我的興趣

我的興趣是畫圖，畫圖的時陣，心情會放輕鬆，有時畫甲誠認真，甚至袂記得食飯，因為咧畫圖就袂記得枵，親像囡仔咧耍手機仔仝款，定定耍甲袂記得時間。

其實我學畫圖才4年，我佇社區大學的水墨畫班學的，毋但水墨畫，任何畫法我攏有興趣學，頂冬阮遮的社區大學新開一門蠟筆畫的課，我嘛有報名上課，遮是線頂的課，每拜六下晡時，才食飽我就攢好等欲上課，一點仔就無想睏晝，因為我真愛上這个課，這位老師本身是一位建築師，講課誠親切，我無感覺壓力。

正港予我愛畫圖，毋但是畫圖的過程，佇畫好會使分享才是我上佮意的。有時陣共畫好的圖翕相，加幾字仔祝福的話，當做早安圖，佇網路懸頂共朋友問好，誠濟好朋友真愛看我畫的圖，若久無發圖予伊閣會共我討咧！