評 Uncle Roger 道歉及黃色經濟圈的困境

Uncle Roger 因為同支持六四嘅法輪功成員 Mike Chen 拍片點評餃子而被小粉紅出征，然後Uncle Roger 刪片道歉。

Uncle Roger道歉，有兩個可能性。 一係，就係佢本身都係一個支持中国政權嘅認為自己係中国人佢支持熱愛中國政權 - 呢個可能性我哋暫時不考慮。 首先睇返佢啲片，佢係自稱「Asian」/「Malaysian」而非「Chinese」，講嘅係「I love Chinese culture」而非「I love/support China」; 再講，如果佢係中国人，根本一開始就唔會同Strictly Dumpling呢個講六四、中国有名嘅 #法輪功成員 同 #反中份子 拍片添。 所以喺度，我哋首先撇除 Uncle Roger (Nigel Ng) 係真心支持中国嘅呢個可能性。

而另一個原因，就更加簡單直接: 為咗錢/利益。 Uncle Roger 就同其他好多 #奶共 嘅藝人一樣 #搵食啫。

眾所鳩知，要賺中国人錢，就係要 #聽黨話跟黨走，唔可以講獨唔可以辱華唔可以 「一邊賺中国人錢一邊罵中国」。 你可能會問，既然咁多規矩中国人咁難服侍郁啲就小粉紅出征，點解仲有咁多人仆住入去?

花姐之前話，「香港人如果唔支持佢哋又係盞趕佢哋返中国搵錢」。 呢句其實並唔準確。因為，就算喺香港搵到錢，都唔代表佢唔會返中国搵錢。你睇楊千嬅? 喺香港曾經紅到發紫嘅佢咪一樣返中国「感受習爺爺嘅暖流」。根本個現實係，愈紅嘅藝人返到中国就愈吃香。

以佘詩曼做例子。 之前陳志雲案出庭時曾經爆出佢出show費係最少4萬，但最近在有新聞爆出，佘詩曼在中国嘅show價，普通商演要100萬起跳，業配 20萬/個，片酬係60萬/集。 所以點解反送中初期，佘詩曼畀人發現喺IG LIKE 咗反送中嘅POST而話佢港獨，佢要即刻道歉。因為「得罪中国粉絲」所代表嘅，係數以億計嘅收入。

再講近啲嘅例子。 12月29號張栢芝喺廣州出show，唱咗兩首歌，走曬音都好，佢都照收100萬出show費; 喺香港紅唔起嘅陳偉霆(的士陳)，而家喺中国係講緊出一場SHOW 85萬，兩年嘅代言費係1000萬; 喺香港被唾棄嘅藝人Gem (宇宙漿)喺中国嘅出SHOW費係240萬/場。

人民幣係咪真係好香? 未必。但對佢哋好多人嚟講，「支持香港」得到嘅利益，係COVER 唔到「得罪中国」所帶嚟嘅損失。失去香港市場，對佢哋嚟講根本就唔係咩嘢末路。

同台灣唔同。范瑋琪因為口罩一事話蘇貞昌係狗官，結果8日內跌咗19萬粉絲，代言工作被撤換、自創品牌被抵制出征，佢前排仲自爆成年無工作，希望台灣人原諒佢。

但相對香港，周柏豪公開接受荷蘭叻訪問，話自己「支持中国、支持警察、反對黑暴」，係好多人鬧，但就結果而言，佢無咗三萬個 FOLLOWER，口罩廣告商將佢嘅宣傳照收起，僅此而已。最好笑係仲有一堆人堅持佢係暗黃、「政治歸政治」佢照樣上中国慶新春節目收錢。

你可能會攞王宗堯嚟做例子。喂王宗堯都係靠黃色經濟圈養起架? 但係香港養得起幾多個王宗堯? 有幾多個可以自己攪一個喱show自給自足嘅杜汶澤? 只係一個903頒獎禮，就已經知道香港人對本地藝人有幾harsh。

「邊撚個JER?」、「咩歌嚟架聽都無聽過囉」、「阿豬阿狗都上到叱咤」。

你再睇下一開始係威係勢嘅「黃色經濟圈」? 印度獨立靠嘅，除咗係武裝革命同二戰後國際角力等等嘅外來因素之外，當初憑住支持本地產品抵制英國嘅呢個和理非行動，攪到英國廠商焦頭爛額都係一個不可缺少嘅因素。但點解同樣嘅概念，喺香港都可以攪到一PAT屎咁?

黃色經濟圈係點樣變質嘅? 就係由連登嘅「認證」開始。我一早已經講過，黃色經濟圈唔係一個真實存在嘅組織唔係商會，因為當中牽涉到同行嘅競爭同利益，你係永遠都唔可能將呢樣嘢當係一個實際存在嘅組織咁行。

一開始黃色經濟圈嘅目的，係「香港人支持香港人」，係抵制「不支持香港人嘅企業」，更係要令到唔係特別關注政治嘅人，認為「支持香港人」先係有利可圖，支持警察支持政府係被排擠係註定失敗。我哋要嘅係呢樣嘢。

你話佢，本身唔係特別「黃」，貼文宣係為咗賺錢 (「偽黃」)，但咁又點? 佢貼文宣呢個舉動都係幫緊你宣傳、壯大緊你個陣營嘅勢力、提供緊反抗嘅資本畀你。

你以為返中国搵銀嘅藝人，有幾多係真誠擁護共產黨? 係唔係真係阿豬阿狗返到中国都可以賺到盤滿鉢滿? 當然唔係，有幾多喺中国撈唔到落去? 但係中国係成功塑造到一個「支持中国=發大財」嘅形象出嚟嘛。

我係一個生意人，點解我要支持「黃色經濟圈」? 你畀到啲咩利益我? 當中有啲咩嘢前途? 你唔可以否認，呢啲先係香港嘅主流價值。但最終我哋見到嘅係，黃絲同連登仔開始捉鬼: 佢表咗態支持政府都好，都有可能係「暗黃」; 佢表咗態支持香港人都好，佢做得唔夠多，佢就係「偽黃」。

呢個先係黃色經濟圈所面臨嘅困境。點解香港做唔到好似中国咁? 除咗真係實力懸殊之外，更多嘅係香港人嘅政治潔癖。

有人話，係咪為咗人民幣就可以出賣良知? 我真係喺現實嘅角度想問一句，良知，可唔可以當飯食? 可唔可以用嚟供樓? 你要人哋放棄中国市場嚟支持你，你又可以畀到咩嘢人? 當 Whatsapp 要8蚊啲人都唔肯畀; 當咁多 Freelancer 被壓價被要求免費提供服務嘅時候，你哋點樣說服人哋，放棄中國咁龐大嘅利益，去加入你哋嘅陣型?