守護身為人嘅價值──《廟街有殭屍》

夢繪文創FB試閱：https://bit.ly/2X4OYRk

（本文有少量劇情透露）

如果一隻殭屍頭目現身喺你面前，問你願唔願意成為殭屍，加入佢哋嘅群體，你會唔會應承呢？你可能會諗，做咗殭屍就唔可以日頭出嚟，又要遵從殭屍頭目嘅命令，點會有人想做？但喺呢本小說裏面，的確有唔少人自願成為殭屍，有啲為咗錢，有啲係想脫離老病死之苦，有啲係諗反正人類咁弱小，睇嚟遲早都不敵殭屍，諗住「識時務者為俊傑」，早啲埋堆有著數。

故事嘅主角韓壬辰係一名政府殮房助理，喺工作期間目睹屍變等怪事發生，之後喺機緣巧合之下成為咗驅屍人。身為主角當然要負責打怪，難得嘅係佢嘅幾位朋友雖然無法力，但都喺附近密切留意情況，搵時機獻出一臂之力。

的確，呢個唔係勝算大唔大嘅問題，亦非受限於自身能力高低，而係每一個人都可以用自己嘅方法出一分力去守護身為人嘅價值。如果將所有價值都拋棄，僅餘一副永生不死之軀，咁又有咩意思呢？

有見書嘅結尾帶出「北區驅屍工會」，亦都發現作者已經喺Patreon寫緊《廟街有殭屍2》，相信可以期待呢個故事會有續集推出。

另外，同前作比較，感覺作者今次花多咗筆墨喺香港呢個舞台，亦都用咗好多只有香港人先睇得明嘅都市傳說同埋gag。睇香港作者寫以香港為背景嘅小說係有多一重趣味，因為好多場景，例如廟街嘅占卜算命檔、長洲嘅碼頭大街，睇嘅時候腦入面會有埋真實地方嘅畫面。情況就好似日本人睇日本作者所著嘅社會派小說，睇到書入面嘅銀座、六本木，同埋啲角色講出佢哋生活中流傳嘅都市傳說及笑話，我諗應該都會有差唔多嘅親切感。

p.s. 特別一提設計師Joe（IG profile）喺頁邊整咗隻跳跳下嘅小殭屍，好有心思嘅細節。

作者：西樓月如鈎（FB專頁）
出版：夢繪文創（FB專頁）
出版日期：2021年7月
購自：2021香港書展星夜‧夢繪攤位