Gún 兜 ê 飯桌 m̄ 是兩个脾土 ê 鬥陣是牽涉著入人門，順人意交人兩跤，錢四跤 ê 互相尊存。我愛食 ê 荷蘭豆炒雞肉、豬肉、蝦仁遮 ê 食食搪著夜間部同學 ê 喙斗是 A7 我 ê 喙斗是 A4 有地連結卻僫揣著交流道，我就愛寬心耐性交伊做陣揣交流道，按呢 ê食飯桌 tsiah 有機會十八港跤食透透。伊無慣勢 ê 料理手路，咱就順伊 ê 喙斗調整，實踐翁親某親，愛迵過伊 ê 胃。

厝內兩支喙，一个 hōo 𪜶爸母訓練甲無飯頓美學，一个是自出世就得著厝內鼎免你扞 ê 幸福囡仔，兩个齊 buē 曉扞鼎 ê 人生活 tī 台灣，大丈夫，生活 tī 德國是一个絕對 buē 枵死，一个是向望有機會會使得瘦甲若紙 ê 體格免出力隨達成。總是人生向望宛然溫水罐 ê 燒水，準做伊𠢕保溫無咱骨力 kā 添燒水 mā 是無較縒。囡仔時向望家己瘦甲若 Model ê 向望，這久無興趣，我佮意淡薄仔圓輾輾 ê 家己。

Gún 稅 ê 厝無排油煙機，厝頭家媽 mā 禁止 gún 遮 ê 厝跤 kā 伊 ê 社區公寓敲一空安排油煙機，uī-tio̍h buiah hōo 家己實踐 gún 翁上愛 ê 食「香火」人生，烘箱料理是我上愛請 Google 大神賜我智慧 ê 出菜手路，像這出菜美味しい。