第328期（2021年7--月）

30冬前，有一陣要意台語ê未來ê前輩，決定同齊來創辦台語文雜誌，tsiah有《台文通訊》tī洛杉磯puh-ínn。30年來，伊講文化、sueh歷史、記心情、論科學......，啥mi̍h to有，有濟濟值得收藏ê作品。Uì《台文通訊》到tsit-má ê《台文通訊BONG報》，伊ê多元、自由kap包容，一直lóng無改變。 台語文雜誌創刊30週年tsit款大代誌，本底應當是ài招逐家做伙來鬧熱--一-下，m̄-koh，受著疫情影響，實體活動bē辦--得，變做線頂ê慶祝會。透過tsit个方式，顛倒kā海內外濟濟台文有志，做一擺lóng箍做伙，仝款鬧熱滾滾！除了看著bē少台語文運動ê sia̋n-pái以外，mā有tsiok濟少年人來參加。有專門講台語議題ê網tshìng、有tī海外開辦台文班ê會長、有成立台語共學團、台語親子友善課程ê爸母，有人搬戲、寫歌、編尪仔冊等等。Mā有立委來關心母語政策ê進展。逐家tī世界各地，用in上gâu ê方式，鬥陣來tshui-sak台語。 慶祝會講煞，tńg來看tsit期雜誌有啥mih好料？刊冬外ê【台文通訊30週年經典回顧】專欄，討論台語文書寫、文字標準化、對台語文未來發展ê ǹg望，tsit期kā重點lóng整理做一篇。〈Kā阮兜ê夢想，捏做囡仔畫本〉記錄莊佳穎教授出版囡仔古ê過程，母語beh生湠，培養koh-khah濟台語囡仔，是現此時kài重要ê代誌。〈Kah Tâi-bûn ê Iok-hōe〉hōo lán看著少年爸母拍拚學台語ê用心。6--月是畢業ê季節，雖bóng kan-na ē-tàng tī線頂舉辦，台大歷史系ê周婉窈教授用台語致詞，mā借tsit个機會提醒逐家，ài ē-hiáu看世界ê變化，好好仔了解、寶惜台灣ê民主自由。 以上tsia--ê，hōo lán相信，行過30冬，台語thn̂g湠ê火種m̄-nā iáu未hua--去，koh ē有濟濟人繼續kā點--落-去！Mā ǹg望逐家繼續支持《台文通訊BONG報》kap李江却台語文教基金會，hōo lán做伙kā 寶貴ê語言文化一直傳--落-去。

●〈編輯部 Kā tsit 條台語路繼續行--落-去〉 ●〈《台文通訊》30 週年慶祝會 ONLINE〉 主持/張秀滿、陳豐惠，記錄/吳宛霖 ●〈《台文通訊》30 歲賀詞〉／鄭良光、李勤岸、蘇正玄、張秀滿、葉國基、吳宗信、周清玉、鄭麗君、陳柏惟、林昶佐、楊大正、吳永吉 ●〈《台文通訊》30 週年〉／蘇晏德 ●〈Kah Tâi-bûn ê Iok-hōe〉／Him-gî

●〈我 ê 世界〉／蘇宏恩 ●〈十五暝〉／Tân Tsiau-ú ●〈豔遇〉／施足珠

●〈Kā 阮兜 ê 夢想 捏做囡仔畫本——我 kap『台語兒童公民繪本動畫』系列〉 主講/莊佳穎，記錄/戴如意

●〈家己鉸頭毛〉／田美瑜 ●〈Koh leh 賣花 --ah〉／王秀靖 ●〈褪褲走 iah 是褪『口罩』〉／韓滿

●〈玄奇 ê 囡仔仙(十三)〉／張家榮 ●〈為記(五)〉／曾江山

●〈Kā 台灣社會 ê 好 mi̍h khioh 倒 tńg-- 來——2021 年台大歷史系視訊畢業典禮致詞〉／周婉窈

●〈五日節 ê ǹg 望〉／陳文仲

●〈喙食,hōo kha-tshng 坐 siàu〉／賴朝和

●〈波士尼行跤花〉／阿表

●〈三千箍——「牛屎 kap 蛇精」笑詼輯(一)〉／黃靜惠

●〈Kàn-kiāu 文學史〉／石牧民

●〈Thó-soāin-á〉／Kán Ûi-iū

●〈民主 kap 獨裁 Bîn-chú kap To̍k-chhâi〉／陳雷

●〈Sián-mi̍h!? Toan-ngó-cheh ê Goân-thâu sī Oa̍t-lâm〉／Chiún Ûi-bûn

●〈預防射〉／邱偉欣

●〈阮兜無Bèn-luh〉／N̂g Bí-ò