《罪會》(1)

每個人其實都有罪，

但可以完全改過嗎?

犯罪後承諾改變，

最後卻重蹈覆轍，

一直重複落去，

形成一個永不磨滅嘅循環……

人，就是這樣的……

――――――――――――――――――――――――――――――――――

「除咗呢個方法，乜仲有方法可以解決咩？」

此刻，我被一個面容扭曲的人壓喺地下，佢手上攞住一把刀，刀鋒與我胸膛嘅距離近在咫尺……

「可能仲有其他方法呢！你冷靜啲先！」

「冇㗎啦……呢到死剩我哋幾個咋！！！你覺得我哋仲有可能離開呢度咩？！冇啊！，我哋所有人注定全部死喺度！！！」

男人嘅情緒越趨激動，眼角卻默默流下眼淚……

佢同另一人辯駁完之後,轉過頭來,重新將目光放喺我身上，喺我嘅角度睇得好清楚，佢嘅臉容已被淚水所覆蓋。

而呢一句，亦係我聽到佢講嘅最後一句……

「對唔住，我冇得揀……」

「嚓――」

肉體嘅撕裂聲瞬間劃破寧靜……

「唔好啊――――――――――――――――――――――――――！！！」

――――――――――――――――――――――――――――――――――

序章――【惡夢】

最近，夜晚時常被一個惡夢所纏繞,喺一間燈光微弱嘅學校,空無一人嘅走廊上,身上的純白色外套,莫名奇妙地沾滿鮮血……

喺夢中，我好似尋找緊一啲事物，喺走廊逐一將課室嘅門推開，直至去到404室附近，我慢慢靠近課室門口，卻驚覺地下有腳印，而形成腳印嘅並唔係水漬，而係一灘灘嘅血漬，一直延伸至404室門口。

當知道呢度並唔係只得我一個嘅時候，理應感到慶幸嘅心情，卻被眼前所見嘅畫面所驚嚇，課室內，有一個人，佢赤裸上身，背對住我蹲下，旁邊有一堆人體殘跂，而嗰個人，手中攞住一個人頭，一口一口咁啃食着，咀嚼聲令人倍感心寒。

回過神來，赫然發現那人嘅目光已停留喺我身上，好似獵人鎖定目標獵物一樣，向我直奔而來，我下意識奔跑，雙腳卻不聽使喚，不能發力，成個人跌倒在地。

轉眼間，那人已經喺我前方，喺昏暗嘅環境下，我無法睇清楚那人嘅樣貌，佢突然大笑起來，佢所發出嘅笑聲並非屬於人類能發出嘅聲音，每當到咗呢個時候，我就會從詭異嘅笑聲中醒來……

第一章――【現實與虛幻】

「嘟嘟……嘟嘟………………」

鬧鐘的響聲劃破寂靜的清晨……

我撳停個鬧鐘，拎起床邊嘅電話，睇睇時間……

「弊！」

今日係我母校嘅開放日，原本打算早啲返去，但我因遲咗起身嘅關係，目前已經遲咗半粒鐘。

我決定唔食早餐，直接衝去巴士站，因趕時間，我冇留意該巴士係唔係我平時搭嗰架，但我記憶中嘅上落車位置應該冇錯，所以就匆忙咁上咗巴士。

上巴士之後，我上咗上層，搵咗一個靠近樓梯嘅座位坐低，戴上耳機，因音樂同車廂的搖晃下，我閉上雙眼……意識漸漸遠去……

「啊――！！！」突如其來嘅刹車，令我個頭撞咗落前方嘅坐椅，痛楚立即湧現，清醒過嚟之後，透過巴士嘅窗反射，先發現頭部出現咗明顯嘅傷痕，仲一直流緊血，但我並唔打算自行包紮，一來呢度並冇任何包紮工具，我亦怕傷勢會喺我包紮過程中受細菌感染，令傷勢更加嚴重，二來，我開始感覺到呢度嘅氣氛有啲古怪――車上嘅燈一直眨緊，而當望向窗外，唔知點解完全睇唔到外面嘅事物，好似被一層黑膜蓋住一樣……

點解會喺高速公路上突然剎車？而家明明係返工時間，但巴士上層卻空無一人？若果係撞車嘅話，點解咁耐下層都冇任何動靜？

為咗解決突然喺腦中浮現嘅一連串問題，我決定落下層睇吓，但喺行動之前，保險起見，都係報警先……

「你所打嘅電話未能接通……」警署嘅電話都唔通？我嘗試再打多次電話……嘗試咗幾分鐘之後，結果都係同之前一樣，所以我決定直接落下層先了解現況……

我慢慢行落樓梯，一陣濃烈嘅血腥味撲鼻而來，我強忍住刺鼻嘅氣味，一步一步咁行落樓梯……

當到咗下層，眼前所見嘅畫面，令我不寒而慄，心跳加速，一具具屍體「坐」喺座椅上面，佢哋嘅衫全被鮮血染紅，但佢哋嘅姿勢並唔似一般屍體咁瞓低，而係依然坐喺座位上，身上亦有一啲屍蟲蠕動，毫不留情逐步啃咬屍體嘅皮膚，但屍體嘅表情卻與現時情況完全相反，佢哋雖然面色蒼白，眼神空洞，但卻咧齒而笑，成個情境好真實，並唔似幻覺……

因巴士上血淋淋嘅景況，已經有少少頭暈，站立不穩，需倚靠扶手支撐身體，見到啲咁嘅場面都仲未暈低，覺得自己接受能力意外地高……

突然，巴士廣播響起……

「下一站係……審判所……」

審判所？明明我搭緊呢架巴士係去緊沙田，以前搭嘅時候都唔覺有途經呢個站，而且喺我印象中附近都冇法院等建築物，唔通――呢場真係只係一個夢咁簡單？

「啪――！」司機位旁嘅門應聲彈開，一個人緩慢地從司機位行出嚟……

「你……係邊個？」我問。

「我係邊個？哈哈哈……呢點你唔需要知……我亦都唔需要同一個罪人交代……」

我係罪人？我自問除咗兩年前我失去記憶嗰段時間，我完全冇做過任何犯罪嘅事，我點會係罪人？

「我知你諗緊乜，但係喺呢個時候，講俾你聽都唔會明，到下次嗰陣，你就會知道你想要嘅答案。」

「下次？」

「哈――」男人大聲咁笑咗聲，「我哋下次見嘅時候，就唔係去緊目的地，而係喺真正嘅判決場地――審判所,參與我哋嘅“ 罪”會……」

語畢，男人嘅身體開始融化成紅色嘅黏液，黏液雖然與我仲有一段距離，但隧住時間過去，紅黏液已擴散至我腳下，幾分鐘之後，男人已完全溶化，只剩低一堆骸骨……

而我亦終於不支倒地，失去意識……

待續 ......

希望睇完呢篇文嘅人畀返個like 

不定期連載，睇下有冇人睇先決定定期連載

另外，遲些可能會出書面語版， 都係要睇下讀者反應😂