相信就算你唔太留意歐美樂壇嘅新聞，都好大機會睇到呢一段震撼嘅消息——解散五十三年，有兩個成員已經過咗身嘅著名樂隊The Beatles喺11月2號正式推出樂隊嘅最後一首歌——now and then。樂隊喺歌曲推出前後嘅兩日分別喺youtube上載咗12分鐘嘅製作短片同MV。
歌曲係同Love me do一齊作為single發售，有住「最初與最後」嘅意思。因為打住「The last beatles song」口號嘅關係，好多相關嘅碟一早已經喺官網被搶購一空。當然啦，今次now and then嘅黑膠其實都係紀念性質居多，我諗冇乜人真係放落部黑膠唱片機度聽，而我都只係買咗CD留為紀念就算，平時真係聽都係聽mora買嘅hi-res版同上youtube睇MV。
講少少故事，雖然係同Love me do一齊做single，但其實Now and then比原定計畫係遲咗廿幾年先出。時間返返1995年，嗰陣Paul McCartney收到嚟自小野洋子交畀佢，屬於John Lennon嘅遺物。呢堆遺物就係一啲John Lennon喺七十年代尾喺屋企錄嘅demo。Paul於是叫埋其他成員一齊，嘗試揀幾首出嚟整成歌——喺原有嘅人聲同鋼琴聲加埋其他成員嘅演奏。成件事主要嘅難度主要喺提升demo嘅音質。因為呢堆demo當時只係John Lennon喺屋企一路彈琴一路用錄音機錄，並冇特別為錄音室混音做任何處理，所以音質非常之差。喺成個錄音其間，剩返嘅三位成員除咗加返自己嘅演奏之外，仲要等其他人幫手用電腦嘗試分離人聲同琴聲，再放大人聲部分。
喺眾多人嘅努力之下，佢哋完成咗兩首「重組」後嘅作品：Free as a bird同Real love。喺紀錄片The Beatles Anthology同期推出嘅三隻The Beatles Anthology專輯上面，以一隻一首嘅方式收錄。而原定嘅第三隻，就係今次嘅主角now and then。
Now and then礙於當年嘅技術問題，冇辦法好好咁將人聲同琴聲分離，喺George Harrison嘅強烈反對下就冇將now and then放落第三隻Anthology專輯。喺2021年，由Peter Jackson執導嘅紀錄片The Beatles: Get back正式推出。當中用到唔少新嘅技術將當年get back project拍落嘅片段remaster，甚至分離聲畫。The Beatles: Get back嘅成功令Paul重燃完成now and then嘅諗法。於是喺同Ringo Starr商量過後，就將demo寄畀Peter Jackson處理。而Peter Jackson亦都成功將人聲提升至適合混音嘅水平，And the rest is history。
喺層層歷史元素嘅加持下，now and then當然係獲得空前成功，好似Abbey Road事隔五十年重返銷售榜冠軍咁，登上bbc radio第一(我冇記錯的話)。當中MV更加係喺一日之內就突破咗一千萬嘅view。喺銷售方面，除咗幾款7吋黑膠預訂嗰陣已經賣晒之外，象徵首歌起點嘅卡式錄音帶亦都提早賣晒。Remix過嘅紅藍精選碟一樣賣得唔錯。至於會唔會喺解散嘅五十年後再興返The Beatles？應該唔會嘞。
作為一個比較後生嘅fans，我對呢首歌一樣係好多感觸。先係慶幸佢最終都可以「出世」，其次係自己竟然有機會見證The Beatles出新歌，感覺非常fantasy。當中用到嘅一段弦樂間奏為整首歌增添一份厚重感，配合MV將舊片段key落現代畫面嘅做法，產生一種帶領觀眾穿越時空嘅感覺。而呢首歌亦都真係橫越時空嘅界限：John Lennon七十年代嘅demo，George Harrison九十代代嘅結他，Paul McCartney同Ringo Starr喺2023年嘅bass同鼓，仲有其他人嘅技術同努力，The Beatles再一次證明咗自己不受時間嘅限制。即使係五十年，甚至係更耐嘅時間，佢哋嘅音樂歷久常新。
