方格精選
當首爾仍是叫漢城的那些年（卅陸）
閱讀時間約 10 分鐘
喺知道自己有機會嚟韓國教書嗰陣，我已經喺腦海中預演過所有會發生嘅情境；只不過，預演還預演，無論我點預演都好，我點都估計唔到，我眼前即將發生嘅事。
呢個故事，又名《Chloe 廿四小時》。
星期四黃昏，長漢坪京德大廈附近某韓國菜館。
長漢坪，莫講話香港嗰班「韓國達人」一頭煙，連好多漢城人都未必去過。喺九十年代末，長漢坪係一個喺漢城東部都幾老舊嘅區，好多山寨廠同工貿樓。除此之外，就係喺橫街窄巷入面、數之不盡嘅價廉物美燒烤餐館。
作為一個教師，你可能會預計到，有朝一日你會為咗個學生去劈友；但你點都估唔到，你會同你個學生去劈酒。
同檯嘅有李先生，我嘅學生，五十零歲，某中小企廣告公司老闆；尚民，廿零歲啩，李先生嘅助手，每次李先生上堂前，佢都會打俾我 confirm appointment；Igor，俄羅斯人，三十出頭，李先生嘅業務經理。
飯局係李先生約嘅。自從我喺 Michael 手上接收咗佢啲學生之後，李先生就一直話要請我食飯；佢客氣到我唔好意思再推，唯有應約。
席間，我終於見識到，韓國階級觀念嘅實際用途。喺開始飲酒之前，李先生問我嘅年紀，然後問尚民嘅年紀；原來我細過尚民一年有多。但係李先生話我係外國人，兼係佢老師，所以「尚民由你嚟啦」。
原來，韓國男人出嚟應酬，有例會搵出當晚同檯年幾最細嘅人出嚟，負責斟酒斟茶遞水叫伙記之類嘅雜務。當晚，我睇住尚民成個阿四咁，走走糴糴斟酒敬酒搵伙記叫嘢之餘，酒過三巡後，甚至要扶已經飲到大大哋嘅李先生去廁所，差在唔知使唔使幫佢𢭃住屙。
我望住佢，心裏面講咗句：「來生不做韓國人」。
韓國佬敬酒，係你遞你杯酒俾我，我飲完後又遞返我杯酒俾你，係咁遞來遞去。飲得幾 round，邊隻杯係邊個已經唔清楚。我只能暗暗希望，韓國 소주 （Soju/燒酒）有火酒嘅消毒效果。
晚上十點，仍然係長沙灣；唔係，長板坡；呀唔係，係長漢坪。
飲飽食醉（仲係飲多過食），天下無不散之水。佢哋問使唔使幫我截的士，我話唔使，於是佢哋就走咗，剩低我自己一個。
喺街邊企咗一陣，以為會好啲，點知啲酒而家先上頭，越企越暈，於是我坐咗係路邊；燒酒果然名不虛傳。
當我諗緊好唔好瞌陣等酒氣過嗰陣，手機響起。
「蠢蛋，瞓咗未？」Chloe。
「Chloeeeee……」我僅餘嘅理智話我知，係 Chloe。
「蠢蛋你冇事吖嘛？」敏感嘅 Chloe 應該聽到有唔妥。「你飲咗好多酒呀？」
「Chloe……Chloe……」
「你喺邊呀？我嚟搵你吖！」
「長沙灣……」
「蠢蛋你講乜呀？我聽唔明呀……」
「長……長漢坪……坪……坪……」韓文個「坪」字（ 평 / pyeong ）飲大咗好難發音，我 pyeong 來 pyeong 去碰唔出。
「長漢坪邊度？你知唔知？」
「京……京……京……德……京德……」韓文個「京」字（ 경 /gyeong ）飲大咗都好難發音，我 gyeong 來 gyeong 去都開唔到槓；pyeong 完再 gyeong 就算冇飲酒都講唔掂。
「你唔好亂走，等我，好唔好？」
「好……Chloe……」
唔知過咗幾耐，我聽到停車聲，然後有把女仔聲問我：
「Alan 你點呀？係咪好辛苦？」
「Chloe……」
「我同你返屋企。」
「은미 ……」都好，我飲大咗都仲講到「銀美」兩個字。
根據 Chloe 事後話返俾我知，我當時不停嗌住佢個名。佢同我搭的士返高陽，我全程伏咗喺佢大脾瞓。佢仲話我曾經錫佢同向佢示愛，不過我係唔會信佢嘅，我仲未至於醉成咁。
真係估唔到，俾人隊到啤啤夫，我都仍然念念不忘 Chloe 嘅 42 吋長腿。
當我再睜開眼嗰陣，已經係凌晨兩點。我發覺自己已經返咗屋企，喺自己嘅房裏面。
酒氣已經過得七七八八，我回復清醒。定神後，我坐咗起身，見到 Chloe 坐喺櫈上面、伏喺書檯瞓咗。我再望望地下，見到兩條濕毛巾，應該係 Chloe 想幫我解酒用過嘅。
我過去諗住叫醒佢，叫佢過嚟床瞓（自己瞓），點知叫極都唔醒。最後，我索性抱佢落床，然後幫佢冚好被，佢都依然冇醒；原來 Chloe 瞓著咗係叫唔醒嘅。
安頓好佢之後，到我伏喺書檯再瞓過。
鬧鐘響，清晨五點半。
我同 Chloe 都醒咗，佢望一望自己嘅位置，問我：「你抱我過嚟㗎？」我點頭，佢報以一個甜美笑容。
「你點呀？好啲嘛？」佢問我。
「個頭好痛……」痛到好似俾人搵斧頭劈緊咁，燒酒嘅 hangover 唔嘢少。
「你等我一陣吖。」佢落咗床，喺手袋攞咗包嘢，然後出咗廳。幾分鐘後，佢拎住杯嘢返咗嚟。
「參茶嚟㗎，不過未飲得住，焗多幾分鐘啦。」佢遞咗杯參茶俾我。
「你專登拎埋啲參嚟？」我問嚟都多餘，唔係專登唔通唔覺意袋住包人參周圍走咩。
佢點一點頭：「我知你飲醉酒，所以執定晒呢啲嘢先出嚟搵你。」然後佢行埋嚟，喺我額頭錫咗啖；睇嚟，Chloe 真係當咗我係佢男朋友。
「你再唞一陣，都係唔舒服的話，今日唔好返學喇。」佢提議。
「唔返邊個代課呀？」其實又唔係咁難嘅。
「我囉！」佢舉埋手。
吓？！唔係啩？！
上晝七點半，學校。
我帶住 Chloe 行入教員室，見到好幾張 O 晒嘴嘅面孔。
首先係惠晶，佢對 laser 眼上下掃描咗 Chloe 兩三次；然後係 Kirsty，佢連食緊嘅 croissant 都跌埋；Sophie 揸住杯咖啡係口邊唔記得飲。
為免氣氛尷尬，我決定快打慢，即刻同 Esther 講：「唔好意思，琴晚俾外面嘅學生灌醉咗，我今日上唔到堂；呢個係我朋友 Chloe，佢係延世大學英文系畢業，如果你冇問題的話，我想佢今日幫我代課。」
Chloe 隨即同 Esther 打咗個招呼，然後佢兩先英後韓咁傾偈。呢個時候，我發現惠晶係咁啤住我，於是我用唇語向佢做咗個「what?」嘅口型，佢藐咗我一下。
Esther 同 Chloe 傾咗一陣，然後佢轉返英文台同我講：「冇問題吖，咁你好好休息吓喇。」我同大家打咗個招呼，然後就走。
行到教員室門口，Chloe 嗌住我，行埋嚟同我講：「返去好瞓覺喇，我食晏買嘢俾你食吖。」然後佢喺我面上錫咗一啖。
全場靜晒，螞蟻行過都聽到。
根據我多年嚟從 Colette 身上研究所得，Chloe 呢個動作，喺動物學上叫做「插旗」，係宣示主權嘅行為，就好似啲貓仔去到一個新地方、不斷用自己個腮擦拭啲傢具物品一樣。
由於現場有四隻雌性動物，Chloe 嘅插旗行為，我係可以理解嘅；不過好似早咗少少。
中午十二點半。
偷返嚟嘅時間係最好瞓嘅；我一直瞓，瞓到 Chloe 拍醒我。
「蠢蛋，食飯喇。」Chloe 好輕聲喺我耳邊講。
佢買咗兩個炸豬扒飯，我哋喺廳一面食，一面睇電視。
「今日返學點呀？有冇俾啲𡃁仔𡃁妹恰？」
「冇呀，佢哋咁可愛；」可愛？佢真係愛心爆棚。「不過，你個同事好似唔係幾鍾意我。」
「邊個同事？」
「惠晶囉。」
「佢點唔鍾意你呀？」
「佢喺我斟咖啡嗰陣同我講，話你有女朋友，叫我唔好亂嚟。」Chloe 好平淡咁講。
閔惠晶！！邊得你咁多事！
我向 Chloe 道歉，並應承佢我會教訓惠晶；點知佢話：
「唔好啦，韓國女仔之間嘅相處，有時係好二元㗎，非友即敵；佢唔識我，又見過 Colette，自然唔鍾意我。你日日見住佢，無謂同佢搞到唔開心吖。」
我一直都唔為意，原來表面上頑皮同牙尖嘴利嘅 Chloe，其實係個好細心同好世故嘅女仔。
飯後，Chloe 問我：「你有冇錢喺身呀？」我成個銀包俾咗佢；佢笑一笑：「咁又唔使咁多。」佢攞咗五萬圜，然後同我講：
「你呢度乜都冇，等我去幫你買返啲日用品同乾糧。」
「不如我陪你去吖？」我提議。
「唔好，你今日要好好休息，週末先陪我。」講完之後，佢就攞手袋出去。
下晝三點。
Chloe 拎住大包小包返嚟。佢幫我買咗少量廚房日用品、圍裙、毛巾、一隻保暖杯、同埋好多乾糧零食。佢仲買咗個籃仔，放晒啲零食落去，然後放喺我房窗邊。
之後，佢就好似家務助理咁，著住條圍裙，喺度掃地執屋。我就返咗入房，為下星期備課。
佢掃到入房，掃掃吓，我突然聽見佢「哈哈」一聲。我擰轉頭望佢，見佢揸住個黑色半杯無肩帶喱士 bra，側住頭好蠱惑咁望住我笑。
我雖然未見過 Chloe 嘅 bra，但憑男人嘅直覺，呢個 bra 唔似係佢嘅。咁點解會有個 bra 呢？
Colette!!
我記起喇，Colette 返到美國之後，神神秘秘咁話留咗啲禮物俾我，我就完全冇咗件事！
似喇！呢啲咪叫插旗行為囉！
「幾有 taste 喎，邊個女仔留俾你㗎？」Chloe 將個 bra 放係自己胸前比劃；還好，佢係笑住講嘅。
「係咪 Colette 嘅呢？」佢笑住問我，我好尷尬咁點頭。「咁誘人，唔怪得之差啲有咗啦！哈！」
「收返好佢，唔好再俾我見到喇。」佢遞返個 bra 俾我就繼續掃地，我光速收埋佢入櫃桶。
晚上七點半。
Ricky 同 George 放工返嚟，Chloe 聽到聲，喺廚房伸個頭出嚟講：
「快啲埋位啦，就食得喇！」
呢次輪到兩個男嘅 O 嘴。
「呢個叫 Chloe 餐，大家唔使客氣，起筷啦！」Chloe 講呢番話嗰陣，個款有啲似日本妹。
我望一望檯面四個餐盤，每個有一碗辛辣麵、一碗白飯、一小碟蛋角、四碟泡菜咸魚仔大豆芽之類嘅小碟。唔好睇小呢啲嘢，一個人煮四份麵飯蛋角，出到嚟麵無發水，蛋角同飯仲係熱嘅，廚房 logistic 上要掌握得好好；好明顯，Chloe 係受過家庭烹飪訓練嘅。
食完飯，Chloe 話：「到你哋三個男人洗碗喇！」講真，佢唔出聲我哋都會自動埋位啦，仲好意思咩。
晚上十點，地鐵3號線，往狎鷗亭方向嘅列車上。
Chloe 忙足一日，應該都好攰，佢照舊繑住我嘅手臂，喺我膊頭上面瞓咗。
我襯佢瞓咗，好留神咁望住呢個女仔。表面上，佢係一個成日串串貢、又鍾意玩我嘅女仔；但係，喺另一方面，佢對我嘅付出，並唔係一個普通對你有好感嘅人所能做到。無可否認，我個心裏面，仲有 Colette 嘅影子；但同時地，我都感覺到，自己開始愛上 Chloe。
只不過，就算我愛上佢，美恩同我講嘅說話，我都唔可以忽視；亦正因為我愛上 Chloe，我就更加唔可以咁任性，單靠感覺行事，最後傷害到佢。
我可以點做呢？
為何這樣 為何竟偷偷戀上
完全因妳 使我換了立場
逝去戀火如今再度高漲
感謝妳重新的把我欣賞
情令我愛我痛我感觸 不敢回想
舊日舊事舊創傷 改寫情感的方向
此刻人迷惘 無法自拔 跟妳戀上
回味與妳碰上再點起 初戀幻想
像是做夢又似真 只想能找到方向
感激尋回了 仍能情深愛上
（待續）
為什麼會看到廣告
34會員
111Content count
時間係1997年5月中，剛剛完成學業嘅我身在華盛頓，正在考量緊我嘅未來。我可以選擇留喺美國發展，我internship嘅老細（即係美國政府）同我有共識，我畢業後可以留喺政府工作。或者我可以選擇出去闖一闖，見識吓呢個世界。當年仲係年青嘅我選擇咗後者，因為我覺得我仲未需要搵一份工困住自己......
留言0
查看全部
你可能也想看
重點摘要：
1.9 月降息 2 碼、進一步暗示年內還有 50 bp 降息
2.SEP 上修失業率預期，但快速的降息速率將有助失業率觸頂
3.未來幾個月經濟數據將繼續轉弱，經濟復甦的時點或是 1Q25 季底附近
近期的「貼文發佈流程 & 版型大更新」功能大家使用了嗎？
新版式整體視覺上「更加凸顯圖片」，為了搭配這次的更新，我們推出首次貼文策展 ❤️
使用貼文功能並完成這次的指定任務，還有機會獲得富士即可拍，讓你的美好回憶都可以用即可拍珍藏！
來韓國旅行最值得住的首爾明洞飯店，一次推薦給你🤩如果你正在猶豫來首爾自由行要住哪，這篇文你一定要看下去！明洞是首爾必去的景點之一，也是交通非常便利的一個城市，周邊還有好多好吃好逛的~在這裡也有許多不同特色的房型，不論你是單人還是多人，都有適合你的首爾住宿選擇，快跟著AsiaYo一起來明洞看看吧！
《可憐的東西》是一部充滿深度的電影，除了帶給觀眾感官享受，還隱含著許多深刻的內涵。從故事中可以看到冒險、實驗、與人類的成長，帶給觀眾不同的啟發和思考。觀眾在觀影後，可以自我審視，檢視自己是否保有冒險之心，以及是否有勇氣持續實驗人生。
這天中午比較熟韓國的朋友說，有個超人氣的起司年糕鍋激推必吃，既然是超夯美食當然不能錯過呀～餐廳從外觀看起來有點像是民房改建而成的，裡面的座位也是一間一間隔開，我們也算幸運，當時也沒排什麼隊就進店入座了。
外資今 (4) 日買超台股 15.4 億元、台指期同步回補空單，現股方面，外資買超緯創 (3231-TW)7939 張最多，而面板雙虎不僅遭外資賣超 3.1 萬張，投信也同步調節。
StatMuse描述了籃網三巨頭的改變。從杜蘭特、歐文和哈登的三巨頭陣容，但如今這三人都被交易走，球隊只剩本-西蒙斯。
西蒙斯：我就睡了一覺，成老大了？
CJ-麥科勒姆發推調侃道：“一切都是因為莫蘭特說他們在西部沒有對手”
據統計，詹姆斯和杜蘭特已經連續11次錯過交手，上次交鋒還是在2018年聖誕大
讀到格友一篇關於手寫的文章，同時附上了他的手寫字跡，不禁讓我想起前不久整理舊物偶然發現一張泛黃的活頁紙。
看到活頁紙我手寫的詞句，讓我回到了當年的心境：
金光閃閃的人生，大家都想要
融和財富的教學文章或影片，網路滿滿有
教你如何得到財富，去上網路課，去加入分潤平台，去炒股.....
學到了有沒有賺到錢真的是天知道
所以哪天你發財了，不要說很努力好嗎?這世間上多的是很努力卻沒發財的人。
突然想到，這文章可以叫做《想到哪裡寫到哪裡的系列》
重點摘要：
1.9 月降息 2 碼、進一步暗示年內還有 50 bp 降息
2.SEP 上修失業率預期，但快速的降息速率將有助失業率觸頂
3.未來幾個月經濟數據將繼續轉弱，經濟復甦的時點或是 1Q25 季底附近
近期的「貼文發佈流程 & 版型大更新」功能大家使用了嗎？
新版式整體視覺上「更加凸顯圖片」，為了搭配這次的更新，我們推出首次貼文策展 ❤️
使用貼文功能並完成這次的指定任務，還有機會獲得富士即可拍，讓你的美好回憶都可以用即可拍珍藏！
來韓國旅行最值得住的首爾明洞飯店，一次推薦給你🤩如果你正在猶豫來首爾自由行要住哪，這篇文你一定要看下去！明洞是首爾必去的景點之一，也是交通非常便利的一個城市，周邊還有好多好吃好逛的~在這裡也有許多不同特色的房型，不論你是單人還是多人，都有適合你的首爾住宿選擇，快跟著AsiaYo一起來明洞看看吧！
《可憐的東西》是一部充滿深度的電影，除了帶給觀眾感官享受，還隱含著許多深刻的內涵。從故事中可以看到冒險、實驗、與人類的成長，帶給觀眾不同的啟發和思考。觀眾在觀影後，可以自我審視，檢視自己是否保有冒險之心，以及是否有勇氣持續實驗人生。
這天中午比較熟韓國的朋友說，有個超人氣的起司年糕鍋激推必吃，既然是超夯美食當然不能錯過呀～餐廳從外觀看起來有點像是民房改建而成的，裡面的座位也是一間一間隔開，我們也算幸運，當時也沒排什麼隊就進店入座了。
外資今 (4) 日買超台股 15.4 億元、台指期同步回補空單，現股方面，外資買超緯創 (3231-TW)7939 張最多，而面板雙虎不僅遭外資賣超 3.1 萬張，投信也同步調節。
StatMuse描述了籃網三巨頭的改變。從杜蘭特、歐文和哈登的三巨頭陣容，但如今這三人都被交易走，球隊只剩本-西蒙斯。
西蒙斯：我就睡了一覺，成老大了？
CJ-麥科勒姆發推調侃道：“一切都是因為莫蘭特說他們在西部沒有對手”
據統計，詹姆斯和杜蘭特已經連續11次錯過交手，上次交鋒還是在2018年聖誕大
讀到格友一篇關於手寫的文章，同時附上了他的手寫字跡，不禁讓我想起前不久整理舊物偶然發現一張泛黃的活頁紙。
看到活頁紙我手寫的詞句，讓我回到了當年的心境：
金光閃閃的人生，大家都想要
融和財富的教學文章或影片，網路滿滿有
教你如何得到財富，去上網路課，去加入分潤平台，去炒股.....
學到了有沒有賺到錢真的是天知道
所以哪天你發財了，不要說很努力好嗎?這世間上多的是很努力卻沒發財的人。
突然想到，這文章可以叫做《想到哪裡寫到哪裡的系列》