裝修名人堂 Davis 裝修每天都是時間競賽 協調各部門令工程順暢無阻

穿身筆直俐落西裝的Davis與哥哥及父親共同支撐著30年的家族生意。Davis愛日惜力，認為善用時間是裝修行業重要的一環。

10年前很多公司「唔包料」，和客人出去買出去睇。就Davis觀察這是另類的浪費時間，因為客人第一次裝修對建材基本上沒有概念。揀磚的時間實際上很短，但陪同和講解則耗費多時，「睇3個鐘磚，實際揀磚其實只有15至30分鐘。」 因此走在業主前面的裝修界，他們的「一站式」裝修服務繼而面世，一個完整的配套對客人百利而無一害。除了自家建材產品能縮減挑選建材的時間，更是有教育作用。 「有啲公司報價唔包料，客人睇落去就以為自己好啱budget，但其實佢唔知道磚鋪全屋，最平都要萬幾蚊。冇概念要全盤數去睇，後來逐樣逐樣買先知自己爆budget，例如磚用左三萬，其他門啊、潔具啊點擠啲錢出黎呢，變咗前面買嘅建材好靚，後面啲品質未必好，亦用好多時間精力去搵啲平嘢。」 「我哋包磚、傢俬、潔具、爐頭、門，等個客全盤數有個概念，連工包料幾錢，變相佢同我哋講想自己買料嘅時候，客人個預算都可以準好多。」 他的「一站式」裝修服務可說是帶領著裝修界，自從推行了這套餐服務，過兩三年就有人跟，旺角區不少裝修公司相繼抽出資源做包料套餐。

工序無間接軌 高效全靠協調 觀察、統籌、計算和預測，每一項都是Davis 10年工作經驗所得技藝。「做設計師時冇理咁多工程項目，每日都係度等每個師傅完成再通知下一手。而家我身為協調者就係可以預早安排好，做做下就會有預知嘅能力。」 「例如拆嘢你預佢3-4日，但原來最後拆2日搞掂。如果你冇預測同觀察力，等拆完先約客去睇，人哋唔得閒的話，就會搞到工期拖延，只可以做嗰啲對個工序冇乜大幫助嘅瑣碎事。」 適當地推動員工，加上提早約好時間，再跟手提早訂貨，使工序流暢得有如無縫接軌。 「例如以前廠佢知道自己今日會做好，但唔會同您講，總要做完先通知你，我先可以再安排俾指示。而家，每個部門都要提供一個預計時間，耐咗唔緊要，耐左一定有你嘅原因。快咗都要講聲，我就即刻可以安排下一part追上去，將你贏咗嘅時間繼續贏落去！」

建立三方橋樑 要令事情更順暢，培養員工也非常重要。Davis作為協調者，為師傅、設計師、廠方搭橋粱，讓他們明白工程夠Smooth對大家都有好處。「工程夠Smooth師傅會得到客人嘅賞識，設計師可能今次接20萬嘅單，做得好客可能介紹個50萬單嘅朋友俾你。」 「上廠參觀係我哋嘅必要活動，師傅設計師可能會對廠有意見，會覺得想廠點做點解做唔到，但上去參觀一次就明白，上遊下遊都有各自各有困難，大家同一個團隊就會體諒多啲。」

想裝修的人有甚麼要注意？Davis覺得「坦白」最重要。預算超過要坦白提出，設計師才可以認真幫客人重新計劃，按比例合適地縮減預算。 「曾經遇到客人，我哋就用佢提出嘅價去計盡，去做靚佢，但佢唔坦白講佢提出嘅價其實係超出budget。後來budget爆左，佢要做返一樣嘅野，但唔肯減內容，消耗咗好多時間係「挑機」上面，對工程完全冇幫助。」 「只要坦白超出預算，我哋一定會同你再計過，例如唔用訂造傢俬，用返啲現成又可以平一筆。將來有返錢，再搵返我訂做都可以。我哋知咩係必要性，客人如果固執地叫我哋將必要性嘅工程唔做，例如水電做少，會令成個工程有機會拖延，出問題，傷害雙方感情，更加難以去談及責任。」

本文章內容及圖片均由本專欄作者提供及上載，並不代表本公司立場，如有任何版權問題，請與本公司聯絡。關键字： 裝修佬; 裝修; 故事;