踏入2021年，有無曾經期望過「新一年新開始」，所有壞事留喺2020年。過咗十幾日，有無發覺「2020年」只係改咗一粒字，然後繼續存在世上，世界依然崩壞，當時嘅希望，而家又會唔會變咗奢望？
武漢肺炎席捲全球，原本上年舉行嘅東京奧運歷史性延期，大家當時都以為押後一年之後，所有事情最終都可以迎刃而解，而家咁樣諗好似太過樂觀。2021年，世界各地出現變種病毒，就算有疫苗，成效依然成疑，究竟東京奧運搞唔搞得成，如今變數依然相當大。
早前踏入奧運開幕200日倒數，與此同時，東京都內確診個案數字可以用一個字形容—「升」字，由5日起近一星期每日確診人數都過千，最高更見近2500宗，再度進入緊急狀態。
東京奧運延期一年，如今舉辦與否仍然是個謎。（東京奧運Twitter）
時間愈近，傳聞愈多，日本八卦雜誌直指本月18日國會將宣布奧運取消，真心定假膠而家不得而知，時間會有答案。上周先有日本奧委會主席山下泰裕透露閉門作賽嘅可能性，上年曾經做過「吹哨者」嘅奧委會元老Dick Pound，近日接受《BBC》訪問時再度放風，坦言無辦法保證東京奧運可以如期舉行。
東京奧運一日未宣布取消，理論上仍然會如期舉行，咁有咩日子大家要知？香港隊而家有5張入場券，4張來自男子花劍隊（團體x1，個人x3）同江旻憓女子重劍個人賽資格。根據FIE資料，奧運積分截數日為4月5日，亞洲及大洋洲區外圍賽就將會喺4月15至30日期間，於韓國首爾上演，當然啦，暫時一切日子都係暫定，即係完全未confirm。
今年東京奧運理論上7月23日揭幕，劍擊項目第2日就會開鑼，咁多屆奧運會以來，劍擊首度舉辦晒3個劍種男、女子個人賽及團體賽，合共產生12面金牌。首日賽事先決出男佩及女重個人賽嘅金牌，獎牌希望男花隊先於7月26日登場，及後8月1日再衝擊團體獎牌。
