山寨探案實錄 阿Sir我今日無出街！
山寨探案實錄 阿Sir我今日無出街！
https://youtu.be/DTWLswHjxhI
陳華炎1949年在內地一個漁民家庭出生，十一歲時父母雙亡，由舅父養育成人，沒接受過教育，是一個文盲。
1965年，陳華炎由內地偷渡到香港定居，1967年誤交損友開始吸毒，1968年開始犯案。
陳華炎回內地結婚，婚後育有三名子女，分別於1994年至1998年出生，妻子未能來港，三名子女由陳華炎撫養。
1999年，陳華炎因吸毒導致精神出現問題。
2001年9月入住葵涌醫院，有自殺傾向，意圖吊頸自殺不遂，一直有服用精神科藥物。
陳華炎有三十九次案底，包括搶劫、襲擊他人、入屋犯法、管有危險藥物等等。
2002年6及9月，陳華炎在旺角海富苑，搶劫兩名老婦約六千元綜援金。
2003年4月，因兩項搶劫罪成判監七年。
2007年，陳華炎出獄，與由內地來港的妻子及三名子女同住，一家人靠領取綜援維生。
2010年8月，陳華炎接受肺癌手術，健康欠佳。
周艷（40歲)是內地人，2011年12月，第二次持雙程證以訪客身份到香港，入駐廟街一間一樓一鳳，從事性服務。
12月31日下午約一時三十分，周艷到廟街街上招客，問途經的陳華炎：「去不去？（性服務）」
陳華炎點頭，兩人一同回到周艷的住所。
陳華炎進入單位後鎖門，之後進入洗手間，周艷脫去衣服，只穿內褲在牀上等候。
陳華炎從洗手間出來，以鎅刀鎅傷周艷臉部，再由腹部鎅至下陰，再鎅傷兩條大腿，搶走周艷一個手袋，內藏一千七百元，兩張提款卡、價值千多元的手機。
周艷高呼救命，周艷的郼居兼相識二十年的鄉里楊萍（38歲)，拍門查詢時，陳華炎開門，鎅傷楊萍右下腹約十釐米後逃去。
楊萍找房東及報警，兩人送往伊利沙伯醫院治理，醫生發現周艷身上面有五處深度裂傷。
一，前額有一條十一釐米長割傷。
二，從左眼角至上唇有一條十二釐米長割傷。
三，右邊腹股溝有一條十五釐米長割傷。
四，兩邊大腿前方各有一條十釐米長割傷。
周艷接受急救手術修復割傷。
探員在現場找到鎅刀膠殼及少量刀片，根據周艷描述疑人外貌，在油麻地一帶搜捕疑人，未有發現。
探員根據案發現場附近的閉路電視線索，晚上到將軍澳健明邨，在陳華炎家中將他拘捕，檢走一雙染有血漬波鞋及少量刀片。
陳華炎在警誡下說：「阿Sir，我今日無出街！」
否認到過案發現場，不知為何自己的波鞋會染有血漬。
周艷留院至2012年1月3日出院，陳華炎波鞋上的血漬，證實屬周艷所有。
警方落案控告陳華炎兩項有意圖傷人罪，一項搶劫罪。
2012年7月26日，案件在高等法院審理，陳華炎否認控罪。
周艷獲律政司豁免起訴（賣淫)，安排在法庭以屏風遮擋作供。
周艷說被鎅時不感到很痛楚，驚慌得站在牀上，不斷以普通話大叫「救命！來人呀！」
鄉里楊萍拍門查問，男子衝出房間，她害怕得要待楊萍告知陳華炎已走才敢出房。
7月30日，陳華炎在高院自辯，強調沒有襲擊他人或搶劫。
當日確曾到過案發地點附近房間享受按摩，聲稱之前接受患肺癌手術後，身體變得乏力及失去性能力，故只進行按摩。
脫衣等待時，聽到房外有人叫「救命」及「打劫」，他擔心安全先行穿衣離開。
期間在走廊踏到一些血漬，見到一名女子站着叫救命，但他沒有看清楚。
之前與警方錄影會面時否認到過案發現場，是因怕妻兒知道自己上去按摩。
8月1日，陪審團退庭商議三個多小時，裁定陳華炎傷害周艷罪名成立，傷害楊萍及搶劫罪不成立。
控方隨後披露，陳華炎有三十九次搶劫及傷人等案底，懷疑有暴力傾向，擔心他會危害社會。
法官決定先索取心理及精神等報告，押後至本月29日判刑。
8月29日，陳華炎代表律師求情時指出，陳華炎沉淪毒海三十多年，2003年入獄後已成功戒毒。
暫委法官黃崇厚判刑時指出：「你干犯嘅罪行十分嚴重，明顯係有備犯案，並非一時理性受矇蔽，帶備可以傷害他人嘅鎅刀，藉詞尋求性服務，令到事主與你獨處一室，而且脫去衣服，放下戒備之心。」
「喺咁嘅情況下，你不發一言就向一位毫無防範嘅女士施襲，不止一次用鎅刀鎅傷佢嘅臉部，亦都鎅傷事主身體其他部位，從呈堂相片可見事主流咗不少血，佢需要接受手術治療，留院三天。」
「毫無疑問，女士都會十分珍惜佢嘅臉龐，被人咁樣鎅傷臉部，傷害同埋憂慮不言而喻，何況事主從事嘅行業，臉部受傷甚或影響生計，呢啲情況被告人你係完全知道，你咁樣出手，居心極為不良。」
「事主所受嘅傷唔輕，從相片可見，傷勢係嚇人，尤幸醫治得宜，初時留喺臉上面嘅疤痕，現在已經無當時咁明顯。不過，事主喺作證時候，見到佢自己傷勢嘅照片嘅反應，可見佢嘅心靈創傷依舊。」
「呢一類案件，如果控方備有事主醫療進展報告，同埋心理創傷報告，對法庭評估恰當判處大有幫助。不過控方無預先準備，未能向法庭提供呢啲資料。」
「當法庭向控方提出要求，聽取呢啲資料嘅時候，控方知會法庭，現階段事主周女士急欲返回原居地，不再為事件操心，因此我所講嘅報告已經不能夠提供。」
「喺咁嘅情況之下，本席喺判處嘅時候，只能夠以上述嘅觀察為依歸，即係周女士嘅傷勢並無引致長遠嘅肉體傷害。不過佢臉上面留有疤痕，雖然已經無當初咁顯眼，但係原本嘅容貌不再，至於心理創傷，本席認為依然係有嘅，但係因為缺乏資料，所以唔會以心理創傷屬於嚴重程度嚟考慮。」
「你立心向一名，以俗稱『一樓一鳳』為業嘅女士下手，亦都係法庭不能輕視嘅。因為以咁為業嘅女士，處身於一個易被侵犯嘅工作環境，不法之徒利用呢個情況去犯案屢見不爽，上訴庭喺不同嘅案例，都已經指出，呢個係法庭喺判處時應考慮嘅因素之一。」
「本席獲悉，你正在接受精神科治療，所以喺判處之前，聽取咗精神科醫生報告，同埋心理學專家嘅報告。」
「精神科醫生指出，你喺2001年9月因為不勝精神壓力，進入醫院接受精神科治療，當時嘅診斷為嚴重抑鬱，經過醫療後情況好轉，留院三個月之後出院。」
「但喺不足一個月，你再次入院，當時你投訴失眠，情緒低落，缺乏興趣同埋積極性，經過兩周治療後出院。之後數年你嘅精神狀況係穩定嘅，不過去到2007年你覺得被跟蹤，相信有人要殺死你，聽到不存在嘅人叫你去死。」
「當時醫生嘅診斷，係你患上思覺失調同埋人格失調，經過服用藥物後，你嘅精神病病徵已經無咗，而你亦都一直定時到醫院覆診，亦都遵照處方服食藥物。」
「最後一次覆診喺今年6月25日，醫生指出，你嘅精神健康狀況喺近數年已緩解，再無精神病患同埋情緒問題嘅徵狀，醫生未能夠確定，案發時候你嘅精神狀況係點樣。」
「心理學專家指出，你嘅智力係正常，佢認為你係一個缺乏人生目標，同埋容易衝動嘅人，佢亦都認為你可能由於生活上不如意同埋困苦，曾經縱情毒物。」
「資料顯示你吸毒多年，不過後嚟當你成功戒除毒癖後，對社會不滿嘅情緒已經減輕，專家亦都指出，無證據顯示喺干犯本案之前，你係一個有暴力傾向嘅人。」
「專家未能夠確定，你干犯本案是否同任何心理問題有關，亦都未能夠確定，你是否有明顯嘅暴力傾向，佢認為你再犯暴力罪行嘅風險，係中度嘅。」
「你嘅辯護大律師向法庭細說你嘅坎坷人生，佢話畀法庭知你喺十一、二歲嘅時候，已經父母雙亡，由舅父養育成人，可惜未受教育，加上結交咗損友，終於沉淪毒海三十年。」
「期間你無做過甚麼正式工作，因為要應付吸毒嘅開支，多次犯案，毀咗人生，你現年62歲，喺牢獄中度過咗不少歲月。」
「結婚之後你育有三名子女，現年分別係15至18歲。初時妻子仍然要喺內地居住，未能夠來港，你要父兼母職，喺種種壓力之下，精神健康出咗問題，不過經過治療後情況已經大為改善。你而家已經戒除咗毒癮，妻子亦都表示會支持你。」
「本案嘅情節係嚴重嘅，而且你可以稱得上係案底纍纍，你之前共有三十九次被定罪，干犯嘅罪行林林總總，包括搶劫、襲擊他人、入屋犯法、管有危險藥物等等。你嘅刑事罪行記錄追溯到1968年，最後一次被定罪喺2003年4月，因為兩項搶劫罪被判監禁總共7年。」
「刑滿出獄後，不過只係三年你又再犯事，而且干犯嘅係嚴重罪行，雖然呢一次係你第一次因為有意圖而傷人罪，被判罪名成立。不過你之前已經多番干犯同使用武力有關罪行，之前嘅判處刑罰其效不彰，本席認為因為呢個緣故，量刑起點應該提高六個月。」
「總括嚟講，本席認為一個五年半嘅最終量刑基準係合適嘅，先至足以反映本案嘅性質同埋嚴重程度，與及背景情況。」
「本席顧及精神科醫生同埋心理學專家，為你撰寫嘅報告。雖然你嘅精神健康仍然需要跟進，不過從兩位專家嘅報告，你嘅精神健康狀況，與你干犯本案並不見有明顯關係，雖然仍然需要跟進，但係醫生認為住院治療並無需要。」
「直至醫生與心理學專家會見你嘅時候，你依然沒有半點悔意，依然堅持自己無干犯本案。喺今日你嘅大律師向法庭表示，你現在已感到懊悔，願為自己曾經做過嘅事承受責任，本席對你喺呢一方面嘅誠意大有保留。」
「考慮咗整體情況，顧及你嘅大律師求情陳詞，亦都顧及你年紀相當，本席不認為案中存在任何足可減刑嘅因素，因此判處你就本案監禁五年半。」
