昨昏的地動

昨昏早起我５點外睏醒，去便所。想講雖然睏飽，嘛毋願起床，想欲閣倒佇眠床頂，來做「光課」的靜心冥想。

那冥想那睏那袂記得，想著的時才閣繼續。毋知偌久，想欲放屎，愛緊結束，平常結束進前，攏送光予厝內面的人佮需要的朋友，這擺干焦送予新店這間厝、礁溪社區的厝邊仔，佮台北的厝邊仔，閣加一个最近來問我問題的朋友。

便所出來，直接行落樓梯去煮早頓。行到樓梯的中央，轉彎的所在，聽著真大的聲音，我看樓跤一隻頂面堆真濟物件的椅子，佇想是啥物代誌？我無感覺著振動，聲音愈來愈大聲，一、二秒了後，想著：「地動。」緊走去大門，動甲愈來愈大，到大門邊的時，跤步嘛徛袂穩，開門出去，徛佇門口才較安心。

動煞，我𬦰起樓上，看著一个原本掛佇壁頂的大鏡落落來，破佇塗跤，閣𬦰起一層，問我翁有按怎無？伊坐佇椅仔頂，講屜仔攏拍開，桌頂的物件落甲規塗跤，拄仔電視機險險仔摔落去。電視內面已經佇報地動的消息矣！

我無緊張，抑無驚惶的感覺，想著我的情緒會較慢，愛等它慢慢仔浮起來。

我想著代誌天公伯仔攏安排好矣！我想欲放屎才起床。放好行落樓，拄好行到樓梯中央，開始地動，我會使走去厝外口，嘛較安心，那是佇眠床頂，干焦有人毋敢振動，看規間厝佇搖一个辦法。

因為查某孫的奶母請假，查某囝愛上班，我欲𤆬孫，我前一暗無轉去礁溪，今仔日佇新店，那無，台北的地動震度是五弱，礁溪五強，閣佇十樓，一定搖甲較厲害。

早起靜心冥想欲結束的時陣，突然間想著共光送予新店的厝，以前毋捌按呢做，干焦送光予礁溪社區的厝邊仔，佮台北的厝邊仔爾爾，有送光有保庇。

猶有，我送光予伊的朋友，伊蹛佇花蓮，今仔日我有用面冊訊息問伊彼爿的情形按怎？

（2024.4.4.）

Dave Goudreau on Unsplash