IT狗、昆德拉、原來我哋重視嘅嘢抵唔過10蚊

一路睇《IT狗》嘅時候，已經覺得有好多可以聯想到19年抗爭嘅元素，有啲對白甚至會令我諗：雖然明嘅人係會搵到共鳴，但咁直接搬字過紙，會唔會刺激到親歷其境嘅人呢？但睇到<第18集-私隱Privacy>呢集，就釋除咗我嘅疑慮——好完美咁用故事劇情比喻、把握19年嘅價值之爭，明就明，唔明就淨係當笑片睇囉。

（18集、19集劇透注意）

嚟到第18集，提出電子人情概念嘅初創企業「PayPayDuck」，終於迎來一週年。呢一週年嘅經營充滿挑戰，由比好兄弟抄襲、原創變被告，不斷被抹黑同攻擊、面臨破產邊緣等等嘅危機，佢哋都一一走過。而今次，佢哋決定轉守為攻，公開對手出賣用戶個人資料同交易紀錄嘅黑材料，期望可以重創對手「PayPayEgg」。

以為終於贏返次啦，點知竟然又比對手成功化危為機：「PayPayEgg」向公眾道歉，更提出為表歉意，會向每位用戶發送港幣$10。結果「PayPayEgg」下載數字節節上升，冇人再關注出賣資料嘅問題。

「PayPayDuck」再次棋差一着，創辦人阿信大受打擊。原來一路以嚟重視嘅私隱安全，根本冇人在乎。所有人都可以為咗嗰$10出賣最私人嘅資料，仲覺得自己行得正企得正，怕咩比人公開？咁啱有個公園阿伯為咗$10搵阿信幫手裝「PayPayEgg」，阿信耐心咁解釋程式點樣偷曬個人資料，連銀行資料都一覽無遺。阿伯反駁話就係銀行戶口冇錢，先要拎嗰$10，而且「PayPayEgg」咁大個集團，唔信佢仲信邊個？仲鬧唔願意助紂為虐嘅阿信，話而家啲後生仔冇同情心。

睇到呢度，雖然劇情好令人氣憤，但劇本就叫人拍案叫絕：呢個咪19年拗緊嘅嘢囉？政府咁大個集團，唔信佢仲信邊個？送中咪送中囉，係身有屎嘅人先要驚嘅姐。甚至連$10都唔使比，都大把人無條件支持政府，反過來斥責識得思考嘅人。民主自由呢啲嘢，大眾根本唔在乎，原來我哋重視嘅嘢，係一文不值。因為大部分人就係咁現實，見高拜見低踩，寧願信奉權威都唔想用腦袋，唔敢成為社會嘅異數。呢啲人會永遠都存在，而我哋只可以一次又一次咁被打擊、打沉。

堅持咗咁耐嘅阿信，亦都攰啦。佢避開所有人，獨自埋頭苦幹去升級「PayPayDuck」，覺得只要做好自己，就會有人欣賞，其實就係唔想面對殘酷嘅現實。

但與此同時，佢嘅同事蒙玲都用盡方法去搵佢、為阿信打氣。原來阿信並唔係孤軍作戰嫁，係佢令到所有同事都相信「PayPayDuck」嘅理念。就算呢座城市冇人認同都好，至少阿信改變咗蒙玲、改變咗身邊嘅人。蒙玲話：「如果你今次冇咗嗰份信念，比我哋去改變返你吖。」

每個人都會有攰嘅時候，尤其係懷抱住改變社會、改變世界信念嘅人，總會遇到無數殘酷嘅打擊。而我哋可以做嘅，就係令身邊嘅人知道，冇人係孤軍作戰緊。就算環境再差，我哋都有彼此，互相勉勵、互相扶持。

呢段劇目亦令我聯想起豬文整理、解讀嘅《哈維爾與昆德拉論『布拉格之春』》，同而家嘅香港一樣，捷克早係1968年布拉格之春後，就要面對抗爭失敗嘅困境。好多人眼見前途未卜，都選擇離開捷克，但昆德拉認為呢個理據係唔成立。

現實冇錯係晦暗不明，所有嘢都好不確定，然而呢個就係捷克嘅命運。捷克作為一個細小嘅國家，不嬲都係要同周遭大國斡旋。自古以來就係搖搖欲墜嘅吊橋上行走，吊橋嘅兩邊就係存在與不存在、主權與臣服，我哋不嬲都係咁樣走過。只有屈服於沮喪同失敗主義嘅人，先會埋怨呢度冇足夠嘅保證，終日抱怨冇希望、冇前途。反而只有軟弱同放棄咗嘅人，先淨係識得活係幻想出嚟嘅確定性中（好似藍絲同小粉紅呢）。無論做人，定係做捷克人，本來就要面對人生嘅不確定性。

邊個可以包保移咗民就有安穩嘅生活？移民之後，唔知點過生活、惶恐不安嘅大有人在。甚至見到一啲本身為逃避港共、中共而移民嘅人，為求安全感，開始靠攏當地嘅中國移民，生活習慣都變得中國化，違背移民嘅初衷同意義。無論身在何方，要點樣應對人生嘅曖昧不明，始終係重要嘅課題。幸好，我哋可以選擇支援彼此，繼續燃亮心中嘅星火。

又講返IT狗，睇完18集之後，我(終於)決定課金支持Signal，用行動去支持理念同服務。如果Facebook、Whatsapp係大台，擅取個人資料係常態，我希望可以用行動去證明，仍然有人重視私隱安全，而呢啲價值係值得我付出嘅。

如這篇文章有幸接觸到你，願你可以行動抵抗遺忘，捍衛真相與公義，一同見證我城的未來。

如你願意支持我繼續努力，可以請我一杯咖啡☕

歡迎每月定額支持我的寫作，讓我們在暗夜中互相守望，彼此送光：