電子書閱讀器「回本」日之回顧

滿懷欽佩咁睇完陳浩基《網內人》電子書嘅一刻，就象徵住手上呢部舊年喺官網購買嘅電子書閱讀器連原廠保護套正式「回本」。所謂「回本」，係因為電子版本嘅書通常係相對應嘅實體書零售價嘅六折左右，如果有特別推廣就更平或者免費，另外公有領域嘅經典書電子版都係免費下載（古騰堡網站）嘅。由於有呢個價差，換言之喺電子書閱讀器上面睇多幾本書，就可以彌補購買電子書閱讀器嘅支出喇。

因為之前無特別分享過，都想趁呢個里程碑講下點解當初會買電子書閱讀器，而佢又為我帶來咗咩好處。雖然網上講電子書閱讀器嘅文章都唔算少，閱讀風氣更盛嘅台灣書友都分享咗好多，但唔少人仍然對呢方面比較陌生，只係聽過因為係Amazon親生仔所以最出名嘅Kindle。我相信要推廣一樣嘢最緊要係有多啲用家分享，尤其係我成日勸人睇多啲書，當然好應該講下呢樣我認為好幫到人睇書嘅產品。但自問唔係咩達人，有啲書友買過十幾部電子書閱讀器，有啲會加新字型轉格式，我就覺得機器大概夠用就好，唔多整呢啲，所以當你發現我好多嘢都唔識答嗰時，請唔好見怪。

前文提到我自細會睇課外書，但喺返放工嘅時候就不免俗咁同全車打工仔一齊碌電話。幾年前有一日，我突然覺得咁樣好浪費，因為睡眠會將昨日事歸檔，早晨係頭腦最澄明嘅時刻，但我日日都將頭腦最清晰嘅時間瀏覽過目即忘嘅零星網絡資訊，繼而獻畀公司，實在好唔甘心。於是我開始長備一本書喺袋，用睇書代替碌電話。但帶實體書嘅缺點係書真係好重，當時有一本我十分推薦嘅書《好人總是自以為是：政治與宗教如何將我們四分五裂》（Jonathan Haidt著），孭出孭入咗成個月之後，我對膊頭終於強烈抗議，差啲提早肩周炎。呢一刻我興起咗「不如研究下電子書閱讀器」呢個念頭，先至開始留意呢樣產品。

市面常見嘅電子書閱讀器已經有四五個品牌，每個品牌旗下唔計停售咗嘅又有三四個型號，可謂琳琅滿目。同買所有嘢一樣，買之前最緊要清楚自己需求，再正嘅產品唔啱你用都無用。我嘅目標就係睇中文書、便攜同耐用。以下係幾篇關於電子書閱讀器嘅文章，可以參考。揀好咗之後仲可以去豐澤TechLife、誠品、灣仔城邦書店、新蒲崗Hyread辦事處等摸下啲機，另外會展書展都有攤位可以試用嘅。

同好多電子書友一樣，買完之後就覺得真係好值，尤其是睇400頁以上或者印刷字體好細嘅書時就最感受到個分別。呢部機小巧玲瓏，連埋保護套都唔夠250克，字體大細可以任意調校，相比起逾半公斤都好常見嘅實體書，睇電子書閱讀器時不論係手腕、膊頭同對眼都有如沐春風嘅感覺。

我嘅Kobo Nia大約喺舊年九月尾收到，即係使用咗唔夠十一個月就「回本」。呢個表只計算我喺部機度睇完嘅書，有幾本間唔中睇幾篇但未睇完嘅散文、圖文書其實已經無計入去，亦無計算實體書必然產生嘅額外費用（網絡書店運費或實體書店mark up嘅價錢），換言之呢個「十一個月回本」嘅估計係好保守。手呀眼呀嘅舒適度就更加係無價啦。

雖然有咗電子書閱讀器，但我無放棄過睇實體書，繼續去樓上書店買書同借圖書館啲書睇，一來好多書無電子版（因為電子書嘅版權係要另外簽，作者唔簽嘅話就算出版社想出都唔出得，另外因為現實因素，香港好多出版社仍然只推出紙本書），二來圖書館啲書係用我哋交啲稅買，預計睇一次又唔厚嘅書都係借閱比較化算（圖書館買書嘅錢已經budget咗，請大家唔好客氣，盡用購書建議叫圖書館買你想睇嘅書畀你睇）。亦因為實體書佔用咗我嘅時間，「回本」速度就慢咗，如果集中睇電子書就更快「回本」啦。

暫時諗到咁多，希望呢篇分享可以幫助苦於書好重、字好細、屋企無位擺書等等嘅書友開闢新天地。另外，我相信電子書都係大趨勢嚟，你而家入到樓上書店睇到檯面嘅台版新書，我諗七八成都已經出咗電子版，香港嘅年輕出版社例如夢繪文創、星夜出版、蜂鳥出版，都開始推出電子書。

但係由衷咁講，如果本身未培養睇書嘅習慣，買幾本書擺喺屋企吽幾年都無郁過嘅，電子書閱讀器都未必會令你突然變得鍾意睇書，尤其是Kindle，好多人覺得買咗可以改善英文，但事實上本身就唔睇開英文書嘅人買咗部機都係唔會睇。所以港、台電子書Facebook group 嘅書友，好多人本身屋企都有幾棟書山嘅。雖然大路嘅二手閱讀器都算幾容易轉售，但都希望大家唔好衝動購物啊。

其他相關連結：
香港電子書book group（香港人開嘅Facebook交流group）
電子書閱讀器討論區（台灣人開嘅Facebook交流group）
台灣電子書搜尋器（可以尋找你想睇嘅書喺邊個電子書平台有得賣）