Taⁿ害--ah， 今阿日1醒--起來soah 變中國人--ah。我心koaⁿ phī-pho̍k-chháiⁿ， 知影代誌大條--ah。我人佇台灣，tòa ê厝， 穿ê衫，啥米隴無變，只是心內起hiong-kông，無法度出國--ah，chín沒法度轉去找佇德國ê後生，欲按怎？ 我ê尪， 伊德國人， 現在會使走， 伊 soah毋知欲走iah毋走。

拄才手機收tio̍h 訊息， kóng 我ê 社會 計分 無 夠點， 佗位mā攏袂當去。這 無 意外lah， 過 去 做 遐爾 濟 人權 ê 代誌，不管是阿扁--a iah是李明哲我攏有chhàm tio̍h，佇德國四界找人簽名，寄去予馬英kap 習近平， koh 做 過兩任 德國台灣 協會會長，現在台灣變中國ê--ah， 免 講嘛 知， 我按怎 mā袂當 出境。 是 講 ， in用 手機á按呢送一ê通知,著無法度予人買票坐公車,嘛無法度坐火車,koh-khah mài kóng 坐飛-lêng-機,現在我 去 到佗,mā攏無夠點通買車票kap機票，,幹伊娘leh, chín 是欲 按怎？ 佗位攏走袂離,誠實有夠害。

有影--lah，中國開放--ah，逐家攏趁著錢，看in面色，講欲『一國兩制』予咱比中國彼ê人擱卡自由，維持過去咱台灣有ê現狀，in 會送人來讀書、旅遊、消費、哪有啥米bái？咱會當趁大錢，旅社住滿滿，鳳梨、釋迦、石斑攏袂擱予中國找麻煩，貨銷出去，錢趁進來，台灣發大財，就是按呢，逐家擱卡好額，檢差是袂當親像過去按呢講欲出國tio̍h出國，甘有什麼損失？

做生意--ê是頭1ê贊成ê，in 歡喜kah喙攏合袂起來，in 若欲出國， 申請真簡單，in 講「手刀」畫畫--leh，chhìn-chhái tio̍h ē-tàng通過。A若親像阮這種予點名做記號ê，欲出門 著敢若欲登天--leh，寸步難行。

進前佇德國ê時，逐家攏kā我勸，叫我袂轉去台灣，講台灣真危險，毋湯gāng-gāng轉去，轉去著袂tit出來--ah！我講，我是護士，若相戰我會使tàu出力，無咧驚。Taⁿ轉來台灣bô寡久，投票liáu，隔轉工tio̍h宣布咱變成是中國--ê，in kan-nā kā 咱講有寡人會收tio̍h信息，其他--ê啥物攏仝款。逐家日子照過，歌照唱，舞照跳，甘若chhun我1--ê leh煩腦袂當 出國。

早若知影台灣會變這種天，我就袂轉來選，選了煞變天，袂赴走。Kán！

想tio̍h過去種種，我誠實是有話無tè講...