【A郎台語小詞典】 EP. 19-紅幻/Âng-hóaⁿ

今á日咱beh紹介ê語詞是紅hóaⁿ，tī咱beh紹介紅hóaⁿ進前，咱seng來講chit字hóaⁿ。Hóaⁿ有霧霧、無清楚、暗淡、暗暗ê意思。咱台語nā teh形容mi̍h-kiāⁿ，chhiāⁿ-chhiāⁿ ē 2字tha̍h做夥講，m̄-koh，講--起-來mā真奇怪，2字相tha̍h--ê，teh形容ê力草soah比孤1字--ê khah輕，咱ē-tàng來比較看māi--leh，像講烏kah烏烏，我to̍h感覺烏烏khah無烏hiah nī烏， 顛倒3字kāng字--ê tha̍h做夥是siōng強調--ê，kài趣味ê現象hoⁿh，m̄-koh咱tha̍h字盡pōng to̍h到3字niâ，無hit款4字相tha̍h--ê。

月hóaⁿ-hóaⁿ，是teh講月娘暗淡、朦朧、nā講天hóaⁿ-hóaⁿ to̍h是烏陰烏陰，a̍h是天已經beh暗beh暗--ah án-ne，烏hóaⁿ，to̍h是烏烏koh暗暗，一般是用tī天色，咱ē-tàng講：「Che天烏hóaⁿ-á烏hóaⁿ neh！」

最後，1寡色水ê分類mā有講hóaⁿ，親像pe̍h-hóaⁿ，to̍h是leh講白phú-á白phú ê感覺，黃hóaⁿ，to̍h是淺淺ê黃色，hit ê黃，無到黃檸檬hit款黃gìm-gìm ê黃hiah黃，nā用畫水彩來做例，to̍h是擠1點á黃色ê水彩，koh thàu真chē水chiah去畫--出-來ê色，色薄薄--á。另外，咱tī故事內底有講--tio̍h ê紅hóaⁿ-á紅hóaⁿ，to̍h是小可á紅，粉紅á粉紅，歹勢歹勢面帶紅，ia̍h to̍h是戀愛中ê少女ê代表色。

Kin-á-ji̍t lán beh siāu-kài ê gí-sû sī âng-hóaⁿ, tī lán beh siāu-kài âng-hóaⁿ chìn-chêng, lán seng lâi kóng chit jī hóaⁿ. Hóaⁿ ū bū-bū, bô chheng-chhó͘, àm-tām, àm-àm ê ì-sù. Lán Tâi-gí nā teh hêng-iông mi̍h-kiāⁿ, chhiāⁿ-chhiāⁿ ē 2 jī tha̍h chò-hóe kóng, m̄-koh kóng--khí-lâi mā chin kî-koài, 2 jī sio-tha̍h--ê, teh hêng-iông ê la̍t-chháu soah pí ko͘ 1 jī--ê khah khin, lán ē-tàng lâi pí-kàu khòaⁿ-māi--leh, chhiūⁿ-kóng o͘ kah o͘-o͘, góa to̍h kám-kak o͘-o͘ khah bô o͘ hiah nī o͘, tian-tò 3 jī kāng jī--ê tha̍h chò-hóe sī siōng kiông-tiāu--ê, kài chhù-bī ê hiān-siōng hoⁿh, m̄-koh lán tha̍h jī chīn-pōng to̍h kàu 3 jī niâ, bô hit khoán 4 jī sio-tha̍h--ê.

Goe̍h hóaⁿ-hóaⁿ, sī teh kóng goe̍h-niû àm-tām, bông-lông, nā kóng thiⁿ hóaⁿ-hóaⁿ to̍h sī o͘-im o͘-im, a̍h-sī thiⁿ í-keng beh-àm beh-àm--ah án-ne, o͘-hóaⁿ, to̍h sī o͘-o͘ koh àm-àm, it-poaⁿ sī iōng tī thiⁿ-sek, lán ē-tàng kóng: “Che thiⁿ o͘-hóaⁿ-á o͘-hóaⁿ neh!”

Chòe-āu, 1 kóa sek-chúi ê hun-lūi mā ū kóng hóaⁿ, chhin-chhiūⁿ pe̍h-hóaⁿ, to̍h sī leh kóng pe̍h-phú-á pe̍h-phú ê kám-kak, n̂g-hóaⁿ, to̍h sī chhián-chhián ê n̂g-sek, hit ê n̂g, bô kàu n̂g lêng-bóng hit khoán n̂g-gìm-gìm ê n̂g hiah n̂g, nā iōng ōe chúi-chhái lâi chò lē, to̍h sī chek 1 tiám-á n̂g-sek ê chúi-chhái, koh thàu chin chē chúi chiah khì ōe--chhut-lâi ê sek, sek po̍h-po̍h--á. Lēng-gōa, lán tī kò͘-sū lāi-té ū kóng--tio̍h ê âng-hóaⁿ-á âng-hóaⁿ, to̍h sī sió-khóa-á âng, hún-âng-á hún-âng, pháiⁿ-sè pháiⁿ-sè bīn tài-âng, ia̍h to̍h sī loân-ài tiong ê siàu-lú ê tāi-piáu sek.