呢篇，要用廣東話寫，真不好意思，要解說請留言。
社會雜音太多，正如街市賣魚佬讚你靚你唔會堅覺得自己靚，一般人講野其實你唔會有咩痛癢感。正如大把媽媽生完仔話餵母乳餵奶粉，講真無咩所謂，自己個仔自己生養教育，人地俾你嘅好聽咪叫意見唔好聽咪叫嘈音。
但，今次出聲否定你老母嘅，係香港教育局長。係，敝城教育局長出左名係外（雲）遊局長，早於上屆揚威國際，但今屆呢個心腸更毒，公然引用一條唔識廣東話嘅蛋散言論否定我城粵語地位。「你的老母不是你老母。」除左X佢老母，我諗唔到香港人仲有咩好回應。
在其位，謀其政，而我唔知有雞先定有蛋先。究竟呢啲廢物係本身白痴先坐到上局長呢個位定或係上到局長呢個位先「若練神功必先自宮」呢？香港地人人講粵語你條友竟然「謊言」粵語只係「方言」所以唔係母語？敢問你老母餵你食奶大但你老母又係唔係你老母呢？哦，要唔講粵語先明呀？「汝娘奶兒，汝娘是親母否？」咁局長應該會明少少。
但條友仲狡辯喎，話引用下啲學者所言啫。咁你不如引用下研究黑猩猩族群語言嘅專家講解下黑猩猩講嘅究竟係方言定語言丫？又或者引用下備受高鐵滅頂嘅中華白海豚講嘅海豚音究竟係粵語定你口中所謂嘅「語言」丫？最簡單直接就係返屋企問下你娘親當年餵奶養大你嘅究竟係咪佢定還是另有親母嘛？
唔好怪我問候你娘親喎，因為你講嘅野根本難聽過問候全香港講粵語嘅人嘅娘親喎。堂堂一條膠官，竟然亂噏廿四，你估你係街市對住阿婆讚靚女嘅賣魚佬呀？你係制定未來莘莘學子嘅教育政策嘅局長呀！我明，可能你平日俾人用粵語粗口問候得多所以想滅粵，但唔該你啦，市民問候你其實都污衊左粗口架。因為你實在無恥，我先要打呢幾百粒字嚟省你，你又有無反省過？當然無啦，你啲仔女讀國際學校嘛！讓領導先走嘛！問題係你揾啲咁無說服力嘅學棍嚟support你嘅謬論，你影衰香港二字呀。
好心你逗得幾廿萬一個月，無能唔緊要，但攞番個良心出嚟做人啦。哦，我明呀，普通話做母語嘅人唔講良心講人民幣嘛，我地呢啲南蠻就煩膠喇，下下叫人孝順老母同埋憑良心做事。粵語係咪母語之論根本就等於母乳是否母（親）乳（兒），無討論空間，事實勝於雄辯。你要鬼鬼祟祟搞教改加國教刪主權移交回歸等肉酸動作你咪做囉，反正你俾人恥笑其實份糧包埋，但你指鹿為馬公然吹水唔抹嘴就人神共憤啦。你勁呀，勁過你上手個雲遊局長呀，佢都只係一年出差百幾次仲可以每月睇三十本書，你？驚天地泣鬼神咁將香港人講粵語一百五十幾年單野一句否定添！我做國家主席都覺得你能人所不能呀，快啲北上邀功𢱑番個人大做啦。
嗱，而家連果個成世人一句粵語都唔曉嘅所謂國內學者都龜縮話唔出嚟就自己嘅分析解話，香港真係靠哂你喇局長。我建議你搬你娘親出嚟，講俾全世界聽你娘親其實喺你一出世就講普通話嘅，所以你母語就係普通話，你一路講嘅粵語只係謊言而唔係母語。明架喇，你只會喺講普通話時先講真話丫嘛，明架喇：揾食啫，大曬呀。
相關新聞連結
