🎧 聽《拋荒的故事》開講回顧 2025年8月底的拜六，日頭當豔，風聲真響，我綴著台文人士的跤步，踏入高雄文學館，欲聽阿仁師講「拋荒的故事」。 文章起鼓前，在此先工商回顧引言：「阮大學畢業了後，人生頭一場參加的文學研習營，就是佇高雄文學館！」he是2007年由高雄港都文藝學會連紲三工主辦的活動。當時我報名的動機毋但為著文學，上主要是我的工課經驗大部分佇學校機關，想欲參考別人是按怎舉辦活動的。無料想著：自此以後，開展了我研習的歷程，主題uì文學延湠到文化，學習目的嘛對初始的場所布置，一步步提升到後來的司儀、主持、講師、口譯人員的口條觀摩。可以講，是馬不停蹄的精進。研習聽課累積到疫情前的2020年，起碼參加過大大細細百外場的研習liáu！ 遙想2007年高雄文學館二樓教室的華語文學世界，到今坐佇二樓改建的「沙龍」學習空間，館方的多元講座眼界漸漸擴展到台語、客語、原住民語等等的臺灣文學線路。這時，咱對臺灣文學的參與看來才拄開始，但是陳明仁老先以及真濟せんぱい（前輩），早早就已經將咱放去捒的記持，一字一字抾踮入簿仔紙nih，有待咱有緣人拍開這場歷史的心門。 阿仁講，莫叫伊「先生」！我想，除了伊毋認老的囡仔性，he大概也是伊看輕「威權」的一種風範吧！（或者是接受tio̍h美國人直接呼名的親切文化……） 若欲問講我上欣賞阿仁這場演講的佗一部分？我會講是伊「多元語言」的豐富性。當然，毋管是閱讀抑是聽人講說，咱難免會uì其中走揣對自己的認同：我大學主修英文，捌學過日語、法語，如今對台語、客語，以及原住民語的關注，該然嘛是百面的。 在我認為，推廣本土語言的目的，毋是為著自我封閉，顛倒愛透過多語言的使用，有所交流變通。阿仁雖然有真明確的政治立場，毋過伊的演講過程袂刁工排除華語，伊會針對情境以類似外來語的串聯來描述。講著小學仔時陣伊予教官、校長訓示的追想，阿仁用伊真可愛的話感來傳達這份情緒——進入教官、校長的對話情境時，阿仁將in的「捲舌音」（華語）腔調，模仿kah真「維妙維肖」（華語）；但是回到生活當中以台語為主流的演說時，伊猶原選擇以帶有「台語腔的華語」穿插作台語的配角，致使講話的調勢聽起來是自然佮合的。 阿仁捌出國讀過哲學相關的研究所，伊用「May I have your name?」、咱按怎稱呼？咱食飽袂？——提醒逐家，應當注意講話的禮儀性。「Maybe it's a good idea.」（這个意見聽起來袂䆀），是委婉表示我無同意。 伊認為「不要講話！」（華語）這句命令，予咱的學生囡仔話語權受著限制。美國話的「安靜」（Be quiet!）、「欲講話的攑手」（Please raise your hand.），攏是對人權的一種尊重。 阿仁的經歷豐富，這是伊寫作題材的靈感來源。伊真認同家己平埔族的身分、對女性真敬重……這寡元素會使佇伊的《拋荒的故事》作品內面感受著。伊寫作的目的毋是欲賣冊，伊鼓勵逐家，自由寫出家己的想法，毋免受著寫作規則的限制。莫管別人按怎講，寫你想欲講的、你的意見。 阿仁講，雖罔伊寫作毋是為著欲趁錢，不而過若是有人因為家己的作品，有所啟發，伊當然嘛是真樂觀其成。 尾手，本文謹此答謝這場由「台文博覽會」舉辦的文學活動；主持人是協會人員其中的一位少年家。這規冬我對青年台語講師的氣口總是感覺無sann適應，但是演講牽涉的是個人的表達能力kap台風穩健，若準換我上台，凡勢嘛無偌gâu。這次的主持人看著有sîng是受過台文系訓練的青年。若欲講伊的台語表現有啥麼缺點嘛是無，相信伊嘛真滿意伊家己的表現。我個人聽讀這批當代意識青年所使用的語詞觀感：in蓋強調「白話」，袂愛用kap華語相通的古典文辭。順紲之言：這場活動的少年主持人氣口，引起我的猜想——伊若不是對司公主持真興學習，就是厝nih可能有人是做道士這途的。毋管按怎講，語言是自由的，每一个人攏有家己講話的特色，嘛會使歡喜做主追求佮意的風格。 秋風微微，日光淺淺，講座佇彼工下晡圓滿，真濟人依依難捨，期待再相會。對我來講，uá二十冬後的今天，閣再坐佇仝一間文學館，聽著阿仁師開講，才發見阮的文學路原在開展、猶袂拋荒。經過歷史光影、語言文化的洗禮，我知影——咱拋荒的，毋是土地，是記持；聽候開墾的，毋但語言，閣有咱初初的心。 文／薩菈琳 2025年9月1日 撰寫 #陳明仁 #拋荒的故事 #高雄文學館 #臺灣文學 #台語書寫 #台文博覽會 #打狗台語文促進協會 #高雄港都文藝學會 #文學營
