2023 躝啦！ | 歡迎更差的2024

圖片來源︰Instagram

今次會用廣東話寫呢篇分享，因為想講嘢。

2023 躝啦！

圍方保安完美示範咗點樣可以叫自己唔想見到或唔鍾意嘅嘢消失，本公子十分欣賞佢嘅霸氣，所以有樣學樣，叫2023快啲躝！唔識躝就爬啦！

2023，對於我係好差嘅一年，發生好多天然嘅不幸或人為嘅不幸，如果我唔係信耶穌，我會懷疑今年係犯太歲。因此我好有衝動去打太歲一鑊。當然我無咁做，因為我信耶穌，而我唔會夠佢打，亦唔會打佢，要愛佢架嘛！而且耶穌一早就講咗︰你們有苦難... 人哋都提咗你，咁你唔夠醒目，無得怪佢。

如果過咗2023，係可以刪除一啲記憶或者發生過嘅事情，我都真係好希望可以有咁嘅事。當然你唔係大雄，我又唔係多啦A夢，所以你都係去睇多啲AV或者發夢好過。

2024 將會更悲！

係，你無睇錯，我100%肯定2024將會更悲。因為2023已經知道，仲有好多「蘇州屎」會帶去2024。淨係諗到層樓賣唔出，又供到斷氣，但又唔想賤賣，就已經要拎定胃仙U。2024個市一定會更差，全世界都係咁講。

我信耶穌，當然信聖經。上帝預言咗，世界只會愈來愈衰，最後衰到一個地步，耶穌會返黎，接走一班人，到時有冇你份，我都答你唔到。而我，都唔知捱唔捱到果一日。但無論係點，重點都係，世界會愈來愈多問題。各國會唔會打仗？氣候會唔會反常？呢啲似乎都已經唔係我哋可以控制。

2024，可能除咗粗口之外，有更加多嘢唔可以講，果個關鍵字清單會更長。你唔小心無講一啲說話，可能就會畀人罰抄悔過書。呢啲日子，我明，但我唔適應。But Fine，要來就來，又係控制唔到嘅嘢，除咗自己躝，仲有可以點？

而家仲有6分鐘就2024，我都係去瞓，倒數果啲活動，留返畀啲小朋友做，一臉無知、天真無邪、好True好Pure果啲，佢哋會好開心咁合皮扭耳！

你係咪好後悔睇咗呢篇厭世文，係，我係明陰你，吹咩！