逃生

以前覺得災難應該唔會發生喺自己身上，空難火災地震離自己好遠，命中率比中六合彩更低(當時六合彩仲係36個字)。

九十年代外遊多咗，係咁意注意下機上逃生知識，但都只係留意下逃生門喺邊，數下度門離自己幾多行座位，萬一無電全機黑到睇唔到嘢都可摸住椅背數住行數揾出口。

到呢個星期發生羽田機場嘅意外，啲人討論有乘客想攞行李走夠唔夠時間呢？原來好多國家限定飛機失事，機組人員要盡力喺90秒內疏散所有人離開飛機，因為如果飛機著火，只可承受兩分鐘燃燒，之後會爆炸。兩分鐘咋，走得切都命大，今次意外全機人趕得切兩分鐘內全部離開真係唔係好彩，多得大家守秩序保持冷靜兼合作！！生命最緊要，仲攞乜鬼行李。