦人人感情 chiâⁿ 好，koh 真寶惜伊兩个囡仔 án-ne-siⁿ, 所以甘願出來擔罪，mài 予囡仔人 hiah 細漢 tō 失去阿母。橫直伊 kan-na 一个人孤-khu̍t-絕種，koh tàm 厝食 kah 老，mā 無意無思。

Tī-leh 調查 ê 過程當中，列位警察發現，伊所講--ê 刣人理由，lóng sī 白賊話，目的 sī boeh 陷害 kah 伊有冤仇 ê hit 个厝邊太太。嫌犯 koh bat 翻 kúi-lo̍h 改口供，予規个查問團隊 sa 無 cháng. M̄-koh 總講一句，góa 到 taⁿ iá 印象深 ê 一段，tō sī 講 hit 个嫌犯 bat tī 女主角真壁有希子（天海祐希搬演--ê）面頭前 kā chhiàng 講，予伊叫 chòe「阿婆」其實真無禮貌，mài án-ne kā 叫。
（Góa 頭前毋才 ē 添「」ê 符號）

Chit 个嫌犯有一段口供，bóe-á koh 改講，sī 伊 kah 運將大兄有感情 ê 糾紛。雖然伊 khah-chá tō 死翁 koh 死囝，m̄-koh 伊對運將 m̄ sī hit 款 chhiōⁿ 老母對囝 ê 疼惜，顛倒 sī 一个女性，對少年囡仔兄 ê 愛慕；sáng 知影 chit 份感情 m̄-nā 去予運將蹧躂辜負，mā 叫警察聽 to̍h 感覺愛笑，笑講一个序大哪會 koh siàu-siōⁿ 追求愛情，siōⁿ kah 愛中生恨，予 tòa tī 心中 ê 恨，漸漸發仔 chòe boeh 刣人 ê 爛根……。

雖然 chia--ê 口供 chōe kah ná《羅生門》kāng-khoán, 予人 bū-sà-sà, góa 感覺，真相如何已經 m̄ sī 重點，嫌犯去予「警察 tōa--ê」眾人嫌講，食老--ah 對愛情之事應當免 siōⁿ, chit 層代誌才真正害 góa 感慨 chiâⁿ 深。Sī sáng 講，老大人 bōe-tàng 對愛情有向望？無論有追求成功--無，無論結果好 a̍h bái, 對愛情有需求 ê 權利，sī 無 teh 論年歲--ê.

翻頭來講丁董--ê siōⁿ-hoat. 雖然講 chòe 一个 sī-sòe, tàm chia 評論 chia--ê 物件，ná-chhiōⁿ ka-kī 四兩鈗仔無除，m̄-koh góa 猶原感覺，nā 因為電視台專工 kā 序大 tòng-chòe TA tō lia̍h-chún in 毋免《愛情青紅灯》hit 款心適 ê 節目，甚至 kā 影像化，坦白講，有 tām-po̍h-á 可惜。而且 chit 个節目 m̄-nā bóe-á 有 kúi-lo̍h 个節目 the̍h 來 chòe 參考，伊 ê 影響力 chōe kah, 到 taⁿ iá 予人 tī bô kâng 媒體，看 tio̍h 伊 ê 形影。

Chhiōⁿ 公視台語台 chòe podcast, in ē 開放觀眾來批，tak 禮拜叫主持人替 in 讀出批中 ê 心聲。Iá-ū 王若琳 bat 向《愛情青紅灯》「獻出對先輩 ê 尊敬」，ka-kī koh chòe 一个《愛情霓虹燈》。Chia--ê 現象 tō sī teh 證明丁先生本人 tī 廣播界幾十冬，對娛樂界、對媒體 ê 貢獻有 gōa-nī-á 深。