【走揣Cháu-chhōe】Google搜尋：台文系？！——逆境中的生存美學（台語版）

作者：林紀甄
翻譯者：林佳瑩、王俞雯 （本篇以台灣教育部羅馬字書寫）

若是去網路社群平台頂面揣kap成大台文相關ê文章，咱定定會看著像「分數低」、「出路窄」這款ê評論出現，社會大眾tùi成大台文ê印象是無偌好，成大內底mā真濟學生是按呢看待台文系。逐擺若到開放申請轉系ê 時，類似Dcard這款ê大學生社群lóng會有「佗一個系上儕人轉出去」ê討論，「台文就是轉系跳板啊，不然待在裡面四年也學不到什麼屁專業，還有畢竟是成大分數最低的系，學生程度水準以我之前接觸過幾個來我們系旁聽的經驗，都蠻低的。」、「台文神跳板欸，轉20個超猛的欸，隨便考隨便進，然後隨便轉。」、「台文要不要乾脆改名叫大一不分系好了。」像這款 leh kā台文系khau-sé ê留言真濟，tsiap-tsiap[2]引起學生之間「戰系」ê情形，「跳板系」mā變做台文系ê外號，m̄-koh台文系敢lóng是大家所想ê按呢爾爾？為啥物社會大眾對台文系ê印象大部份lóng無蓋好？TĪ這款風氣之下，台文系又koh欲按怎才有法度行出予家己生存落去ê路leh？

考慮著大學畢業了後欲揣頭路ê壓力，真濟學生因為成大ê「名校光環」、「企業最愛」來kā成大選做第一志願，家長mā鼓勵囡仔kā五大名校「台成清交政」當做目標，高中ê風氣mā是按呢，tùi私立高中畢業ê受訪同學Ｌ講，學校為著有「好看」ê榜單，會逼學生tī志願單頂填名校，lóng毋是照學生真正ê意願落去添--ê。因為大學猶koh有「轉系」、「雙主修」這款予學生改變科系ê機會，學生著會想講「先入去khah koh拍算」，台文系ê入學難度koh比理工、醫藥相關ê科系khah低，自然予遮ê學生當做in ê「跳板」。

學生leh選志願ê時mā會考慮著這个系ê課程敢有符合家己ê興趣，毋過大部份人對台文系課程ê印象lóng是學講台語、讀文學、了解台灣歷史文化這款khah「輕鬆、趣味」ê內容，親像無啥物專業性，毋過其實這lóng是ài透過「語言學概論」、「文學理論與批評」、「文化研究」這款理論運用和分析ê課來訓練，才會使對智識有較好ê掌握和理解，本土語言書寫ê系統mā是ài開真濟時間練習，suah lóng無予逐家看見 ，甚至定定有人kā台文系kap中文系lām做伙，無注意著台文系獨有ê課程脈絡（me̍h-lo̍k） 。大眾tùi台文系ê senn-hūn kah 狹kheh[3] ê想像，所以產生「tī台文系學袂著物件」ê誤解，mā khut-kē [4]台文系智識ê專業度。另外台文系大多數ê課程lóng用申論題當做考試ê方式，報告kap作業mā以思考、分析為主，注重培養學生獨立思考kap論述ê能力，bô通用ê公式抑是標準答案，只要有法度提出家己ê看法、而且用合理ê論述kap實例去論證，就會使提著袂䆀ê分數，suah造成學生有毋免付出偌濟心力著會使及格、tshìn-tshái應付mā會使提著學分ê印象 。

成大轉系ê條件kah分數、系上名次有真大ê關係，學生為著欲提懸轉系ê機會，定定會選課又koh涼、分數又koh甜ê課程來上，台文系ê課程因為予學生真大ê自由度，分數mā改了khah鬆，就有真濟別系ê學生會想欲輕鬆提學分，無就是為著欲提懸家己成績單ê平均分數才來台文系上課， mā因為按呢台文系ê課就漸漸有「涼、甜」ê印象傳出去。

台文系轉系ê人數濟是事實，毋過除了一開始就暗算欲轉系才入來台文系ê人以外，猶有一陣人一開始是真正想欲來台文系「試看覓」，希望會使tī遮揣著興趣、揣著目標，毋過tī這兩冬ê過程中漸漸確認家己無適合台文系，才想欲轉系。

台文系課程予學生ê壓力khah細，必修課少、選修課真濟，主題mā真多元，按呢設計是為著欲鼓勵學生去探索家己真正有興趣ê物件，袂予系上ê課縛tiâu-tiâu，毋過因為按呢，mā減少予學生認捌台文專業ê機會，造成無法度kā學生留落來ê危機。而且這款予學生家己安排欲學啥ê設計，對大學一年仔拄對高中這款欲學啥、讀啥lóng有人安排好好ê環境入來ê時，就會造成學生親像失去方向ê船仔，毋知家己欲開向佗位，幾若位受訪者就表示講一、二年ê課毋知leh教啥，mā毋知家己有學著啥物。其實一、二年ê課有建立學生台文基礎智識ê責任，mā應該ài教學生以後欲按怎tī台文這塊做研究抑是學習，毋過目前看起來koh有真濟ài改進ê所在。

台文系ê課程雖然真多元，mā有真濟無仝專業ê老師tī--leh，毋過逐門課之間ê連貫性無懸，學生學著ê物件就khah破碎，而且有ê課程學了初層--ê就無koh有khah進階ê課，變成學生lóng遮學一寡、遐學一寡，無法度成做一个有系統ê智識體系，不管是本土語言課抑是其他選修課lóng加減有拄著這款問題。Mā因為一、二年ê課有這款狀況，學生就會產生毋知繼續留tī台文系會使學著啥物「有路用」ê智識，mā漸漸有想欲轉系ê想法，致使轉系變做一个台文系ê風氣，甚至未來會有愈來愈濟ê學生是以轉系為目標來申請台文系，予真正對台文有熱情ê人koh愈oh[5] 入來。

毋過，tī台文系敢真正無法度學著「有路用」ê智識？人leh講ê「有路用」到底koh是以啥物標準來判斷--ê？這个標準敢真正有適合提來用tī台文系頂懸leh？

為著順應這馬真工業化、商業化ê經濟情勢，台灣長期以來lóng kā理工相關產業ê發展做主要目標，理工相關產業因為有法度推sak國家經濟發展，mā有khah具體明顯ê成果會使予逐家看著，所以社會大眾普遍lóng真看重這个產業，而且這款注重「產值」ê價值觀mā漸漸tī台灣人ê心內釘根。

Tī這个背景之下，理工相關ê科系因為有較大ê工作市場，所學ê智識mā有明顯ê實用性，所以理工所學ê物件就予大眾認為是「有路用」--ê，比較起來人文相關ê產業和科系就無khah具體、會使計算ê產出，學生畢業了後mā無一條清楚對應ê頭路通行，對社會ê影響mā毋是會使sui看著--ê。除了按呢，根據勞動部到110年4月份針對包括27學門ê「大專畢業生各行業全時工作薪資」ê統計，理工相關ê學門大部份lóng有超過40,000箍[7]，人文相關學門像人文、語文、藝術，平均薪水lóng tī 35,000箍以下，而且比27學門平均ê 39,980箍koh較低，算是吊車尾。

社會用科系未來ê出路、薪水、發展機會來做判斷一个系敢有價值ê標準，致使系和系之間有「冷門、熱門」ê分別，人文學科mā長期予人貼上「無路用」、「毋知會使創啥」這款ê tag，忍受社會不時出現質疑ê眼光，真濟受訪者lóng對社會這款質疑有親身ê經驗，Ｓ同學就講著bat有一个成大校友對伊講：「我覺得台文系是成大最沒有用的科系，你有想轉系嗎？」；C同學mā講：「若沒有了解過台灣文學系的親友，第一時間聽到『我讀台文系』這句話，給予我的反應並不是真正替我感到開心，更多的是擔心。」

Tī這款社會無啥了解人文學科，koh有真濟固定ê歹印象ê情形之下，人文學科是愈來愈無受人重視，「讀人文bái」這个迷思mā真oh改變。毋過，用產值、薪水這種數字化ê結果來判斷科系ê價值敢真正有合？敢會kā一寡無法度用數字計算ê影響落勾去？人文學科注重抽象概念ê理解、人文素養ê累積，這對社會ê影響ài長期來看才看會出改變，而且成果mā毋是建立tī經濟、建設頂面，是反映tī社會整體ê價值觀和思想，人文ê訓練提供大眾思考社會、認捌家己ê機會，培養對家己以外ê人事物同理看待ê能力。台文系所拍拚--ê，koh包括予台灣人對咱跤底ê這片土地，有愈深ê了解、認同，通kā根揣倒轉來。

蔡慶樺tī〈蘭花之學──不安時代中人文社會科學的困境〉[8]文中，對各國ê教育政策和「智識經濟」[9]ê角度，探討人文社會學科ê困境，文尾寫著：「試著去與世界和解，在自我實現的過程中，也能試試看發展與社會對話、適應社會的面向，而不堅持社會必須全然適應我們。」既然社會對人文科系ê質疑袂遐簡單就消失去，按呢台文系ê學生欲按怎tī種種限制中揣出會使適應社會現實，koh會使滿足心內對人文思想ê追求leh？Tī遮阮希望會使提出幾種可能ê方式。

對課程來看，無論是文學、文化、語言抑是其他跨域ê課，學生lóng需要有敏感 ê觀察力，對無仝角度去看各種文本中ê脈絡，會使家己主動思考、分析文本背後掩khàm ê意義，最後組織出邏輯（lô-tsi̍p）合理而且準確表達家己想法ê文字／論述。Tī台文系學習ê機會毋是干焦老師對學生ê教學爾爾，身軀邊ê台文系同學mā會互相影響，Ｃ同學就講著：「在台文系遇到許多很有想法的優秀同學，有些人擅長學習語言，有些人熱衷寫作，也有些人致力推廣文化。彼此交流想法之後，發現每個人的志向都有所不同，也在談論未來的同時有所成長。」

台文系自由、多元ê環境是真濟學生上佮意ê特色，學生之間tsia̍p-tsia̍p交流，除了會使對同學ê身軀頂學著家己毋知ê代誌，mā會使tī過程中擲出家己ê看法，袂有啥物顧忌，Ｗ同學認為，tī這種溫暖koh友善ê氣氛中，學生會更加有意願去做家己無試過ê代誌。這款雙向ê溝通毋是干焦tī學生之間爾爾，師生之間mā是按呢。Tī這四冬ê學習過程內底，台文系tī無形中tsah予學生真濟養份，咱會使做--ê就是親像一塊海綿盡力去吸收，kā轉換做家己ê力量，隨時保持對任何人事物ê關懷，用開放ê心態去面對，經過冷靜ê思考和歸納了後，毋驚有立場，勇敢提出家己ê意見。

除了台文系予咱ê訓練以外，koh有其他積極ê方式會使幫助咱去適應社會。台文系課程ê壓力比其他科系koh較細，予學生真大ê空間去接觸無仝ê人事物，不管是外系ê課、社團抑是其他有興趣ê代誌，只要會使tī接觸ê過程中揣著一个清楚ê方向，無論這个方向和台文是有關聯抑是無，lóng會使kā tī台文系培養ê能力當做基礎，和無仝範圍ê專業做結合。關鍵就是學生敢有意願坦白面對家己，揣出家己真正有興趣ê代誌、掌握身邊ê資源和機會，主動行出家己ê跤步。

最後，若是咱拄著社會對台文系無友善ê眼光，咱仝款會使用開放ê心態去了解質疑ê聲音，抑是發現家己ê欠點，就主動開發會當適應社會koh補足缺失ê能力。對台文ê價值有認同，用台文系予咱--ê建立自信，毋免完全接受社會主流ê價值觀，mā 毋通和質疑ê聲音做冤仇人，揣著家己ê balance，建構家己ê生存之道。

[1]搜揣（tshiau-tshuē）：揣。華語：搜索、查詢。
[2]捷捷（tsiap-tsiap）：時常、定定。華語：常常。
[3]狹𤲍（e̍h-kheh）：無闊、真細，會使用來形容空間、腹腸、眼光等。華語：狹窄。
[4]屈低（khut-kē）：降低地位。華語：屈下貶低。
[5]僫（oh）：困難、無簡單。
[6]墘（kînn）：指位置上邊緣（pian-iân）ê部分。
[7]箍（khoo）：錢ê單位。華語：元。
[8]蔡慶樺，〈蘭花之學──不安時代中人文社會科學的困境〉，獨立評論＠天下，2016.06.14，取自https://opinion.cw.com.tw/blog/profile/289/article/4408
[9]智識經濟（tì-sik king-tsè）。華語：知識經濟。