Manna，第一款用無條件基本收入做底 ê 密kho͘ （UBI CCurrency）

補足台灣語言文化脈絡，許多從夢中醒來的掙扎，應該只有台灣人通(能)體會？https://goo.gl/YNiEFq

中国語華文版SOS站連結：
Manna，第一款以無條件基本收入為基礎的加密貨幣（UBI Ｃryptocurrency）
－－－－－－－－－－

Che lán ài 先 ùi 密kho͘ ê 起頭「BIT kho͘（Bitcoin，『比特幣』）」講起，舊年BIT kho͘ 一kho͘ 對美元（註一）ê 匯率上koân kiōng-beh kah 兩萬美元，為啥 mi̍h chit款貨幣有 hiah-nī koân ê 價值--leh？伊 kap 大部份政府財政體系制定 ê 貨幣無仝，che，就是號做「密kho͘」 ê 「暗號貨幣（Crypto Currency，『加密貨幣』）」。

暗號，che 是啥mih意思 --leh？Koh，為啥mi̍h beh 設計chit款貨幣？

密kho͘ ê 運作，是用號做「區鍊（Block Chain，『區塊鏈』）」ê 暗號資訊技術來起造 --ê，透過 chit款規則 kap 技術保護資料 hông 真 oh 做手（註二）， mā 免 koh 經過任何人 ê 管理 kap 控制就 ē-tàng 家己運作。密kho͘ 通常是 hông 設計做有一定 ê 發行量，伊主要 ê 生產方式是 ài ùi 使用者 ê 計算機（運算ke-si）來去解除電子暗號（che是協助區鍊記錄資料 ê 自願者競賽）， kā 新 ê 貨幣「算--出-來」（算是協助運作 ê 賞金），che 就是 in chia-ê 「挖礦人」 leh 講 ê 「挖著礦」。有一寡密kho͘ ê 設計是：若hông 「算--出-來」 ê 貨幣愈濟，beh koh kā 「算--出-來」就 ē 愈 khah 困難（賞金減少）。密kho͘ ê 使用者若beh 交換，tio̍h-ài 透過仝款 ê 技術基礎，用號做「電子hâ包」 ê 軟體去進行。

BIT kho͘ ê 創辦人 tī 程式碼 ê 第一pha 就有寫，英國 koh beh QE（Quantitative Easing，『量化寬鬆』）--ah，QE是一款國家金融機構操作借貸利率，hō͘ 國內金融機構提升借貸能力致使增加貨幣發行量 ê 方法，m̄-koh che 是 leh kā 「債務貨幣」擴大發行，是負債永遠還bē了 ê 貨幣發行方式。

錢 kám m̄是有人借，tio̍h-ài有人還，總數lóng bē改變，哪 ē講伊還bē了 --leh？M̄-koh，現代貨幣制度 leh 運作，事實是差真大碼，lán 叫是 kā 錢囥入去銀行，in thang hō͘ lán 利息（若準 in 經營 sūn-sī），koh ē-tàng 保護 lán ê艱苦錢，事實銀行kan-na 留 lán 一部份ê存款，賰--ê lóng ē-sái koh kā 借--出-去。若準伊 ê 比率是10％，銀行就有法度用lán ê 一百kho͘ kā 一千kho͘ 借--出-去，koh ē-tàng 趁hia-ê借貸 ê 利息，就án-ne leh 「創造貨幣」。Che kan-na 是 kā 「簿仔／電腦」頂 ê 數字改改 --leh niâ，án-ne kám ē-tàng運作？當然，只要存款人 mài 仝時 kā 錢 lóng 領--出-來就ē-sái，chit種情形若發生，是號做「銀行走（Bank Run）」iah是『擠兌、擠提』。Chit款制度生--出-來 ê 「新錢」是ài 還 hō͘ 銀行 --ê，m̄-koh 伊無生利息錢出--來，落尾kan-na ē-tàng koh去 kā 銀行借來還（iah是 ùi 別人 hia 「提」），che號做「部份準備金制度（Fractional Reserve）」，世界大部份國家 ê 金融機構 lóng是用chit款制度，taⁿ有97％ ê貨幣lóng是透過借貸生--出-來 --ê。

Che 致使債務指數成長，全世界 ê 國家債務早就超過生產總額（GDP）ê三倍khah ke--ah（註三），當然，伊mā確定使用chit个制度一定 ē 有人poa̍h輸，創造「人為（債務）欠缺」 ê 競爭環境，chit款遊戲傾向 hō͘ 參與者想beh趁 koh-khah濟 ê 利純，hō͘ 家己ē-tàng繼續sńg--loeh，iah是勉強活 --leh。頭前講 --ê，上bái就親像「破壞生態環境（汙染 kap 計畫性報廢 iah是 kā mi̍h件銷毀來控制價siàu）」、「無顧別人死活（社會正義）」等等，用無永續 ê 方式來「趁錢」，講--來親像 leh kā lán剾洗 --ê是，che soah是發生 tī 地球資源iah是人類生產能力早就thang滿足百外億人食物 kap 生活 ê 現此時（註四）。

總總頂面講 ê 情形，kan-na ē hō͘ lán「財產」 ê 價值降低，mā hō͘ 囝孫艱苦，che 就是 hō͘ 體制剝削。

Koh有--lah，現代貨幣taⁿ lóng是 kō͘ 「信用體系」leh流通──一个 ē 負責 ê 承諾。美元 koh hông 號做「美金」（註一），就是因為伊thang換做一定數量 ê 金仔，m̄-koh chit套體系已經hông取消--ah，是講，chit款貨幣無任何擔保做底mā bē按怎，伊 ê 價值是ùi使用者對伊 ê 信心來--ê，使用者 hō͘家己 ê 產品用伊去交關就是leh替chit款貨幣掛保證。

BIT kho͘ ê 創辦人透過發行chit款貨幣，原本想beh改變taⁿ貨幣發行權 hō͘ 少數人規碗phâng去操作 ê 現狀。不而kò，目今che soah mā變做另外一款tńg-se̍h kap 投資 ê ke-si，koh hō͘ 一寡非法犯罪有法度透過chit款方式來暗khàm in ê 資金，好進行非法交關。

Taⁿ mā koh有濟濟款 ê 密kho͘--ah，原底我是看 in 無目地，對社會無啥幫贊，一直到chit站仔，我有發見第一款由非營利組織（NPO）發行，照「無條件基本收入」分配 ê 密kho͘ chiah hō͘ 我改變想法，in 講 in 是「Lán人 ê 貨幣（People’s Currency）──Manna」。Lán先了解--一-下，「無條件基本收入（Universal Basic Income）」是啥mi̍h？

有chit款基本收入了，人就有 koh-khah濟選擇來去揀頭路做，bē因為無頭路就無法度生活，chŏaⁿ 委屈家己做m̄願 ê 代誌，iah是 ē-tàng hō͘ 人去做對社會有幫贊、m̄-koh 普遍是歹趁食 ê 代誌，che hō͘ lán人有法度thang發揮家己 ê 潛能，mā是保障lán人 ê 基本生存權。

「Che……聽--起-來是真好--lah，m̄-koh chit款代誌哪有可能？Án-ne 逐个人lóng boăi作穡 tī hia 貧惰就好，而且lán kám 有hiah濟錢thang分？」

你講--ê 無m̄-tio̍h，lán chia kan-na是「空喙pō͘舌」，一定 ài 有實驗 chiah ē-sái，根據過去 tī 印度、Khá-ná-tah iah是一寡非洲國家 ê 實驗資料（註五），lóng證明人m̄是食飽就無 ài 作穡，in hia-ê 人顛倒教育 ê 水準變 khah koân、破病 ê 人賰khah少，落尾連犯罪 ê 人 mā變khah少--ah。若準人食飽就 lóng 無 ài 做代誌，kám 代表好額人趁到額 hō͘ in 兜生活了後，就lóng無 ài 做 --ah？

Chit款無條件基本收入 ê 概念，chit百外冬來，一寡立場無仝 ê 經濟學家 iah是思想家已經討論--過，針對消除散赤上好 ê 方式，in 有一个共識：就是直接 kā 錢提去 hō͘ in 用。

Che m̄-nā是beh解決散赤 ê 問題niâ，mā是面對日後可能產生 ê 問題做 ió-bih：生產技術 kap 自動化 koh-khah 提升致使「科技性失業」kap 愈來愈擴大 ê 「貧富差距」（註六）。Chit款狀況之下，消除散赤 ê 價值lán頂面有講 --ah，m̄-koh 伊 ê 價siàu偌濟？Beh 按怎做 chiah 有法度？

Chit部份 ê 討論也有幾若種，有 ê 方案是改變khioh稅結構來增加稅金收入，有 ê 是按算減少別項預算 ê 方面來行。可比美國若 kā in 四分之一 ê 國防預算減少，就 ē-tàng chiâⁿ做無條件基本收入 ê 預算，iah是取消社會福利政策 ê 各種補助等等。

當然，lán mā ài 知影，taⁿ世界上 iáu未有任何國家、政府 iah是組織，真正有大規模（lán 先 kā 設定做百萬人）實施無條件基本收入 ê 政策。瑞士有相關組織 leh 推sak、提案，mā tī 2016年 ê 時辦過公投，落尾無通過；荷蘭 taⁿ 是有規畫 leh 進行相關社會實驗；lán台（澎）島 mā仝款，chit幾冬 lóng有人 leh 推sak，chit站仔koh 有 khah積極 leh 舉辦各種活動 iah是研討會，kā 對chit款議題 ê 討論湠--開。

為啥mi̍h ài 做che（Why Manna）？──Manna「說論冊（White Paper）」第四頁án-ne寫：

Manna ê 營運組織「Lán人 ê 貨幣基金會（The People’s Currency Foundation）」是美國政府認證 ê 非營利組織（NPO），in m̄-nā 透過無條件基本收入去保障生存權，解決散赤kap財產分配重頭輕 ê 問題，mā beh解決債務貨幣無永續 ê 問題，用chit款技術提升交關 ê 效率 kap 促進應效 ê 利他主義（註七），koh beh 去起造一个tah-bā ê kho͘-á，kā 全球有社會責任意識 ê 企業、非營利組織 kap in ê 支持者 lóng kho͘做伙，落尾 in 是ǹg望 che ē-tàng chiâⁿ做一款用各種投資掛保證 ê 另類（Alternative）全球儲備貨幣（親像美元 hō͘ 真濟國家當做對外通行 ê 貨幣），hō͘ 全球性 ê 非政府組織（NGO）來去經營。

Manna 現此時 ê 價值擔保主要是 ùi 市場 ê 供需kap in 基金會 ê 捐款來 --ê（捐款hō͘ --in是thang減稅），in 設定到2027為止，全部 ê 發行量ē-tàng有24億9,800萬kho͘ 單位 ê Manna密kho͘，基礎設計是用無條件基本收入去 kā 逐年現行貨幣循環增加3.5％ ê 供給，逐禮拜 koh 做一 kái 無條件基本收入 ê 分配，啊若目前 ê 機制，是ài 經過人工審查確定，chiah ē-tàng有無條件基本收入分配 ê 授權，m̄-koh 口座thang辦幾若个，資料mā有可能偽造，未來需要增加審查 ê 精確性，親像 kap 現此時 ê 國家、政府合作辦chit項 khang-khòe。

Che供給率mā kap美元歷史上 ê 平均仝款（chit款通世界上成功 ê 貨幣落尾 kā in ê 供給率每二十冬就增加大概一倍）。基金會講，tī in進前號做Grant Coin ê 時， án-ne ê 供給率就證實是穩定 -- ê，bē hō͘ 錢薄-- 去，交換價值甚至koh變khah koân（ùi 2015年創立Grant Coin開始，已經有價值二十五萬美元 ê Grant Coin hō͘當做無條件基本收入分配--出- 去；m̄-koh ùi Manna開放口座 ê 交關系統了後，伊ê交換價值soah落kah beh 進前 ê 五倍khah低）；基金會有開放 hō͘ 認為家己無需要基本收入 ê 人thang kā in ê 基本收入捐 hō͘ 特定群體iah是別个有需要 ê 人，基金會mā 有 kap 孤兒院合作ê計畫，親像 kā in hia-ê 囡仔開一个口座，囡仔細漢 ê 時chūn kan-na ē-tàng kā 錢儉--入- 去，等伊大漢就 ē-tàng用。

Taⁿ（2018年7月初3）Ｍanna用美元交換 ê 價siàu是0.0034 kho͘，當然，伊 iáu未chiâⁿ做一 个隱定ê經濟體系，今年（2018年1--月）是拄 ùi Grant Coin改名換做Manna，in基金會mā有 leh 計畫未來 ê 發展。無條件基本收入 ê 網站（Manna Base）有 leh 進行無條件基本收入 ê 分配，mā 有開放轉出 kap 轉入 ê 交關功能。

若準 beh使用Manna做thang hông接受 ê 貨幣，我目今想--著、上有可能 ê 方式，是一陣了解chit寡根源問題、認同伊（Manna）ê 理念mā有供應關係 ê 產業，先kā買一定數量 ê Manna去做分配，chiah有法度交換 kap 使用，kā Manna ê 需求liòng-koân，mā提升chit款貨幣 ê 信用（保障）程度。

親像1929美國發生「Great Depression（『大蕭條』）」ê 時chūn，人大量失業、破產，無頭路、iau腹肚，甚至自殺，m̄-koh，事實上所有 ê 生產資源iáu-koh tī--leh，chit款ē-tàng避免 ê 體制問題，造成 ê 損害khah贏過自然災厄。所以講，taⁿ mā有濟濟 leh 促進實際資源整合 kap 利用 ê 行動，親像「Ke-si圖書館（Tool Library）」，是一个用各種ke-si做主體 ê 圖書館，伊 ê 理念是「Lán無的確 ài 有chiah-nī濟mi̍h件，tī lán需要 ê 時去提來用就好。（You don't need to own a lot of things, you just need to access things when you need.）」（註八），koh 有想 beh 解決賰食問題 ê 賰食餐廳（Recycled Food），in ē去 kap 商店合作，kā 原底無好看 iah是賣 bē 出--去，koh thang食 ê 食物、食材收倒tńg--來，chiah kā 分--出-去 iah是 kā 料理做別款 ê 食mi̍h hō͘ 逐家（註九）等等，親像chit款thang提升資源使用效率 ê 行動。

就 án-ne，lán是有各種可能 ê 選擇，chit个時代一定 ài 改換做一套用人道關懷做底 ê 永續體制，囝孫chiah有未來。

--

Manna（Tâi-oân） － Google+討論群組，歡迎逐家來做伙參與：https://goo.gl/ptHokB

註0：「區鍊技術」是一串會連sòa增加、貫串落 — 去 ê 資料列，逐 ê 資料列 hō͘ 做「區」， 伊是用暗號來確保怹資料 ê 安全，透過「點對點」技術（這代表伊無一 ê 集體驗證系統，是使用者各自進行）來管理 kah 驗證，而且資料 ê 有效變更會牽涉著全部相連串「區」ê 認證，這款設計 hō͘ 怹達成「去中心化（毋免 koh 經手他人）」ê 運作基礎。

註一：美元一般口語講「美金」，為著beh hām過去ē-tàng換做金仔 ê 「美金」做區別，作者認為使用「美元」ê 稱呼khah ha̍h現狀。

註二：「區鍊技術」是一kuānn ē 連sòa增加、貫連--落-去 ê 資料列，逐个資料列號做「區」，用數位暗號來保證資料安全，透過「點對點」技術（che代表伊無集體驗證系統，是使用者隨人進行）來管理 kap 驗證，而且資料 ê 應效變更 ē 牽涉著全部相連 ê「區」ê 認證，chit款設計達成「去中心化（m̄免經過別人處理）」 ê 運作基礎。

註三：資料來源，《自由時報》報導：IIF：全球債務總額已達226兆美元占全球GDP的324%（http://news.ltn.com.tw/news/business/breakingnews/2237241）

註四：資料來源，《｛空屋筆記｝ 免費的自由》Blog：Freegan：人們說我們是社會寄生蟲（https://goo.gl/WGg1rB）

註五：資料來源，TEDx Talks Youtube頻道：Why we should give everyone a basic income | Rutger Bregman | TEDxMaastricht（https://youtu.be/aIL_Y9g7Tg0）

註六：資料來源，Oxfam International網站：An economy for the 99%（https://www.oxfam.org/en/research/economy-99），Oxfam組織ê調查顯明，通世界上好額 ê 八个人（lóng查埔）ê 財產 kap 地球一半人口、上散赤 ê 人 --ê平濟。

註七：Effective Altruism，應效 ê 利他主義是 tī 「促進社會正義iah是解決人類問題」ê 範圍內，去計算仝款狀況之下，佗一款可能 ê 行動上ē得thang kā 人幫贊。

註八：台灣taⁿ mā有幾若間ke-si圖書館，詳細情形thang參考chia：https://goo.gl/vby5Le，家私圖書館 ê 核心價值是：「合作開放、知識共享」。

註九：台中ê「七喜廚房」是台灣chit-má有 leh 穩定運作 ê 賰食餐廳，食mi̍h是自助式 --ê 而且用自由定價 ê 方式 leh 運作，in mā kap hia-ê 社區合作舉辦共餐活動，詳細情形thang參考chia：https://goo.gl/7BuXjP；另外mā有各地 ê 賰食 kap 交換社團，親像『剩食終結者』iah『不要再買了！免費的幻物與幻務』等等