近來 ê 新聞捷討論儉細錢開大錢，兼教人按怎斷捨離並創造新財源。
我無投資頭腦，不而過我有少少就是 tsuē-tsuē 物件夠用就是福 ê 性地。
Lidl 拜一到拜六齊有 bué 著俗物贏做工課 ê 落價好物，兼 bué 2€ 物就會使得無料換𪜶指定商品。這个「無料」是按 APP 消費資料來，m̄ 是通人有。
24.01.2026 拜五晏，是 Lidl 割價贏落價 ê 日子 mā 是我做豬仔鼠（Hamster）ê 時間，需要 ê 割價商品斟酌寫踮紙條仔，通無料兌換 ê 商品 mā 用紅筆畫 hōo 一䀐隨知影愛挃啥物款物。小工完成盤兩班車轉來到車頭，三伐做一伐，伐到 Lidl 先傱牛奶區指定 ê 燕麥植物奶（1.5%），交德國豬仔鼠捙拚，準做我做膨鼠拚勢猶是走尾名，𪜶齊 hőng 搬了了，斡頭伐向一年行無一斗 ê 麭區，Lieber Gott, danke 天公伯有保庇 Ciabatta 猶 tī 遐，緊揀一粒橐紙橐仔擘腹 mā 順紲袋入去，這粒麭紮轉來我愛敆啥物 tsiah buē hōo 伊討債，hōo gún 翁捎 leh 做𨑨迌物食順紲做茶鈷呻「我這久 ê 三層是 uī-tio̍h 你 ê 半精白。」
Gún 翁仔姐齊半老老，腹肚 buē 堪得儉油，所致食 buē 飽脹 ê 麭，已經沓沓仔行出 gún-ê 食飯桌。啊，苦惱矣，無痟貪情緒是 Blue，痟貪又閣軁雞籠，苦惱啊！！！煞煞去，時到時擔當，無米 tsiah 來食番薯湯，這久 ê 擘腹先擲山溝，豬仔鼠做代先。
紙上無練兵，物件款好伐去算數，頂禮拜按 Aldi 款轉來 ê 鱷梨仔交林檎相放伴已經熟甲會使得做鱷梨仔醬...啊，我知影按怎處理這个臨時臨曜 ê 選擇。
鱷梨仔敆 20% 脂肪 ê 牛奶凍（Quark）m̄-nā 低熱量閣有飽滇 ê 卵白質 hām 植物油脂做麭抹醬，串仔敆兔仔耳（Feldsalat, Lamb's Lettuce）交其他 ê 菜蔬做沙拉，優格敆洋梨仔、藍莓、燕麥片做甜路杯。換一个角度看擘腹，伊是引𤆬我伐向閣較快樂 ê 路途。
近來 ê 新聞捷討論儉細錢開大錢，兼教人按怎斷捨離並創造新財源。
我無投資頭腦，不而過我有少少就是 tsuē-tsuē 物件夠用就是福 ê 性地。
Lidl 拜一到拜六齊有 bué 著俗物贏做工課 ê 落價好物，兼 bué 2€ 物就會使得無料換𪜶指定商品。這个「無料」是按 APP 消費資料來，m̄ 是通人有。
24.01.2026 拜五晏，是 Lidl 割價贏落價 ê 日子 mā 是我做豬仔鼠（Hamster）ê 時間，需要 ê 割價商品斟酌寫踮紙條仔，通無料兌換 ê 商品 mā 用紅筆畫 hōo 一䀐隨知影愛挃啥物款物。小工完成盤兩班車轉來到車頭，三伐做一伐，伐到 Lidl 先傱牛奶區指定 ê 燕麥植物奶（1.5%），交德國豬仔鼠捙拚，準做我做膨鼠拚勢猶是走尾名，𪜶齊 hőng 搬了了，斡頭伐向一年行無一斗 ê 麭區，Lieber Gott, danke 天公伯有保庇 Ciabatta 猶 tī 遐，緊揀一粒橐紙橐仔擘腹 mā 順紲袋入去，這粒麭紮轉來我愛敆啥物 tsiah buē hōo 伊討債，hōo gún 翁捎 leh 做𨑨迌物食順紲做茶鈷呻「我這久 ê 三層是 uī-tio̍h 你 ê 半精白。」
Gún 翁仔姐齊半老老，腹肚 buē 堪得儉油，所致食 buē 飽脹 ê 麭，已經沓沓仔行出 gún-ê 食飯桌。啊，苦惱矣，無痟貪情緒是 Blue，痟貪又閣軁雞籠，苦惱啊！！！煞煞去，時到時擔當，無米 tsiah 來食番薯湯，這久 ê 擘腹先擲山溝，豬仔鼠做代先。
紙上無練兵，物件款好伐去算數，頂禮拜按 Aldi 款轉來 ê 鱷梨仔交林檎相放伴已經熟甲會使得做鱷梨仔醬...啊，我知影按怎處理這个臨時臨曜 ê 選擇。
鱷梨仔敆 20% 脂肪 ê 牛奶凍（Quark）m̄-nā 低熱量閣有飽滇 ê 卵白質 hām 植物油脂做麭抹醬，串仔敆兔仔耳（Feldsalat, Lamb's Lettuce）交其他 ê 菜蔬做沙拉，優格敆洋梨仔、藍莓、燕麥片做甜路杯。換一个角度看擘腹，伊是引𤆬我伐向閣較快樂 ê 路途。