隨便搜尋了一張圖片
可能你睇標題嘅時候，又會諗：「寫咗一篇廣東話嘅文，又返返嚟書面語嗱？」其實關於呢篇文用咩嚟寫，都有猶疑過。始終中文讀者已經唔多，仲要再用廣東話，層層過濾落嚟，真係唔知剩返幾多人會睇。不過保衛廣東話係所有香港人嘅責任嚟嘅，何況就算我用書面語，睇嘅人都有限㗎啦，不如試吓用返廣東話嚟寫，等到「寫得出嘅廣東話」真係完全消失晒之後，都叫做有啲嘢證明佢嘅存在吖，係咪？
好，實在講得太多廢話，我哋返返嚟正題。喺我講藤原櫻嘅嗰篇文提過，喺學生時期嘅我，對音樂可以話係毫無好感，連帶對音樂遊戲都係。後嚟對音樂冇咁反感，自然放開對音樂遊戲嘅成見。冇記錯的話，嗰陣嘅Lovelive紅透半邊天，雖然我因為另一啲原因有接觸過相關嘅作品，但係都冇開始玩遊戲。
因為我係完全唔識玩音樂遊戲嘅。
嚴格嚟講，其實我而家都未係叫好識玩——我實在太廢，玩所有音樂遊戲基本上都只係應付到Hard難度。一上Expert，就已經唔知自己做緊啲乜。以前中學畢業之後同朋友去機鋪，我都只係睇，從不落場。不過又噉講，本身我班朋友去機鋪玩開嘅音樂遊戲都唔係好吸引到我，或者呢啲就係所謂嘅緣份未到啦。
噉，到底係咩令到我開始玩音樂遊戲呢？我同音樂遊戲嘅緣份到底喺邊呢？我覺得呢個世界有好多嘢都係整定嘅，正如冇人會估到原來香港回歸就係滅亡，我都唔會估到唔鍾意音樂同玩唔掂音樂遊戲嘅自己而家會成日玩音樂遊戲。
唔好意思，或者講得有啲玄。簡單啲嚟講就係，喺我生命中，出現咗個可愛，又幾鍾意玩呢類型遊戲嘅人。而巧合嘅係，喺差唔多同一時間，就畀我留意到偶像大師MLTD(下稱MLTD)出咗台服。好奇之下，就down咗落嚟玩。
嚟到呢度，可能你哋都會不約而同噉諗：「挑，咪即係為咗溝女。」錯，大錯特錯。嗰位女生，直到今時今日為止，都唔知我有玩MLTD(當然，佢都冇興趣知，但係我亦冇打算同佢講)。同埋，我本身都只係本住認識吓嘅心態嚟玩，完全冇諗過會玩到而家，更加唔會想像到自己會為咗打好啲而「練歌」——其實都幾諷刺，以前真係玩樂器嗰陣，掂都唔想掂部琴，但係而家竟然會走去練歌，所以話，男人為咗女人真係乜都會做……
我講緊佢
當然啦，如果我只係有玩MLTD的話，其實篇嘢嚟到呢度就會完，我亦都唔需要開篇新嘢嚟寫(雖然都冇乜好寫)。事實上，MLTD只係我進入音樂遊戲世界嘅大門。之後要講嘅，就係我算係為咗社交而玩嘅BanG Dream!(下稱BG)。
唯獨冇我最鍾意嗰隊，吹漲
對於BG，我本身興趣不大(次次都係噉講)。因為我真係好少留意女性樂隊。偶像團體，唔計ACG範疇，都有好多例子——呀，其實只係我唔識啫，我相信女性樂隊都多如牛毛。返返嚟，其實主要係因為我搵唔到一隊係特別打動到我嘅樂隊(又評判上身)。直至到我「發現」到RAS同Morfonica呢兩隊。前者嘅電音編曲好帶動到氣氛，後者嘅小提琴+Band sound特別之餘又好夾。再加埋本身呢個企劃有唔少出名嘅cover，令佢哋好容易打入大眾市場。不過，我再三強調，我玩主要係因為社交理由，論熱情同另外兩隻冇得比。
另一個玩BG嘅原因就係要練熟手勢等出呢隻(Argonavis AAside，又稱男BG)
好嘞，上面我提到嘅另外兩隻，講嘅除咗係MLTD之外，就係講呢隻催眠咪高風ARB(下稱ARB)。講明先，我第一次認識到呢個企劃嗰陣時，佢哋仲未出電話game，而我留意到佢哋嘅原因係非常之九唔搭八——因為一啲周邊產品，我先會走去搜尋究竟係咩嚟。雖然呢個企劃清一色男人咁濟，但係作為一個角色主導嘅群像作品，佢哋嘅設定真係好吸引，故事亦都好豐富。對於初次接觸嘅人嚟講，最難入口嘅應該係角色間似有還無嘅「基情」同埋用rap嚟battle(真．battle，參加者係會受傷嘅)。
講返隻電話遊戲，都係今年三月先開服，到而家大半年。老實講，單論遊戲性，普普通通，活動唔係計排名而係刷素材。而為咗令歌單豐富啲，ARB好興將一首歌分拆成幾part(冇計，佢冇得cover，亦都冇得用唔同角色組成新組合)。但係，為咗吸引玩家抽新角，遊戲入面嘅卡面通常都畫到好靚，算係留客嘅重要手段。同埋催眠咪高風嘅角色rap嗰陣啲特效都幾型，可以話係招牌之一。
嚟到最尾，可能有啲音樂遊戲嘅資深玩家會對我呢種人嗤之以鼻，皆因上面講到嘅音樂遊戲都係以角色/組合為中心。不過我就係咁世俗㗎喇，請見諒。
一句講晒，幾時出電腦重製版啫？
