以每個角色用第一身去寫小說

近來愛上Karen McManus 小說，第一本睇One of Us is Lying 後就好快咁買左三本佢嘅小說，總共好似寫左6本。佢嘅讀者對象應該係young adults, 屬於犯罪小說，不過英文好淺白，基本上唔使查字典。睇左佢三本小說都係以各個角色第一身去寫每一篇。

而家好多作者都用呢個方式去寫，例如犯罪小說或 mysterious 類，用主觀手法去形容個情節增加県疑性。日本小說更加多呢種方式，我一直好鍾意湊佳苗嘅書，佢大部分亦係用第一身方式寫。但近來睇左一本幾特別嘅小說叫往復書簡，佢係用幾個角色互相通信去講個故事。如果只用每個角色第一身去寫，每個角色雖然有唔同觀點或心情，但講嘅都大致上係佢哋認為嘅事實，但用書信，每個角色寫信嘅內容未必係真心話，而且角色之間有互動，咁增加咗個難度去估個事實同結局，所以結局幾出人意表！