動物王牌圖鑑(臺文版_下集)

諾里原本對億載金城欲追共肉包提走的貓仔，想袂到煞是對五妃廟的門跤口出來，閣差一點仔予車挵甲閃著，逐項的情形予伊毋知這是啥物底代，雄雄伊聽著後壁有聲閣淡薄仔鬧熱，決定看一个詳細。

頭拄仔佇後壁的台南市立野球場有球隊欲開始體力訓練，所有的球員攏連紲落車提家己的家私，閣來有一个烏頭毛的少年咧看家己的手橐仔，向望家己會當投好每一个球。

「方小明你是按怎！愛開始練習矣。」聽著同伴咧喝，少年就綴去隊伍內底。

體力訓練當中愛要求𪜶佇右外野集合，是講𪜶的總教練哪會遮面熟？伊穿矣一身金龜綠色的外套，正手閣掠牢鐵牛mark的球棒，伊毋是別人，正是當年以精彩球技蓋出名的阿西教練。

阿西教練提起皮尺對右外野一路行到左外野的上爿仔停落，並且閣做記號，遮的囡仔嘛毋知紲落來欲做啥物訓練。

「紲落來就提起手橐仔練接球，若是接袂著我摃出來的，練習就加倍。」

講到遮逐家攏互相咧金金看，已經表現出傷驚的表情，因為對菜鳥仔來講，愛面對一个捷摃二壘等級以上安打的前職業選手，敢有可能喝接就會小接咧？就算按呢，方小明猶是硬欲試看覓，阿西教練開始摃出第一粒球後伊出力向前，並準備蹬跤來接，只不過姿勢無用好勢，想當然嘛是磕壁的份。

阿西教練看著有淡薄仔嚥氣，原本欲走過去扞一下。就佇這个時陣，頭前的觀眾席就有人伸手鬥幫忙，竟然是走來球場觀察的諾里。諾里咪咪仔笑，對橐袋仔內扲出手機仔。

「家己愛算一下距離，一直咧衝佗一日摔做肉餅就袂意外。」伊對著小明說。

「哪有球迷看球員卸面子閣笑甲誠大聲啦！」

「敢講無其他的球迷會按呢好心做建議？若是早就用手機仔放話剾洗啦！」小明雖然毋甘願，但伊嘛清楚家己面對這个青磅白磅的對手是有偌爾仔受氣，干焦會當共伊瞪。

毋過諾里雄雄出現，爿仔的工課人員擋袂牢叫伊起來，看著四周圍的觀眾欲入來矣，加上客隊嘛過來伸展，看範勢是欲來一場練習賽。諾里就順紲起來，

觀察這个新球隊。

練習賽當中，起手主隊就佔領贏面，今仔徛頂投手丘的方小明雄雄咬冷筍，想的是袂當就按呢摃敗。看台頂袂少人暗自感歎，竟然派一个臭小囝做先發。諾里反倒看的是原本閣咧備戰中的捕手。

頭前的捕手嘛是咇咇掣，干焦會當佇小明暗示講「上好照我的指示去投球」，拄好這個時陣，家己就投甲亂操操，客隊嘛佇其中提足濟分數。諾里看著代誌真正不妙，想欲講話，煞去予爿仔的球迷予拍斷。拄好看台前側有啦啦隊的應援，就按呢…

「方小明，投出去，甩砲出擊，無人通比！！」

「喂喂喂！這位先生！哪有投手有做應援啦！」毋但頭前的應援團長，連爿仔的球迷嘛綴咧怨歎起來，在場的小明的毋知是按怎，哪會有人模仿起頭拄仔的摃者，閣比奇巧的動作，敢講…

「看佗位啦，看我啦！」捕手一聲喝，煞予小明領悟著啥物道理，嘛是仝款投出下一粒球，結果青盲雞啄著米，打者一時輕鬆無注意變成一好球，紲落順利投出兩好球，敢有可能直接三振落去咧…

「上好啦！哪有可能一擺共我三振去！」這名打者，決定一擺做一个解決，這點小明的想法嘛相𫝛，就按呢雙方動作綴牢牢…

「OUT!!」比賽結束，雖然主隊無贏著媠氣的分數，毋過小明總算了結比家己上厲害的彼个對手。只不過阿西教練較希望小明基本的投球嘛是愛加強。

到暗頭仔，全隊攏款好物件準備上車，小明嘛仝款繳有著，殊不知手機仔雄雄喨起來，看著阿母一直咧敲的電話，閣因為掠著考試考無好，嘛予警告講愛放棄野球。這下予小明驚甲毋敢離開。

「是按怎無共逐家轉去？」諾里自觀眾席看小明。

「我無熟似你的講，是按怎雞婆幫我啊！」小明氣甲想欲號。

「按呢講，顛倒好心予雷唚--neh。」

「我嘛無講欲需要，這馬好啦，今仔日摃遐䆀，轉來閣予爸母罵到臭頭！」諾里聽起來真有感想，因為以早做學生嘛是按呢，只是親像家己仝款，自囡仔摃到這馬的球員已經愈來愈少矣，傷驚的是敢會因為受傷抑是一時的不如意，甚至是一寡袂負責任的建議就隨喝放棄!?想想咧按呢毋著，但是話攏講到遮矣，只好…

「原本看你面對閣較厲害的對手閣有法度笑笑咧面對，表示你抑是對野球有一定的熱愛，結果你落來煞變甲遮爾無膽，一點仔袂像人講的男子漢，既然按呢，規氣就莫摃啊！」講來遮，諾里的喙已經咇咇掣，而且這是以家己的經咧對野球界的後輩對話，因為摃野球這條路真正無好行。

「誰講我無愛摃，我會堅持是因為我的爸爸，伊較早就是摃野球的，自細漢開始看伊比賽攏感覺足厲害，甚至有一日會當像伊仝款，結果一擺受傷予伊袂當閣繼續家己的夢想，就憑家己的興趣開一間麵擔，但是生理煞無變好，講到遮阮媽媽就無希望厝內莫有人摃野球，就是按呢我才會…」閣講落去，小明開始咧流目屎。

「我才會毋管媽媽的反對摃落去，嘛希望會當佇野球界揣著家己的位置，叫我愛轉去讀冊，我就毋知閣有法度追著逐家，是按怎愛實現家己的夢想遮爾困難啊！」諾里伸出雙手欲安慰吼袂停的小明，結果小明擋著。

「若是我投球、甚至感覺毋甘願的時閣需愛有人安慰，啊毋就親你講的，袂像人講的男子漢，你莫當做家己足gâu就共我壓落，總有一日，我絕對想辦法通對付你！」諾里聽到遮差一點仔笑出來，因為哪有人今仔熟似就隨嗆聲啊？至少確定的是，小明是誠有自信上巴士轉去的。

天嘛漸漸烏，腹肚嘛枵矣起來，諾里咧想講愛按怎轉去的時陣，進前拍無去的貓仔閣出現矣，原本欲向前教示，結果予諾里一个特別的物件，了後閣消失到毋知佗位去，諾里展開頂懸的橐仔，結果是一个足大粒的飯丸。

「算你誠乖。」諾里講煞就提出手機仔，共頭拄仔應援舞的影片傳予恩可看，講是轉來欲予伊跳全壘打舞的「特訓」，順紲共伊閣有進前受傷的小豪約時間食飯話失禮。毋過先愛想辦法揣著轉來的路，因為嘛閣愛共提著的變身劍還轉去。

講來遮，佇金城的門跤口，八點檔的工作人員已經欲歇睏矣，演員嘛綴著經紀人的跤步做伙轉去飯店，干焦導演家己一个人咧看城門，閣有討袂轉來的變身劍…

<本文完>