武漢肺炎疫情肆虐全球，經歷一年後疫情未見特別放緩，連東京奧運亦盛傳被受牽連，有取消嘅可能性，就知道今次疫情對國際體壇有幾影響。國際劍聯（FIE）周二（26日）向各個成員國發通告，公布新一年疫情下嘅比賽安排。
通告第一點提及各個洲份嘅青少年錦標賽，因為如今疫情關係，航班及入境都有限制，比賽難以舉辦，故此FIE舉行今年各大洲嘅青年賽取消，而世青就暫時未有提及。
換言之，原定今年烏茲別克舉辦嘅亞青將無辦法舉行，亦都係連續兩年因為疫情而取消。亞青一直都係一眾小將的最大目標，付出不少努力，惟無辦法喺大賽舞台上面表現自己，實屬可惜。每年港隊喺亞青亦有佳績，如今再度敵不過疫情，一眾小將除咗無奈都無嘢做到。
國際賽3月戰火重燃
原定上年11月開打嘅國際賽季，因為疫情關係無辦法舉行，一延再延，FIE決定今年3月前都唔會舉辦任何賽事。3月前無比賽，即係等於3月之後有比賽啦，無錯，花、重、佩都有份，永不落空。一旦賽事順利進行，將會係一年來首項舉辦嘅FIE賽事。
東京奧運至今預計仍然「如常進行」，而奧運積分截數日係今年4月5，3月舉行嘅賽事就會係截數前最後一項賽事，等一眾運動員作最後衝刺。FIE執委會經過討論後，決定同一地方舉辦同一劍種嘅男、女子項目（賽事詳情如下）。3個舉辦賽事嘅地方，FIE都會有90萬瑞士法郎資助，為所有運動員及工作人員進行病毒測試，以及其他相關費用，希望賽事可以在安全情況下順利舉行。當然啦，通告中都戴晒頭盔，稱視乎疫情發展再作決定。
佩劍世界盃匈牙利布達佩斯站：3月10-14
重劍世界盃俄羅斯喀山站：3月19-23
花劍大獎賽卡塔爾多哈站：3月26-28
一旦落實參賽，港隊成員大有可能提早至少兩星期抵達當地，接受各地酒店隔離，及後先可以參賽。如今風頭火勢出外比賽，確實有唔少憂慮，暫時未知港隊方面部署如何，已穩奪奧運入場券嘅花劍隊及重劍一姐江旻憓又會唔會冒險參賽呢？
另外，台灣劍總官方Facebook透露，奧運亞洲及大洋洲外圍賽將於4月15-16日喺韓國首爾舉行，不過FIE今次通告入面就未有提及。
