【從林柏特被炒反觀劍擊世界 家長安心放手才是最佳對策】
2021/02/03閱讀時間約 2 分鐘
若果大家有留意足球的話，相信都會知道車路士名宿林柏特，擔任球隊主帥一季半之後，慘吃無情雞，正式結束於車路士嘅日子。
車路士自「油王」阿巴莫域治自2003年入主以來，三不五時易帥已經係平常事，剛上任嘅杜慈（Thomas Tuchel）已係第12名教練。
車路士領隊呢份工唔易做，要有成績係必然，要湊上司係另一個必然。車路士主帥一職以上，仲有一個叫格諾芙斯基雅（Marina Granovskaia）的女子，佢係車路士行政總裁，無論邊個執教都無所謂，因為呢位「西太后」先係幕後操盤手。一旦教練不合佢心意，好簡單，三兩下手勢就可以搞走一名教練。
林柏特今次其中一個死因正係戰績差，車路士解僱林柏特聲明中，先禮—感激林柏特貢獻；後兵—批評帶隊成績差，難以達到球會期望，最終決定除之而後快。
林柏特戰績真係差？上季基本上靠一班新晉球員，最終以第4位完成聯賽，取得歐聯資格，不算失禮。今季有錢有Power，轉會市場狂掃心頭好，一度聯賽9場不敗，最近聯賽低迷，4場贏唔到波，隨即落刀，對林柏特公唔公平呢？
林柏特的故事，換在劍擊世界，是否似曾相識呢？劍擊界的「西太后」比比皆是，佢哋就係掌握生殺大權嘅家長，只要佢哋一聲令下確實可以落刀。每位家長都希望畀到最好小朋友，望子成龍係人之常情，唔少家長不論子女練習或者打比賽，一樣𥄫到實，絕對理解，緊張子女嘛。唔少熱心家長更加會從觀察中學習，研究一些獨門招數，教子女比賽入面「出超必」擊敗對手，又可以距離獎項一步。
退後十步，點解要出招呢？因為想贏，點解要贏？會唔會係因為家長們覺得付出咗金錢就要有成果呢？
如果站在一個消費者角度而言，學得好，有成績，繼續學；學得差，無成績，斬纜轉會，無可厚非，獎項，的確係一個最簡單、易明嘅方法定奪一個劍手成功與否，唔少家長經過幾次比賽然後轉會、換教練，出發點必定係為小朋友著想，但咁樣做係咪最有效？
每次轉教練，劍手都要重新適應個教練，人夾人緣，最好嘅教練唔代表就一定係最適合，而且磨合須時，若果一年半載無成績又換個教練，基本上劍手嘅時間就用晒去適應新教練，而家長都要相信教練，而唔係動輒就更換教練，畀多啲空間同時間，效果可能更佳。
有獎，當然值得高興，並不代表無獎就係打得唔好，畢竟劍擊呢一項運動係需要時間，好難一下子靠一兩招「超必」，就算做得到，都可能只係好短時間，基本功做好先係致勝關鍵。
林柏特被炒，換轉另一隊勁旅曼聯，領隊蘇斯克查都有一段時間相當接近被炒，最後無炒到，而家聯賽排緊第二，證明好多事情唔可以即食，需要時間慢慢浸，時候到，成績自然來。
留言0
查看全部