紅魔鬼賽後評 英超 曼聯 0-3 利物浦 (1-9-2024)
卡斯米路連環失誤令對手士氣大振 曼聯無法調整致大敗
1. 難聽啲，話今場係輸響卡斯米路一個手上都不為過。當然，輸波係成隊既責任，失完波之後，隊波冇及時調整都係問題。
2. 頭三十分鐘，本身隊波發揮唔算特別好，但都唔係特別差。而對手除咗越位球入波之外，其實都一樣做唔到攻勢。簡單黎講，其實兩隊上半場頭三十八分鐘，都係混戰居多。
3. 不過卡斯米路第一下咁求其既傳波，導致對手五打三，迪亞斯無人看管之下頂成一比零，就係咁打起咗對手士氣。
4. 之後曼聯就全面失勢，第二球失波，同樣都係卡斯米路既錯誤，比人從後逼甩，又係輸反擊，退後企位時馬天尼斯收唔切企得唔好，令迪亞斯又一次無人看管下任射破網。
5. 跟住成個比賽既形勢就全面倒向利物浦，曼聯本來響三十幾分鐘時曾經佔有64%控球率，就響短短最後呢十分鐘左右，半場比利物浦搶到變咗5050。
6. 舒克斯上半場踢得都好差，響卡斯米路連環犯錯之前其實可以話係場上最差球員，係咁傳失波或者控甩波，我仲以為佢半場會同卡斯米路一齊比人換走。
7. 但係經過咗半場既洗禮，佢下半場叫做入局，有兩次機會爭啲入波，其中近門一頂更加係黃金機會，可惜都係老問題，有機會，但把握唔到，頂得太正。第一場正選就係大戰，表現得緊張係正常，好彩佢下半場入局快咗，希望佢可以保持進步。
8. 果頭入唔到波，呢頭就輸多球。第三球失波都係文奴比人逼甩，然後打反擊，呢個時候連拎一分既希望都冇埋。佢呢下失誤冇卡斯米路果兩下咁影響士氣，但其實都係輸自己，而對面就一針見血把握到。
9. 唔知係咪曼治既受傷，頭幾場睇到既好有進步既前場壓逼，今場完全冇晒。偶爾逼甩人哋幾球，但自己亂鳩咁踢又甩晒。
10. 有人屌華舒福，但今場以波論波，佢同加拿祖相比，我覺得佢係稍為好少少，其實無論換邊個都合理。佢其實響左路好多突機會去做波，但冇咗Shaw響左面overlap，佢既威脅真係大減，佢同Dalot兩個有幾下左腳出波，但都係傳得唔夠好。
11. 純講出場既球員，坦克今場既排陣出既人其實問題不大，只係個別球員幾下鬼上身，短時間內連失兩球，然後球隊冇及時調整過黎，先至會令到大敗而回。講白啲，你預唔到頭兩場踢得唔錯既卡斯米路會咁樣自爆兩球。唯一可以屌少少既，係究竟將Amad放響後備究竟啱唔啱，因為佢後備出黎都好活躍，呢啲假設性問題真係答你唔到。
12. 最尾二十分鐘，對面都收油，我哋叫做到唔少攻勢，但始終去唔到埋門一腳。下半場機會有幾個，其中舒克斯果兩個都真係幾近榜，如果入咗其中一球都仲有價講，可惜自己把握得唔好，怪得邊個？
13. 第一場對富咸，贏得有說服力、第二場對白禮頓，係輸兩球戇鳩波但整體表現其實唔差，比到我哋睇到係有啲戰術有啲進步、但呢一場，真係攻守都失望而回，而且隊波既心態真係唔夠積極，鬥心唔夠。頭半個鐘失誤之前，其實我覺得五五波，係因為兩隊響頭三十分鐘都唔係表現得太好，但人哋把握到你既失誤，咁呢個就係實力上既分野。
14. 轉會市場完咗，走咗麥湯文尼，連唯一可變既球員都冇埋，但烏加特又註冊唔切，變咗逼住用哥利亞。呢位青年軍小將雖然開局有啲緊張，但最後踢出黎唔差，不過串連就麻麻，搶到波成日自己推去死位。以地標戰黎講，其實算唔錯架喇，卡斯米路如果成日都踢到今日咁，相信哥利亞都仲會有唔少出場機會。
15. 我一路都講我係唔想麥湯走，但係放佢走呢個決定，其實唔係錯，球會受制於FFP要賣人、麥湯想要正選但佢響曼聯真係做唔到，球會陣容有出有入，其實係一件好正常既事。而我都真心相信坦克係唔想賣佢走，因為佢落後既時候最常出既一招，就係出麥湯出去鳩湧，而佢今場真係變唔到陣搞到要出個青年軍，相信佢都好掛住麥湯。
16. 其實曼聯都唔好彩，雖然而家得幾條友受傷，但不幸地傷親都係主力︰賀隆、梳爾、曼治，呢三個更加係擁有改變戰局既球員。可能有人會質疑曼治，但你哋睇返呢三場有佢同冇佢，球隊響場上逼搶既表現就知我唔係鳩UP。
17. 羅馬非一日建成。今季轉會部門算做足嘢，但新球員註冊唔切，又有幾件主力傷緊，我認為都仲可以比坦克多少少時間。但係，隨住輸咗比利物浦兼踢得咁肉酸，相信留比坦克翻身既時間其實唔多，剩低幾場比賽，如果有乜差池，恐怕佢都好快會聞到魷魚香。
#不專業足球筆記 #足球專欄 #專欄 #我愛紅魔鬼 #曼聯每日情報站
#英超 #紅魔鬼賽後評 #MUNLIV #曼聯 #利物浦 #足球 #賽後評
#英超賽後評 #舒克斯 #Amad
更多專欄內容︰ https://www.leafopenleafopen.com/unprofessional9up
更多小說內容︰ https://www.penana.com/user/52938/%E8%91%89%E9%96%8B%E8%91%89%E9%96%8B/portfolio
廣告時間 -
ig: leafopen3
instagram.com/leafopen3
fb: leafopenleafopen
facebook.com/leafopenleafopen
方格子︰ https://vocus.cc/salon/leafopenleafopen
如果有興趣睇下我既其他寫作作品，可以上 leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B
如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938
