不專業足球筆記（八）

不專業足球筆記（八）

1. 根據Telegraph同Daily Mail既報導，國際足協理事會計劃響黃牌同紅牌之外，另外再引入一個叫做藍牌既懲罰制度，被罰藍牌既球員，要離場十分鐘，而且累積兩張藍或者黃牌，一樣係要被罰離場。最先就話會響上星期五公佈，仲話會響英格蘭足總盃率先試用，但後尾又話國際足協理事會同國際足協商討之後，會延至三月先公佈，同埋係響低組別聯賽先推行。

2. 我第一個反應係…屌，唔好喇。英超班垃圾球證連VAR都可以用到一鑊泡，我真係睇唔到如果再加埋呢啲藍牌既話佢哋會搞成點。

3. 唔係淨係我呢啲冇識波牌既普通球迷有呢個觀點架，好多英超既領隊好似熱刺領隊樸斯迪哥高奧、利物浦領隊高普同埋阿仙奴領隊阿迪達都表達出對呢個新既懲罰機制表達出關注。佢哋大致上都係認為引入呢個機制冇咩逼切性，就算真係實行之前都要進行嚴格測試先，而家咁樣真係推得太急。

4. 跟住就梗係要講返美斯單嘢喇，響香港同大陸真係越搞越大，但事實上國際邁阿密同埋美斯真係睬你都戇鳩，響日本開心踢完比賽之後就拍拍蘿友走人，留返香港特府同埋啲議員響度潑婦罵街。不過咁樣搞大件事都有個好處，就係搞到Talter最後肯嘔返啲錢出黎，雖然只係一半，但好過冇吖。我覺得成件事最慘其實就係啲比咗錢買貴飛入場既人，而家夾硬可以屈到Talter肯回半水，都已經算係咁。

5. 有評論認為，Talter今次肯回水，係因為佢仲想響大陸啲上流社會做生意，而家件事搞到咁大，甚至要取消阿根廷響三月份訪華既行程，為咗唔好比啲大陸人遷怒，佢哋先至肯回半水，又扮晒受害者咁。其實是旦喇，我覺得最緊要係啲球迷可以回到水啫，佢哋先係真正既受害者。

6. 呢壇嘢搞到咁大，仲震到上國家層面。北京足協同杭州市體育局分別「眾所周知的理由」同「北京目前沒有舉辦梅西參加的相關比賽的計畫」而取消舉辦原定響呢兩個地方舉辦既國際友誼賽。而呢兩場對尼日利亞同科特迪瓦既比賽，據阿根廷傳媒報導，會轉為響美國舉行。其實香港可以將一場商業足球比賽（尤其是政府、官員、議員響度煽風點火），提升到國家政治層面，都真係幾犀利…

7. 呢個禮拜，其實歐洲四大聯賽都有幾場激戰，其中今季德甲奇兵，開季至今未嘗一敗既利華古遜，響主場迎戰賽前落後兩分排次席既拜仁慕尼黑，結果都幾出人意表咁淨勝三球。

8. 成場波利華古遜有威脅既攻勢真多過拜仁好多，拜仁全場只係得一腳中龍。而賽前變陣以三中堅既杜曹梗係比人屌，而佢響賽後記者會都承認責任，又話唔會認輸。

9. 我老婆唔算成日睇波，但佢都識哈利簡尼，知道佢為咗要拎冠軍走咗去拜超，我同老婆講既時候，佢就話睇黎哈利簡尼真係同冠軍無緣，可能真係命水問題。當然佢係講笑咁講喇，而家球季過咗三份二，落後五分又唔係冇得爭既，又睇下到哈利簡尼既命水又係咪真係咁硬喇。

10. 返香港睇返今季第一個錦標，高級組銀牌決賽喇，呢場比賽又係響農曆新年期間舉行，其實我覺得呢個安排都唔錯，感覺上好似幾有氣氛。

11. 傑志同東方激戰咗120分鐘，響雙方加埋總共有3個人被逐既情況之下，傑志憑住明加索夫響加時118分鐘禁區入面射入奠定性既一球，幫助傑志以二比一反勝東方，奪得今季香港球壇第一項錦標。

12. 其實場波東方真係踢得好過傑志好多，但足球就係咁，表現好唔一定會贏。保羅呢場波都居功至偉，救出咗好多東方有威脅既射門。東方啲後生仔其實真係幾正，由流浪加盟既余在言將響香港隊既好表現帶返黎，可惜既係東方既把握力真係幾差下，其實佢哋法定時間之內應該係可以解決到對手，響下半場補時階段比人十二碼追返，雖然可惜，但都要檢討一下。

13. 兩球十二碼其實我覺得都冇判罰錯，羅拔圖果下穿心腿雖然未必係有意，但真係好危險同肉酸，但其實我覺得球證係有權比紅牌。而高素巴耶夫咁樣唔收手，而家既球例咁不自然咁張開手係應該吹罰，但係應唔應該比牌同樣係見仁見智。

14. 另外被趕出場果兩個都值得討論下。艾里奧果張紅牌其實係自己申請，佢唔知做乜鬼自己向旁證做出個比牌既動作，呢啲動作響而家既球例黎講係要比既，佢都冇乜好投訴。巴科爾果下係有少少從後攔截feel，黃牌可以，但直紅都冇得講，更何況佢本身已經有黃牌在身，基本上佢點都出硬場架喇。

15. 再一次證明馬高斯響東方係有幾重要，加時換走咗佢再加埋巴科爾，去到呢個時候，其實東方已經大勢已去，如果去到互射十二碼，以保羅救十二碼咁有心得，我覺得東方都未必贏到。

16. 東方以咁既班費，踢出咁既好既表現，輸波係可惜。但足球就係咁，要贏，終究都係要將個波擺入個網入面。

17. 係咁多先，下次再傾。

#不專業足球筆記

#藍牌 #國際邁阿密 #美斯 #Talter

#回水 #拜仁慕尼黑 #利華古遜

#高級組銀牌 #銀牌 #傑志 #東方

廣告時間 -

ig: leafopen3

instagram.com/leafopen3

fb: leafopenleafopen

facebook.com/leafopenleafopen

方格子︰ https://vocus.cc/salon/leafopenleafopen

如果有興趣睇下我既其他寫作作品，可以上 leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B

如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938