不專業講《我們的足球場》

不專業講影視漫（二）

不專業評論《我們的足球場》

1. 今次想同大家講既係一套非常非常舊既漫畫，但係佢可以算係我睇過咁多套已經完結咗既運動漫畫之中，可以位列三甲既運動漫畫，如果齋講足球漫畫既話（都係已經完結咗既），佢更加係直至我心目中覺得最好睇既足球漫畫。

2. 呢套作品就係由村枝賢一所繪畫既《我們的足球場》，我覺得呢套漫畫真係好好睇，但唔知點解，當年係冇動畫化過。不過又咁講，我都係佢完結咗之後好一段時間先開始睇，真係唔知當年呢套嘢受唔受歡迎，但觀乎呢套嘢可以出到34卷，我估都應讓唔差啩。

3. 雖然部份人物既造型都係好漫畫化，但事實上佢係一套偏向寫實既足球漫畫。

4. 以下內容可能開始會有劇透，未睇又有興趣睇既朋友，響碌落去之前可以諗諗先。

5. 其實頭幾集已經好正，就係講主角高杉和也同佢果個皇牌足球員爸爸高杉貫一既關係，同埋響細個既時候點同另一個主要角色騎場拓馬相遇，不過之後因為一場交通意外奪去咗高杉貫一既生命，而令主角高杉和也放棄足球。個故事就係由佢高中開始點樣重拾足球開始，然後響阿根廷留學踢波，再返黎日本踢J League，然後到最後帶領日本響世界盃外圍賽脫穎而出，響98世界盃分組賽上面決戰有宿敵達米安在陣既阿根廷。

6. 雖然有成34期咁多，但係基本上《我們的足球場》除咗一開頭高中足球比賽果度悶啲之外，由高杉和也奪得高中足球比賽冠軍開始，一路到最尾世界盃分組賽都全無冷場，而且最重要既係佢既結局有一種遺憾美，就好似《Slam Dunk》一樣。日本隊雖然響小組賽第一場以三比二險勝阿根廷，但係因為傷兵同埋停賽關係，第二、三場全部輸晒冇得出線，只能夠寄望下屆。不過都因為日本隊球員出色既表現，所以「落水狗」(漫畫內日本國家隊類似影子隊既球員)，差唔多全部都有得外流。

7. 講影響力，神仙打交既《足球小將》無可否認係日本咁多足球漫畫入面最有影響力既，但如果講到好睇，我真係首推《我們的足球場》。劇中既主角高杉和也並唔係好似戴志偉咁開外掛，佢係果種體力極度充沛，而且係越踢越有貨既球員，佢射門能力好強，同埋做到團結日本隊新舊兩代既工作，但如果講技術既話，其實漫畫入面有唔少日本既球員都好過佢。

8. 而且高杉和也並唔係好似《足球小將》果啲神仙咁快可以外流，又踢巴塞又踼祖雲達斯，高杉和也響漫畫入面絕大部份時間都係效力緊J1升班馬，佢死鬼老豆既球會東京山賊(前身為山城自工)，佢顧住響日本封王稱霸做土皇帝，結果就係比佢響阿根廷時認識既宿敵達米安遠遠抛離，仲比達米安寸佢究竟返咗日本既呢幾年響度做緊乜嘢。總之高杉和也比起戴志偉更加似一個現實既足球員，睇住佢後尾參加日本影子計劃落水狗做武者修行，慢慢拉近返同世界既距離，果一part真係唔錯。

9. 個人覺得最好睇既係世界盃既亞洲盃外圍賽，尤其是當鹿野領隊同高杉和也講，響對南韓、沙特、伊朗同埋烏茲別克四場分組賽入面，佢會一場不漏全部上陣，果一種責任感同埋加諸響高杉身上既壓力，真係可以感受得到。

10. 呢套作品除咗足球之外，描寫高杉和也既友親、親情同埋愛情都非常全面，尤其是親情，一路響作品穿插和也對佢爸爸既回憶，同埋佢爸爸撞車死果集真係睇到眼濕濕、鼻都酸。

11. 當然喇，而家睇返《我們的足球場》入面既背景，可以話係有一種彷如隔世既感覺。作品初期既時候甚至係連J League都未成立，球員都要響佢哋既母公司入面打工，第一次進軍98世界盃既時候，仲係比人睇成係弱旅，同而家已經成為亞洲一哥，不斷向歐洲輸出有實力既球員真係完全唔同。

12. 但即使時代背景有差，呢套作品我覺得依然有一睇既價值，佢連載既時候未必有《足球小將》咁受歡迎，但絕對係我心目中最佳既足球漫畫。

更多專欄內容︰ https://www.leafopenleafopen.com/unprofessional9up

#漫畫評論 #讀後感 #我們的足球場 #足球好小子 #村枝賢一 #高杉和也

#漫畫評 #漫畫 #中文 #日漫 #足球漫畫 #足球

廣告時間 -

ig: leafopen3instagram.com/leafopen3

fb: leafopenleafopenfacebook.com/leafopenleafopen

方格子 https://vocus.cc/salon/leafopenleafopen

如果有興趣睇下我既其他寫作作品，可以上 leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B

如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938