細漢ê時陣，足無愛聽臺語歌，毋知影為啥物臺語歌攏遐呢悲哀怨苦，遮艱苦，為啥物閣一直唱一直聽？
就按呢聽華語歌到十六七歲，佮意著á-nī-mè開始聽日本歌，彼陣閣愛看有悲劇色彩ê人物ê小說（就是盜筆啦），愛著彼款共𪜶同齊艱苦ê感覺，小可知影悲劇迷人ê所在，才想著講較早遐ê臺語歌，敢若嘛是按呢。若按呢，彼當陣例聽ê人嘛是因為感覺「啊，這就是我ê心情」才會遐愛聽，遐愛唱，想欲共家己ê心情唱出來。
大學以後閣毋知佇佗位看著「在強權之下，台語文化婉轉含蓄的承接時代的哀戚無奈」大概是按呢啦，我嘛袂記啊。
chím-á 想起來，我敢若是對台語ê歷史來重新去看台語這ê物件，有時陣佇FB看著人寫ê長文，我攏會認真去看，看了嘛才過五六分鐘爾，有看過「南島語族的起源、台灣島是語系圈最北端」等等ê內容，Youtube嘛有台語誶誶唸，雖然講毋知影遮个講法是毋是學術界其中一个流派爾，是毋是閣有某無仝ê看法，我chím-má接觸ê著ê就是遮个。
實在是真趣味，只要是知影著進前毋知影ê代誌，我就會感覺歡喜，看著台語閣有我毋知ê代誌，感覺足好耍ê。
像這篇文章，我用台語拍，是真慢，佮拍華語袂比ji̍t，閣愛定定去查辭典，遮知影按怎拍，毋過查辭典ê時陣，敢若例查啥物魔法咒語，嘛是好耍好耍。
