紅魔鬼賽後評
英超 車路士 4-3 曼聯 (4-4-2024)
1. 最閪既結果，補時最後三分鐘連失兩球，比賽入面再傷多兩個中堅，五個中堅入面傷咗成四個，本身已經冇埋左閘，下場聯賽對利物浦天殘地缺，呢鋪真係冚家剷。
2. 好波不如好運，如果講表現，我會話曼聯係比較值得拎三分果隊，車路士響95分鐘之前其實好多傳波失誤，如果曼聯處理得好少少，唔駛話入多球，至少可以保住控球權。
3. 足球就係咁，一子錯，滿盤皆落索。達洛治最後跣腳，隻手掂到馬度亞基，然後佢成個就跌低，球證吹十二碼成為轉捩點。
4. 如果講返成場比賽，車路士果幾個入波都係有啲運，第一球傳中既時候省中人改變方向落響無人看管既加拉加腳下、最後一球又係省中麥湯文尼改變方向彈入。
5. 至於兩球十二碼，我會覺得有商榷餘地，第一下安東尼收咗腳，大脾拍大脾咁撞咗下，係掂唔到波，但接觸係咪大到要十二碼呢？
6. 第二球，我諗球證同VAR都睇咗好耐，諗緊判定唔判好，因為達洛治係跣腳，但落地果時地下係有將隻手伸咗出黎，都係有掂到馬度亞基，但動作又有冇大到要吹十二碼呢？
7. 我唔會話黑哨，但我會覺得呢兩球就算吹都係好Margin，仲要一場入面出現兩次，真係好難唔屌咗出黎。
8. 進攻方面，其實都係多謝車路士踢得差係咁送禮，尤其是第一同第三球，真係直接助攻比曼聯咁款，可想而知，今次車路士其實場上係踢得有幾「好」。
9. 但你咪理，佢哋係贏就贏，我都好想角色調返轉，係曼聯踢得閪但贏波。不過話說回來，我第二段話曼聯係比較值得拎三分果隊，其實都係相對而言。雖然第一球同第四球車路士射入多多少少都有省中人改變方向既運氣，但點解兩次射球者都係冇人mark？防守錯誤唔駛多，一次已經可以致命，更何況係兩次？
10. 我唔鍾意屌鳩坦克，因為我覺得今季太多人傷，新球員又有啲適應期，所以我把口係有比空間佢，就算同曼迷朋友之間傾曼聯，我都絕對唔會係乜撚嘢反坦屌佢收回佣果球槍口對內既曼迷。
11. 但係唔抽水係一回事，佢場上調動做閪咗屌佢係另一回事。曼治唔係正宗左翼、麥湯文尼攻優於守，落後時放出黎搏鎚無可厚非(呢點已經唔係第一次講)，但你響要主守既時候收起咗主力防中卡斯米路，同埋好似有無限體力死唔斷氣回防同反擊都有既加拿祖做乜撚嘢？第二球十二碼雖然達洛治係要負上責任，但係如果加拿祖響度幫手防守，又會唔會出現佢比人硬爆入禁區既情況？而麥湯文尼更加係直接被省中改變方向果個，係運氣唔好，但呢球真係省中佢又係事實。
12. 留力下場利物浦？唔好撚玩喇，呢場都未完場啊哥哥，車路士爛船都有三根釘，呢三分一日未完場都唔穩陣架。
13. 上次足總盃對利物浦之前，我果篇都提過，果陣我覺得雖然冷門少少，但係有機會贏既。但今次我完全冇呢個感覺，反而有返對曼城果場預備定輸少當贏既預感。
14. 首先係傷兵問題，仲嚴重過上一場，今次後防係重災區，如無意外下場既中堅搭檔應該係麥佳亞拍住青年軍甘比華拉，對住沙拿紐尼斯同迪亞斯，真係諗起都刺激。而且利物浦連勝咗兩場氣勢如虹，曼聯就兩次響補時領先之下，一次和波一次輸波，呢種輸法係最打擊士氣。
15. 我真係唔想咁講，但係今次雙紅會…自求多福喇。
#不專業足球筆記 #足球專欄 #專欄 #我愛紅魔鬼 #英超
#紅魔鬼賽後評 #CHEMUN #曼聯 #車路士 #足球 #賽後評
#英超賽後評
更多專欄內容︰ https://www.leafopenleafopen.com/unprofessional9up
廣告時間 -
ig: leafopen3
instagram.com/leafopen3
fb: leafopenleafopen
facebook.com/leafopenleafopen
方格子︰ https://vocus.cc/salon/leafopenleafopen
如果有興趣睇下我既其他寫作作品，可以上 leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B
如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938
