1） 雖然港府開口埋口要說好香港故事，但開關後大部分行業市況不似預期，更加唔喺特首口中果句「生意好啊」。生意難做，尤其係之前日望夜望開關後生意可以大幅好轉嘅餐飲業。
2） 之不過開關之後，嚟香港嘅內地同胞掛住去快富街同麥當勞道「打卡」，「打卡」打到飯都唔駛食，買啲街邊小食再踎喺條街度食咁就一餐。至於香港人一樣唔幫襯，一喺報復式外遊返鄉下日本，一喺返深圳吃喝玩樂，唔少人仲話而家仲係香港出街食嘢嘅人，佢張單有一部分錢其實係交緊智商稅。
3） 飲食業難做，老字號嘅餐廳都唔好得幾多，相信大家都有聽過沙田龍華乳鴿，曾經都引過（我冇話吸引呀）唔少遊客幫襯。依間龍華舊年傳過要執笠結業，但而家都仲如常營業，似乎大步檻過。
4） 不過，前藝人張玉珊創辦果間修身堂（08200），早兩日就出咗個公告，話佢哋旗下間財仔批咗一筆300萬貸款俾龍華老闆鍾鑑檸夫婦，似乎反映鍾氏伉儷周轉都有啲壓力。
5） 鍾鑑檸其實今年5月已經向修身堂借咗200萬，事隔兩個月再借300萬，有200萬係「債冚債」用嚟還返5月條數，但息率就由上次17厘加到18厘，貸款期一年，數數手指，連埋5月條數，齋俾利息都接近60萬元。借錢嚟講，財仔利息肯定貴過銀行，龍華老闆要借到去財仔，睇怕財務壓力都唔細。
6） 睇返網上資料，龍華有多年歷史，過去係唔少名人明星鍾意寵兒，甚至有傳話已去世才子金庸都鍾意去龍華歎茶兼寫書，唔知神鵰俠侶係咪金庸見到啲龍華乳鴿而寫出嚟呢？
7） 國際武打巨星李小龍據聞當年都係龍華常客。
8） 最後提返大家一句，借定唔借？還得到先好借！
