動物王牌圖鑑(臺文版_上集)

佇誠大的日頭下跤，職棒成員全攏拚出力，就是為著予家己的分數變甲好看一點，其中猛虎隊第一局因為有人犧牲短打形成滿壘，閣加上戰狼隊打者青磅白磅的安打摃甲連續提著四分，這予欲準備上場的二壘手林小豪感覺不止仔緊張。

「放心啦！就算毋是全壘打，嘛是有法度得分的。」

佇邊仔的諾里隊長就按呢講，伊閣講捌有拄著比家己、甚至比這馬比賽的對手閣較勇的，落尾抑是有法度化解。小豪聽了就毋知這是咧展風神抑是咧安慰？話雖如此，隊長內心真正的想法是：若毋是因為今仔日予刣掉(出局)遮濟改伊嘛想欲閣試一擺。

講煞小豪嘛是閣愛上場，是講紲落來予人料想袂到，因為對方換投手，伊的第一粒連鞭摃做安打，閣順利一道走去一壘，就佇伊走去家己負責的範圍時，對方守備的跤一踏，毋但比賽出局，甚至規个手攏愛包紮送病院。

這時雙方互相衝突，搬一場野球界的大車拚，邊仔的裁判看大事不妙嘛出面阻止，勸阻幾擺了後，才會當予逐家歇睏。順紲對方瞪講：「你看你做的好代！若毋是有人出漚步阮會使勉強提一分。」雖然講按呢，但是下半場的結果嘛差不多顧在去矣。

「這馬就莫烏白想，專心摃球就著矣！」

其中隊長有注意著其他會拍敗戰狼的步數，等咧上場通講是閣有得分的機會，只是頭拄仔的地步，無人會想到今仔日會變做逐家的笑話，連總教練憲總看袂落去。

「你知影家己咧講啥無？ 」

「頭拄仔是摖傷だいじょうぶ，若看𪜶的扮勢，用看就知影按怎辦。」

「只是摖傷？你一定愛我規組䆀了了才甘願？」

「無諾！而且敵隊人嘛變少，拄好爾爾啦！」

無法度想著，諾里今仔上場連鞭欲準備挑戰，連對方嘛目睭金金看，若無共對手拍敗，彼是一件足落氣的代誌。看對手變甲愈來愈勇，若無法度佇打擊區保持冷靜，這就表示逐改攏會予攻擊，無論當時有可能無得分閣出現意外。因為佇紲落來，雙方攏愛展開非常刺激的對決。

戰狼隊閣再換投，佮諾里對上眼。時間一分一秒過去，本底咧提球棒的手提甲緊繃，但想著二壘手送醫時的毋甘願，按呢就愛調整一下心情，予伊堅定地拍出二壘安打並對對方向前…

「哈！報冤仇的滋味真好！」

看著這款地步，觀眾攏嚇甲規面青恂恂矣。連邊仔的阿伯感覺這少年人是有練過功夫？無按怎有法度對戰狼二壘手摃甲糜糜卯卯。

「Ｘ！真正毋敢相信，我總算知影到底有外gâu！」

毋管按怎講，拍敗對手…應該講用頭撼敗，就共對方疼甲喈喈叫，閣有人大聲喝好，諾里的計畫加上無仝的言論並無共比賽的分數予改變，上尾四比零失敗收場。

幾工仔後的練習日，歇睏區的白板仔貼一張紙：

「賽務部公告：因應猛虎隊陳諾里以頭部攻擊戰狼隊曾光榮導致胸部重創，經內部討論與雙方領隊教練議論結果，褫奪隊長身分另行改選、懲處禁賽五場並罰款五萬元做為醫療賠償。」

逐家看了就開始互相嗤舞嗤呲，一直到諾里的出現則連鞭惦惦。

「這馬是按怎!?昨昏的情形恁逐家攏嘛知影，我只是對𪜶回敬啊」

「你根本毋是佇替我『報冤仇』，煞是害我『漏油』！你叫我按怎面對球迷閣有逐家啊！」小豪正氣噗噗對著諾里，就算手已經好七成。

「阿豪講的話你嘛聽著矣，我知影你是為著隊友，但落尾嘛失去家己上重要的，按呢敢有值？」憲總認真咧講。

「我就是知影你會按呢為著隊友咧衝動，頭先就無排著你，結果換你上場猶閣是按呢，倒不如這馬轉去，好好仔思考紲落來咧按怎辦。」

「既然憲總按呢講矣，按呢有緣莫聯絡！」

諾里啥物話無講，共物件款好，幌一个手，對門跤口行落去。但是紲落來的路是欲按怎行？伊嘛無特別想，干焦欲行去東門路的病院，來看覓進前蹛病院的好隊友恩可，毋知伊這馬的傷喙恢復如何。

「紲落來閣愛繼續進行複健，了後閣愛予醫生檢查。」佇治療室的恩可根本無心考慮家己的傷喙如何閣有治病的效果，因為家己需要時間寬寬仔恢復手感，閣過半月日就會使轉來到球隊進行穩定的體能訓練。諾里不定時的看望，除了甲予家己振作，攏無任何會當失志的餘地。

「看你精神閣袂䆀，掠做予拔掉隊長的職位會感覺失望咧。 」諾里頭犁犁。毋知恩可是按怎看著新聞的，干焦會當笑笑咧地看著伊。

「凡勢袂䆀。」雖然諾里今仔拄著生涯中毋捌過的困難，就算已經知影紲落來家己嘛干焦會當家己訓練，伊對佇遐心煩意亂的代誌並無任何興趣。

「講正經的，好一站仔無看著你的『全壘打舞』閣真正足無聊咧。 」

「這款的就毋免閣提起矣。」恩可規个歹勢甲。

「半月日了後猶閣會赴無？ 」諾里坐佇恩可邊仔問著。

「按怎？是驚我會追著你這位大先輩？」恩可笑笑咧回答。

「這馬是按怎？想欲變大尾是？」諾里直接固定恩可的頭，共伊搓落去。

「好矣啦，我會足拍拚完成復健，毋通予我蹛傷久。」恩可生狂咧講。

「好，到時就見！ 」諾里講煞，歡喜就離開，恩可看去伊，回想去佇搓頭時彼雙攏著真厲害的手，一點仔都無成四常彼个臭屁的伊，誠明顯腹內有足濟疑問。

諾里佇病院幾公里外的所在買一个肉包來墊胃，當欲開始咬第一喙，就有一隻毋知佗位來的貓仔連鞭提走，氣袂過的伊決定用平常訓練的氣力追落去。想袂到沿路就對東區走去安平永華路的盡磅。

足無簡單提著的肉包，當然愛揣清靜的所在去食，自按呢小貓仔對光州路倒斡的方向向前，諾里佇後壁追，連鞭就來到億載金城的大門口…

過無幾分鐘，諾里欲準備入去共貓仔掠起來。但佇家己幾步仔的所在就有芳貢貢的食物佇頭前，猶閣有人當開一个大雨傘，親像欲擺攤的款。

「好矣，現場準備，演員妝畫好就趕緊就位，彼个道具到底好矣無，限時三秒鐘閣毋予我出現，我就愛開喙來撟落！」聽這个口氣毋是擺攤賣食的，結果是欲來搬戲，而且看演員身軀頂的衫仔褲，敢講是最近等咧衝的八點檔！諾里看甲非常期待，因為罕得劇組會走來台南出外景！

「3！2！1！Action！」既然開演，就恬恬仔看落去

「月里！若毋是你的幫助，我的事業就無法度度駛甲府城去，你若願意，做我的頭家娘，做伙拚一个未來！」男主角志明當咧對月里講話。

「猶毋過我的阿母敢會答應…」月里顯著頭殼𢯾咧燒，尤其面對青磅白磅的阿母。

「月里！你上好是佮這个漚人分手，啊若無我就予你看一个證據…」這時月里的阿母提出矣一个查某英雄的「變身劍」，講是志明三不五時就提伊來對捌的查某人咧奅，毋過對這齣背景設定民國幾若冬前的連續劇就變甲袂合。

逐家差一點仔昏倒在天，導演準備撟講有人烏白來，彼个肉包小賊仔閣再出現，諾里臨機一動，順紲接走阿母手頭的「變身劍」準備來出大招，殊不知劍身雄雄發光，貓仔佮諾里對門跤口向前，無偌久在場的人員驚甲目睭欲青瞑矣。

「到底是咧搬佗一齣戲啊？按怎開始行無仝路線矣？」導演嘛毋知按怎用的，閣較怪奇的是彼个特別的道具竟然拍無去矣，這已經無法度通好解釋啊。

啊若這个進城門就消失無蹤的少年，看著青磅白磅的車驚甲差一點仔跋倒佇塗跤，本底咧追的小貓仔嘛毋知走去佗，唯一留落來的煞是這个不可思議的變身劍，就佇猶未理予清的時，少年聽著五妃廟後壁有鬧熱的聲，就行咧過去。

(後集待續…)