設計名人堂 Hilda 設計是一種服務 為客人喜悅而喜悅

裝修界少見女流之輩，青春活力的室內設計師Hilda原來曾是fashion designer。早幾年獲友人所邀，加入了室內設計行業，讓她見識了完全不同的世界。
她笑言時裝設計與室內設計其實有幾分相似，「慢慢認識室內設計覺得好有挑戰性，同整衫有幾分相似，衫係講整個形態、形狀，而裝修設計都會有呢一種3D4D嘅概念。」
香港家居應結合實用美觀
Hilda多接手中小型家居室內設計，在實用與美觀之間找到平衡點是她的樂趣。
「香港人嘅屋企多數空間有限，真係要費盡心思去諗。例如而家好多人嘅單位200呎都冇，做傢俬一般嚟講會有好多走盞位，但細單位就要每一分寸都要度得好好，如果唔係放得呢樣嘢，第二樣又唔夠位放。」
「所以要好謹慎，因為啲尺寸要拎到好盡，每一個間隔都有特定要求，唔可以只係為咗美觀。」
在精密的考慮中，最重要的是從客人口中更了解他，才能設計得好。
「雖然我哋叫室內設計，但都唔可以太天馬行空。呢個就要靠溝通，我唔可以自己一意孤行，唔可以覺得呢個靚就一定要做，因為呢個係客人嘅家，要配合返個客嘅生活習慣同路線去設計。」
「因為室內設計係一個服務嚟，以人為本嘅服務，客腦海入面想要嘅我哋幫佢整理出嚟，未必諗到部份，我哋就幫佢美化。」
設計師必備細心 了解客人生活習慣
為了能幫客人設計一個好的家，細心是必要條件。「其實要花多啲時間同個客傾偈，你要認識佢多啲，知道佢係屋企入面嘅時間多唔多，主要喺邊個區域活動，我會集中喺佢生活習慣，幫佢諗設計。」
Hilda仔細了解每個客人細微的生活習慣之外，也會隨著時勢為客人搞盡腦汁。「近期客人budget都握得緊咗，所以喺設計方面，我會不停諗點樣喺設計同物料方面，簡單少少，例如原本想特色牆全部用木條嘅，可能我就會介紹一啲新啲嘅物料俾佢，用啲複合纖維板代替原木，又做到個效果。」
公司自家團隊 溝通彈性十足
當有優秀的設計後，施工也需要配合好，Hilda公司的團隊著重互相溝通。「出面公司如果係判工嘅話，啲嘢定實咗，好難再落場同佢講幫手點改，彈性低。但我哋公司有自己師傅團隊，合作會緊密啲。特別係我哋做設計師，其實係連接住客人，管工同師傅。我哋易話為啲，如果idea有咩轉變都可以幫到手，隨時改。」
在一個有活力的公司環境，讓Hilda更能工作得愉快和勤力。「形容公司嘅話會用friendly，因為有老有後生，好全面。有時我覺得個客搵咩公司，設計同價錢梗係最重要，但某程度上你要成日同佢傾偈，佢同你相處得開唔開心都好重要。」
家居設計是長遠影響 為客人的喜悅而喜悅
一邊學一邊做，Hilda手上也累積了不少滿意的成品，她坦言自己更愛室內設計。「fashion始終係變得好快嘅嘢，設計到完成當然好有滿足感，但覺得唔夠long lasting，有種一瞬即逝嘅感覺。」
「做室內設計好唔同，成間屋可能會影響到一家人十年八年嘅生活，你會feel到成家人搬入去嗰種喜悅。所以我一直好努力去思考，點樣幫到佢地設計整理好間屋，滿足感自然會更加大。」

本文章內容及圖片均由本專欄作者提供及上載，並不代表本公司立場，如有任何版權問題，請與本公司聯絡。關键字： 裝修佬; 裝修; 故事; 設計師;裝修工程;裝修網;裝修費用