[短文]呢個年代，請盡量避免用白板教書

前言

我講嘅白板，並唔係任何教學用嘅程式、app或者平台，而係實物白板。呢篇文主寫係寫畀所有教育工作者睇(主要係大學教授)嘅，我想講：

而家已經係2023年，請你哋都跟上時代嘅步伐，唔好再用白板作為你哋上堂主要嘅教學工具。

以我自己嘅觀察，仲用得白板上堂，仲要係全堂不斷寫寫寫嘅人，一係唔識教書，一係就係一個拒絕進步嘅廢老。當時代已經去到整powerpoint只不過係一件好基本嘅事，仲堅持只用白板與筆嚟教書嘅人根本就冇心教書。我唔係話唔用得白板，只係白板去到而家，只係一件輔助工具，你應該至少砌好一份筆記或者一個powerpoint，並跟返你整嘅嗰份筆記嚟教。

我知，總會有人話：「咁啲數式係需要喺堂上面逐步寫出嚟㗎嘛。」先唔好講，你整嗰份筆記係有列出步驟㗎嘛？仲有就係，你哋寫啲字真係好潦，同埋為咗就返塊白板嘅size，你哋啲字真係好細隻。又潦又細，想睇死側面同後面嘅同學咩？所以，唔該你哋與時並進吓，真係做返份好啲嘅筆記啦。

工具

首先，word同powerpoint呢啲嘢真係好基本。用word的話唔使講，可以轉pdf直出。Powerpoint嘅，最好四張slides為一版咁出，方便學生喺側面寫嘢嘅同時又唔會睇唔清，仲可以限制頁數。當然，真係復古老派啲嘅，我都見過有教授係scan自己寫嘅透明slides上網。雖然唔太好，但都好過你用白板。

之後就係進階少少，如果閣下有少少錢兼有少少意欲提升教學質素，請買部平板。我相信而家絕大部分嘅教學機構嘅課室都有projector，連部平板上去係十分之容易嘅事。平板嘅好處就係，兼顧到筆記同寫字嘅功能。而家嘅平板筆絕對勝任寫字，用得好嘅，學生學得方便，效率自然提升。

iPad

唔同智能電話市場，喺平板電腦嘅世界嚟講，iPad的確比Android優勝好多。除非你係連登電話台班癲佬，如果唔係iPad會係你比較簡單嘅選擇，因為有多好多開發者會專為iPad寫app，唔係android唔少app就咁用返電話版app就算。如果你係用iPad的話，只要你買咗塊iPad同枝apple pencil，就可以喺檔案呢個app開返你哋整嘅pdf出嚟，做簡單嘅繪圖功能(即係你哋最鍾意嘅寫字)。如果你有Macbook，仲可以整keynote，然後喺keynote上面寫字添。假設你願意花啲錢，有notability、goodnotes、noteshelf等等唔同嘅收費筆記app畀你揀，佢哋都各自有唔同功能方便教學。

iPad仲有個好嘅地方係Airdrop，你有Macbook/iPhone嘅話會更加方便。同埋唔少中學都開始有apple tv喺班房，你駁上個投影mon度都好方便。

呢個就係檔案app

Android

如果你真係因為各種環境因素而要用Android，咁samsung將會喺你唯一嘅選擇。不過，Android都唔係話冇優點，galaxy tab S系列有送埋枝功能強大嘅S pen(Apple pencil要另外買)。而且上面嗰堆多啲花臣嘅筆記app都要錢，但係galaxy tab本身就有裝samsung note，仲要功能媲美佢哋。如果你唔需要諗project落apple tv嘅可以諗諗。

總結

嗱，講咗咁耐，上面嘅嗰堆app全部都好易用，你班友一個月搵埋搵埋唔少，攞返啲出嚟提升教學質素都好應該啫(仲要有啲學校有提供iPad畀教職員)。咩話？做乜篇文淨係針對白板？冇計啦，鬼叫黑板有班執着黐線嘅支持者啫⋯⋯

https://www.youtube.com/watch?v=PhNUjg9X4g8