青虫aoi新專輯《海海人生》專訪

👉人生海海，一个人生活儉錢為著安樂死？⁣

👉靈感來自防疫生活，閣有傳說對決？⁣

👉吉尼：阿跨面像我老爸？！⁣⁣

今年10月，青虫 aoi新專輯《海海人生》發行矣！⁣

〈儉錢安樂死〉和〈落雨天〉的MV你敢有去看過矣？

這改，阿東我真歡喜會使來共in專訪～

🐛🐛🐛🐛🐛🐛🐛🐛🐛🐛🐛🐛

專輯介紹

這張專輯並毋是欲寫啥物『正能量』，是單純寫出家己的生活畫面，閣有主唱所看著的世界，唱出現代少年人佇城市浮浮沉沉的現實面。孤單一人的生活茫茫渺渺，愛情的期待、甜蜜、懷疑、破碎，踅一輾閣轉來一个人，人生海海，海海人生，嘛是愛過了歡歡喜喜。

若是共專輯對頭聽到尾，會發現一寡詞定出現，比如講花、芳水、啉滾水、鼻、雨、珠淚...主唱吉尼表示：「我毋是刁故意的啦」，遮齊是伊的生活元素，佇溼溼閣翕翕的北部稅厝生活，水氣嘛不知不覺走入去歌詞內底，水氣罩霧的畫面嘛成做實體專輯的設計素材。

專輯靈感

吉尼分享真濟這張專輯的靈感來源。像〈儉錢安樂死〉是疫情踮厝防疫，加添心內孤單的心情，開始思考家己孤鳥的人生；〈你閣無轉來〉是伊手機仔遊戲「傳說對決」網友的愛情故事；〈偏偏〉是參考濟濟遊戲伴的遊戲外號；〈寒天〉是對「暈船自救會」和『抱睡』聯想來的。

這張專輯大部分是台語創作，內底歌詞嘛會當看著誠濟經典台語歌曲的痕跡，比如講：〈情字這條路〉、〈相思雨〉、〈落雨的暗暝〉等等，這攏是吉尼自細漢就牢佇記持內的聲音，這馬用家己的方式創作出新氣味。 另外，專輯內底閣藏有電影《王牌冤家》的『彩蛋』，毋知敢有人發現？

專輯歌曲

〈儉錢安樂死〉的歌詞看起來孤單一个人生活可能略仔無力、無攬無拈，雖然人生海海、生活齷齪，毋過愛揣著家己四序的生活方式，予我想著《俗女養成記》所講的：「人生其實足短的，短甲無時間閣勉強家己」；吉尼感覺若欲行入一段感情進前，著愛先學會曉「愛家己」，佇愛情內底有自信，才袂像〈戇狗逐飛鳥〉懷疑閣怪罪自己。

〈偏偏〉內底「偏偏愛／天天啊／偏偏仔／恬恬仔」的華、台語濫插的歌詞，予唱詞的聽感真鬥搭。對遮，嘛聽好發現著規張專輯雖然是台語創作為主，不過，內底嘛有一屑仔英語、華語的歌詞，利用多語言聲調聲韻的變化，予旋律有閣較濟發展的空間。

這斗和阿跨面合作創作〈落雨天〉，女音唱出對愛情的感想和思念，男音是徛佇失戀的角度，描述家己的心情，無仝的力度和風格，鋪排出這條歌的豐沛情緒。吉尼：「合作的過程，我感覺阿跨面像我老爸！」，伊感覺阿跨是一个定著、有禮貌的20捅歲少年仔閣帶淡薄仔純真，伊肯為著目標拍拚，準講食一寡仔苦佮虧，嘛甘願，這點和吉尼老爸相𫝛。

上愛佗一條歌

吉尼講伊佮意〈儉錢安樂死〉，因為「這我！」，這正是伊的生活畫面，閣有一條是〈下班〉，因為蔡振南大哥有呵咾著歌詞寫了真好，誠有詩意；啊Bass手郭宏是佮意〈寒天〉，音樂聽感真讚，會予人真自然就浸佇情境內底，若像會使感受著「溫度」。

啊阿東呢？我愛的是〈你閣無轉來〉，親像是心跳聲「pòng-pòng、pòng-pòng」節奏明顯的鼓聲，共主角的情緒體現甲明明明；閣有一條是〈下班〉，連紲兩字語詞排做伙，自然展現出獨身仔一工閣過一工的畫面感，而且會發現著上尾一條歌會不自不覺閣連轉去頭一條，孤鳥生活難免孤單，不過，一个人的速度拄拄仔好！

👉2024.03.22 專場 coming soon...